- సిరిసిల్లలో ఘటన
- పోలీసులకు ఫిర్యాదు చేసిన ఆఫీసర్
రాజన్న సిరిసిల్ల, వెలుగు: సిరిసిల్లలో బీఆర్ఎస్ పార్టీ కౌన్సిలర్ భర్త మున్సిపల్ ఉద్యోగిపై చిందులేశాడు. ‘నీ అంతు చూస్తా.. నేను తలుచుకుంటే ట్రాన్స్ఫర్ చేయిస్తా. నాకు నచ్చకపోతే గతంలో పని చేసిన మున్సిపల్ కమిషనర్నే ట్రాన్స్ఫర్ చేయించా..ఆఫ్ట్రాల్ నువ్వో ఏఈవి. నాకు నచ్చిన పనే చేయాలే’ అని వార్నింగ్ ఇచ్చాడు. సిరిసిల్ల మున్సిపల్ ఆఫీసులో నరసింహస్వామి ఏఈ. మంగళవారం 37వ వార్డులో నిర్మాణంలో ఉన్న డ్రైనేజీ పనులను ఏఈ పరిశీలించాడు.
డిజైన్‌‌కు విరుద్ధంగా పనులున్నాయని బీఆర్ఎస్ కౌన్సిలర్ దిడ్డి మాధవి భర్త దిడ్డి రాజు దృష్టికి తీసుకెళ్లాడు. దీంతో రాజు.. ఏఈపై ఆగ్రహం వ్యక్తం చేస్తూ బెదిరింపులకు పాల్పడ్డాడు. దీంతో సదరు ఏఈ మున్సిపల్ ఉద్యోగులతో కలిసి పోలీస్స్టేషన్‌‌కు వెళ్లి కౌన్సిలర్ భర్తపై ఫిర్యాదు చేశారు. అప్పటికే అప్రమత్తమైన మున్సిపల్ చైర్మన్ భర్త జిందం చక్రపాణి ఉద్యోగులతో చర్చలు జరిపి ఏఈకి నచ్చజెప్పినట్టు సమాచారం.
