పురుషుల వన్డే వరల్డ్‌కప్‌ 2023 క్వాలిఫయర్ మ్యాచుల షెడ్యూల్‌ను ఐసీసీ మంగళవారం విడుదల చేసింది. జింబాబ్వే వేదికగా జూన్‌ 18 నుంచి జులై 9 వరకు ఈ టోర్నీ జరుగనుంది. క్వాలిఫయర్ టోర్నీలో మొత్తం 10 జట్లు పాల్గొననుండగా, రెండు గ్రూపుల నుంచి టాప్-2లో నిలిచిన జట్లు ఐసీసీ వన్డే ప్రపంచ కప్ 2023 సూపర్-10కు అర్హత సాధిస్తాయి. గ్రూప్-ఏలో జింబాబ్వే, వెస్టిండీస్‌, నెదార్లండ్స్‌, నేపాల్‌, యునైటెడ్‌ స్టేట్స్‌ ఉండగా, గ్రూప్-బిలో శ్రీలంక, ఐర్లాండ్‌, స్కాట్లాండ్‌, ఒమన్‌, యూఏఈ జట్లు ఉన్నాయి.
గ్రూప్ స్టేజులో ప్రతి జట్టు తమ గ్రూప్‌లోని మిగతా జట్లతో ఒక్కో మ్యాచ్‌ ఆడుతుంది. ఈ క్రమంలో రెండు గ్రూప్‌ల్లో టాప్- 3 స్థానాల్లో నిలిచిన 6 జట్లు సూపర్ సిక్స్ కు అర్హత సాధిస్తాయి. అనంతరం సూపర్ సిక్స్ స్టేజులో ప్రతి జట్టు కూడా గ్రూప్ దశలో ఎదురుపడని జట్లతో తలపడతాయి. అంటే.. గ్రూప్ -ఏలోని జట్లు గ్రూప్ -బిలోని జట్లతో తలపడతాయన్నమాట. ఈ మ్యాచ్‌లు అయిపోయే సరికి తొలి రెండు స్థానాల్లో ఉన్న జట్లు భారత్‌ వేదికగా జరిగే వన్డే వరల్డ్ కప్-2023కు అర్హత సాధిస్తాయి. ఇక్కడ గమనించాల్సిన విషయం ఏమిటంటే.. ప్రతి జట్టు సూపర్ సిక్స్ దశకు చేరుకోవడంలో విఫలమైన జట్లపై సాధించిన పాయింట్లను మినహాయిస్తే, గ్రూప్ దశలో సాధించిన పాయింట్లు సూపర్ సిక్స్ దశకు బదిలీ అవుతాయి.
కాగా, భారత్‌ వేదికగా ఈ ఏడాది చివర్లో జరిగే వన్డే ప్రపంచకప్‌కు 8 జట్లు ఇదివరకే అర్హత సాధించిన సంగతి తెలిసిందే. భారత్‌, న్యూజిలాండ్‌, ఇంగ్లాండ్, ఆస్ట్రేలియా, బంగ్లాదేశ్‌, పాకిస్తాన్‌, ఆఫ్ఘనిస్తాన్‌, సౌతాఫ్రికా జట్లు ప్రపంచకప్‌కు నేరుగా అర్హత సాధించాయి. మిగిన రెండు జట్లు క్వాలిఫయర్ మ్యాచుల ద్వారా అర్హత సాధిస్తాయి. ఇక ఈ మెగా టోర్నీకి సంబంధించిన షెడ్యూల్ ఇంకా విడుదల కాలేదు. త్వరలోనే విడుదల చేసేందుకు బీసీసీఐ సన్నాహాలు చేస్తోంది. అయితే టోర్నీ అక్టోబర్ 5న ఆరంభమయ్యే అవకాశం ఉన్నట్లు వార్తలు వస్తున్నాయి.
