- నిర్మాణాలకూ ఎలాంటి అనుమతులు లేవు
హైదరాబాద్, వెలుగు: ప్రజల నుంచి అందిన ఫిర్యాదుల మేరకు హైడ్రా ఆధ్వర్యంలో జీహెచ్ఎంసీ, టౌన్ ప్లానింగ్, రెవెన్యూ సిబ్బంది కలిసి తమ్మిడికుంట చెరువులోని అక్రమ నిర్మాణాలను కూల్చివేశామని హైడ్రా కమిషనర్ రంగనాథ్ తెలిపారు. ఇందులో ఎన్ కన్వెన్షన్ కూడా ఉందని శనివారం ఒక ప్రకటనలో చెప్పారు. చెరువులోని ఎఫ్టీఎల్(ఫుల్ట్యాంక్ లెవల్)లో ఎకరా 12 గుంటలు, బఫర్ జోన్ పరిధిలోని 2 ఎకరాల 18 గుంటలు, మొత్తంగా 3.30 ఎకరాలను ఆక్రమించి, ఎన్ కన్వెన్షన్ నిర్మించినట్టు తమ విచారణలో తేలిందని అన్నారు. ఈ నిర్మాణాలకు సైతం ఎలాంటి అనుమతులు లేవని చెప్పారు. బిల్డింగ్ రెగ్యులరేషన్ స్కీమ్ కింద అనుమతుల కోసం ఎన్ కన్వెన్షన్ ప్రయత్నించినా, సంబంధిత అధికారులు అనుమతించలేదని రంగనాథ్ వివరించారు.
‘‘2014లో తమ్మిడికుంట చెరువు ఎఫ్టీఎల్, బఫర్ జోన్‌‌‌‌‌‌‌‌లకు సంబంధించి హెచ్ఎండీఏ ప్రాథమిక నోటిఫికేషన్‌‌‌‌‌‌‌‌ను విడుదల చేసింది. 2016లో తుది నోటిఫికేషన్ జారీ చేసింది. 2017లో సర్వే నివేదికపై జిల్లా జడ్జి కోర్టు వద్ద కేసు పెండింగ్‌‌‌‌‌‌‌‌లో ఉంది. కానీ ఏ కోర్టు నుంచి ఎలాంటి స్టే ఉత్తర్వులు లేవు’’ అని రంగనాథ్ తెలిపారు. ఆక్రమణల కారణంగా తమ్మిడికుంట చెరువులో నీటి నిల్వ సామర్థ్యం 50 నుంచి -60 శాతం తగ్గిపోయిందని, దీంతో భారీ వర్షాలు వచ్చినప్పుడు చెరువు కింది కాలనీలు ముంపునకు గురవుతున్నాయని చెప్పారు. కూల్చివేతలు నిలిపేయాలని హైకోర్టు మధ్యాహ్నం స్టే ఇచ్చిందని, కానీ అప్పటికే అక్కడ కూల్చివేతలు పూర్తయ్యాయయని రంగనాథ్వెల్లడించారు.
