- హైకోర్టు ఆదేశాల మేరకు హైడ్రా, జీహెచ్ఎంసీ చర్యలు
- పార్క్ స్థలం పదేండ్ల కింద స్పోర్ట్స్సెంటర్కు లీజు
- అందులో బ్యాడ్మింటన్, వాలీబాల్ కోర్టులు, డ్రెస్ చేంజింగ్ రూమ్, వాష్రూంలు కట్టిన నిర్వాహకులు
- అక్రమాలపై హైకోర్టును ఆశ్రయించిన స్థానికులు
- కూల్చేయాలని కోర్టు ఆర్డర్.. అమలు చేసిన ఆఫీసర్లు
మాదాపూర్, వెలుగు : హైదరాబాద్ కావూరి హిల్స్లోని పార్కు స్థలంలో వెలసిన అక్రమ కట్టడాలను హైడ్రా, జీహెచ్ఎంసీ అధికారులు కూల్చివేశారు. సోమవారం పోలీసుల బందోబస్తు నడుమ వాటిని నేలమట్టం చేశారు. పార్కు స్థలాన్ని లీజుకు తీసుకున్న స్పోర్ట్స్ సెంటర్ నిర్వాహకులు కూల్చివేతలను అడ్డుకునే ప్రయత్నం చేశారు. ప్రజలకు ఉపయోగపడేలా తీర్చిదిద్దాల్సిన పార్కు స్థలాన్ని కొందరు సొసైటీ సభ్యులు స్పోర్ట్స్ సెంటర్కు లీజ్కు ఇచ్చారని, అందులో అక్రమ నిర్మాణాలు చేపట్టారని కాలనీ సొసైటీ సభ్యులు హైకోర్టును ఆశ్రయించగా.. వాటిని కూల్చేయాలని జీహెచ్ఎంసీ, హైడ్రాకు ఇటీవల న్యాయస్థానం ఆదేశాలు ఇచ్చింది. దీంతో వాటిని అధికారులు నేలమట్టం చేశారు.
25 ఏండ్లకు లీజుకు తీసుకొని..!
మాదాపూర్ కావూరి హిల్స్ ఫేస్ 1లో లేఅవుట్ అప్పుడు కొంత ఖాళీ స్థలాన్ని పార్కు కోసం వదిలిపెట్టారు. ఈ పార్కు స్థలాన్ని సొసైటీ సభ్యులు కొందరు ఓ స్పోర్ట్స్ సెంటర్కు 10 ఏండ్ల కింద 25 ఏండ్ల కోసం లీజుకు ఇచ్చారు. దీంతో స్పోర్ట్స్ సెంటర్ నిర్వాహకులు పార్కు స్థలంలో బ్యాడ్మింటన్ కోర్టు, వాలీబాల్ కోర్టు, డ్రెస్ చేంజింగ్ రూమ్, వాష్రూంలు నిర్మించారు. నిర్వాహకులు జీహెచ్ఎంసీకి రెండు నెలల పాటు ఫీజులు చెల్లించి ఆ తర్వాత ఫీజులు కట్టడం మానేశారు. నాలుగు నెలల కింద కావూరి హిల్స్ సొసైటీ సభ్యులు.. కాలనీ పార్కు స్థలంలో స్పోర్ట్స్ సెంటర్ నిర్వహించడంపై చందానగర్ సర్కిల్ జీహెచ్ఎంసీ అధికారులకు కంప్లైంట్ చేశారు.
దీంతోపాటు కాలనీ అసోసియేషన్ సభ్యులు హైకోర్టుకు వెళ్లారు. కావూరిహిల్స్ పార్కులో వెలసిన అక్రమాలను తొలగించాలని హైడ్రా, జీహెచ్ఎంసీని హైకోర్టు ఆదేశించింది. దీంతో సోమవారం జీహెచ్ఎంసీ, హైడ్రా అధికారులు పార్కు స్థలంలోని టెన్నిస్ కోర్టు, వాలీబాల్ కోర్టు, డ్రెస్ చేంజింగ్ రూమ్, వాష్రూంలను కూల్చివేశారు. కూల్చివేతల సందర్భంగా పోలీసులు బందోబస్తు కల్పించారు. తాము పార్కు స్థలాన్ని 25 ఏండ్లపాటు లీజుకు తీసుకున్నామని, లీజు గడువు ముగియక ముందే కూల్చేయడం ఏమిటని స్పోర్ట్స్ సెంటర్ నిర్వాహకులు అడ్డుకునే ప్రయత్నం చేశారు. కూల్చివేతలు పూర్తయిన తర్వాత చందానగర్ సర్కిల్ టౌన్ ప్లానింగ్ అధికారులు అక్కడ ‘జీహెచ్ఎంసీ పార్కు స్థలం 1’ అంటూ సూచిక బోర్డులు ఏర్పాటు చేశారు.
కోర్టు ఆదేశాలతోనే : హైడ్రా కమిషనర్ రంగనాథ్
‘‘మాదాపూర్ కావూరి హిల్స్ పార్కు స్థలంలో వెలసిన నిర్మాణాలపై చర్యలు తీసుకోవాలని కాలనీ అసొసియేషన్ సభ్యులు హైకోర్టుకు వెళ్లారు. ఆ నిర్మాణాలను కూల్చేయాలని హైకోర్టు ఆర్డర్ వేయడంతో సోమవారం ఉదయం జీహెచ్ఎంసీ టౌన్ ప్లానింగ్ విభాగంతో కలిసి హైడ్రా అధికారులు కావూరిహిల్స్ పార్కు స్థలంలోని మూడు షెడ్లు, టెన్నీస్ కోర్టును కూల్చేశారు” అని హైడ్రా కమిషనర్ రంగనాథ్ వెల్లడించారు. ఆక్రమణకు గురైన 2,000 గజాల స్థలాన్ని స్వాధీనం చేసుకొని, జీహెచ్ఎంసీ చందానగర్ సర్కిల్ అధికారులకు అప్పగించామని వివరించారు.
