టీమిండియా యువ బ్యాటర్, హైదరాబాదీ క్రికెటర్ తిలక్ వర్మ ఐసీసీ టీ20 ర్యాంకింగ్స్‌లో దుమ్మురేపాడు. ఏకంగా 69 స్థానాలు ఎగబాకి మూడో స్థానానికి దూసుకొచ్చాడు. తన కోసం స్థానాన్ని త్యాగం చేసిన భారత టీ20 కెప్టెన్ సూర్యను సైతం వెనక్కి నెట్టాడు.
ఈ హైదరాబాదీ క్రికెటర్ ఇటీవల సౌతాఫ్రికాతో జరిగిన టీ20 సిరీస్‌లో అదరగొట్టాడు. తొలి రెండు మ్యాచ్‌ల్లో 33, 20 స్కోర్లతో పర్వాలేదనిపించగా.. అనంతరం వరుసగా రెండు సెంచరీలు బాది ప్లేయర్‌ ఆఫ్‌ ది సిరీస్‌గా నిలిచాడు. సఫారీలతో జరిగిన 4 మ్యాచ్‌ల్లో 198 స్ట్రైక్‌రేట్‌తో 280 పరుగులు చేశాడు. ఈ ప్రదర్శనే అతన్ని టాప్ 10లోకి తీసుకొచ్చింది. తిలక్ టీ20 కెరీర్‌లో టాప్-10లోకి రావడం ఇదే మొదటిసారి.
A groundbreaking series for Tilak Varma in South Africa 🔥
— ICC (@ICC) November 17, 2024
#SAvIND pic.twitter.com/OaQZvyGyN4
22వ స్థానంలో శాంసన్
ఇదే సిరీస్‌లో రెండు వరుస శతకాలు బాదిన శాంసన్.. 17 స్థానాలు ఎగబాకి 22వ స్థానానికి చేరుకున్నాడు. మరో రెండు మ్యాచ్‌ల్లో డకౌట్ కావడం అతని ర్యాంకింగ్స్‌ను బాగా దెబ్బతీసింది. ఆ మ్యాచ్‌ల్లో సంజూ 30 పరుగుల చొప్పున చేసున్నా.. టాప్-10లోకి దూసుకొచ్చేవాడు.
Also Read :- ఇదొక పిచ్చి నిర్ణయం.. మెగా ఆక్షన్ తేదీలపై దిగ్గజ క్రికెటర్లు విమర్శలు
అగ్రస్థానంలో హెడ్
ఈ జాబితాలో ఆస్ట్రేలియా ఓపెనర్ ట్రావిస్ హెడ్(855 పాయింట్లు), ఇంగ్లండ్ ఓపెనర్ ఫిల్ సాల్ట్(828 పాయింట్లు) తొలి రెండు స్థానాల్లో ఉన్నారు. భారత బ్యాటర్లలో యశస్వి జైస్వాల్ 8, రుతురాజ్‌ గైక్వాడ్ 15వ స్థానంలో ఉన్నారు.
