- కోమాలోకి వెళ్లినట్లు తెలిపిన డాక్టర్లు
- వైద్యానికి రాష్ట్ర ప్రభుత్వం సాయం చేయాలని ఆమె తల్లి అభ్యర్థన
ఎల్బీనగర్, వెలుగు : సిటీలోని చైతన్యపురికి చెందిన ఓ మహిళ యూకేలో కేర్టేకర్ గా పనిచేసేందుకు వెళ్లి, అక్కడ జరిగిన యాక్సిడెంట్లో తీవ్రంగా గాయపడింది. ప్రస్తుతం కోమాలో ఉన్న ఆమె వైద్య ఖర్చులకు రాష్ట్ర ప్రభుత్వం సాయం చేయాలని కుటుంబ సభ్యులు కోరుతున్నారు. చైతన్యపురికి చెందిన వెంకట రమణమ్మ కూతురు హిమబిందు తెలిసిన వారి ద్వారా 5 నెలల కింద యూకేలోని ప్రెస్టన్ సిటీకి వెళ్లింది. అక్కడి బ్రొకె హెవెన్ అనే హాస్పిటల్ లో కేర్ టేకర్ గా పనిచేస్తోంది.
అయితే గత నెల 24న అక్కడ రోడ్డు దాటుతున్న టైంలో ఓవర్ స్పీడుతో దూసుకొచ్చిన ఓ ట్రక్ ఆమెను ఢీకొట్టింది. తీవ్రంగా గాయపడిన ఆమెను పోలీసులు హాస్పిటల్లో అడ్మిట్చేసి చికిత్స అందిస్తున్నారు. హిమబిందు ప్రస్తుతం కోమాలో ఉంది. ట్రక్ డ్రైవర్ ను పోలీసులు అదుపులోకి తీసుకున్నారు. డ్రగ్ మత్తులో రాష్ డ్రైవింగ్ చేసి యాక్సిడెంట్కు కారణమైనట్లు గుర్తించారు. తన ఆర్థిక పరిస్థితి అంతంత మాత్రమేనని, తన బిడ్డ హిమబిందు వైద్యానికి రాష్ట్ర ప్రభుత్వం సాయం చేయాలని శనివారం మీడియా ముందు అభ్యర్థించారు. హిమబిందుకు 8 ఏండ్ల కూతురు ఉందని, పాప తమ వద్దే ఉంటుందని వెంకట రమణమ్మ తెలిపారు.
