- హైదరాబాద్ బేగంపేటలోని
- అక్షర వాగ్దేవి స్కూల్లో ఘటన
సికింద్రాబాద్, వెలుగు: పూరీలు గొంతులో ఇరుక్కుని ఓ బాలుడు మృతి చెందాడు. సికింద్రాబాద్ పాత బోయిగూడకు చెందిన గౌతమ్ జైన్ స్థానికంగా వ్యాపారం చేస్తున్నాడు. ఆయనకు కొడుకు విరేన్ జైన్ (11) బేగంపేట పీఎస్ పరిధిలోని అక్షర వాగ్దేవి ఇంటర్నేషనల్ స్కూల్లో ఆరో తరగతి చదువుతున్నాడు. రోజు మాదిరిగానే సోమవారం స్కూల్కు వెళ్లిన బాలుడు మిగతా విద్యార్థులతో కలిసి మధ్యాహ్నం లంచ్చేస్తున్నాడు. తన బాక్సులో పూరీలు తెచ్చుకున్న విరేన్ జైన్ఒకేసారి మూడింటిని రోల్ చేసి తింటుండగా, అవి గొంతులో ఇరుక్కుపోయి ఊపిరాడక విలవిలలాడాడు.
ఇది గమనించిన తోటి విద్యార్థులు స్కూల్ టీచర్లకు చెప్పగా, వెంటనే బాలుడిని మారేడుపల్లిలోని గీతా నర్సింగ్ హోమ్కు తరలించారు. పరిస్థితి విషమించడంతో అక్కడ్నుంచి అపోలో ఆసుపత్రికి తీసుకెళ్లారు. పరీక్షించిన డాక్టర్లు బాలుడు అప్పటికే మృతి చెందినట్లు నిర్ధారించారు. ఘటనపై కేసు నమోదు చేసిన బేగంపేట పోలీసులు బాలుడి డెడ్బాడీని గాంధీ మార్చురీకి తరలించారు. పిల్లవాడిని సమీపంలోని ఆసుపత్రికి తీసుకువెళ్లి ఉంటే ప్రాణాపాయం నుంచి బయటపడేవాడని పలువురు విద్యార్థుల తల్లిదండ్రులు అభిప్రాయపడుతున్నారు.
