హైదరాబాద్, వెలుగు: తమ ప్రభుత్వం చేపట్టిన మూసీ రివర్ ఫ్రంట్ ప్రాజెక్టు, రీజినల్ రింగ్ రోడ్డు (ట్రిపుల్ ఆర్), మెట్రో రైలు విస్తరణతో హైదరాబాద్ మరింత అద్భుతంగా తయారవుతుందని సీఎం రేవంత్ రెడ్డి అన్నారు. తాము దేశంలోని ఇతర నగరాలతో పోటీ పడటం లేదని, ప్రపంచంలో పేరొందిన నగరాల సరసన హైదరాబాద్ను నిలబెట్టాలన్నదే తమ సంక ల్పమని చెప్పారు. తెలంగాణ నుంచి అమెరికాలో ఉంటున్న, అక్కడికి వెళ్లొస్తున్నోళ్ల సంఖ్య పెరిగిందని.. అందుకే న్యూయార్క్తరహాలో హైదరాబాద్ ను తీర్చిదిద్దాల్సిన అవసరం ఉందన్నారు.
మంగళవారం సెక్రటేరియెట్లో సీఎం రేవంత్ రెడ్డితో కుష్ మన్ అండ్ వేక్ ఫీల్డ్ సంస్థ ఆసియా పసిఫిక్ సీఈవో మాథ్యూ భౌ నేతృత్వంలోని ప్రతినిధి బృందం సమావేశమైంది. ఈ సందర్భంగా హైదరాబాద్ గ్లోబల్ సిటీగా వృద్ధి చెందుతున్న తీరు, నగరంలో వివిధ రంగాల విస్తరణపై చర్చించారు. దేశంలో శరవేగంగా హైదరాబాద్ వృద్ధి చెందుతున్నదని వేక్ ఫీల్డ్ ప్రతి నిధి బృందం పేర్కొంది. ఈ సందర్భంగా తమ స్టడీ వివరాలను పంచుకుంది. గత ఆరు నెలల్లో రియల్టీతో పాటు లీజింగ్, ఆఫీస్ స్పేస్, నిర్మాణ రంగం, రెసిడెన్షియల్ స్పేస్ లోనూ హైదరాబాద్ గణనీయమైన వృద్ధి నమోదు చేసిందని తెలిపింది. దేశవ్యాప్తంగా ప్రధాన నగరాలకు సంబంధించి ప్రతి ఆరు నెలలకోసారి ఇచ్చే తమ నివేదికను జులై నెలాఖరులో విడుదల చేస్తామని వెల్లడించింది. ఈ సమావేశంలో ఐటీ, పరిశ్రమల శాఖ మంత్రి శ్రీధర్బాబు పాల్గొన్నారు.
