- నేను వ్యక్తిగత ఆరోపణలకు దిగితే... రోడ్ల మీద తిరగలేవు
నల్గొండ, వెలుగు : ‘‘నేను వ్యక్తిగత ఆరోపణలకు దిగితే.. నువ్వు (మంత్రి కోమటిరెడ్డి వెంకట్ రెడ్డి) రోడ్ల మీద తిరగలేవు. రైతుబంధు అడిగితే చెప్పుతో కొడతామంటారా? మంత్రిపదవి ఇచ్చింది అందుకేనా?” అని మంత్రి కోమటిరెడ్డి వెంకట్ రెడ్డి పై బీఆర్ఎస్ నేత జగదీశ్ రెడ్డి ఫైర్ అయ్యారు. శనివారం నల్గొండలో మీడియాతో ఆయనతో మాట్లాడారు. ఎన్నికల్లో ఇచ్చిన హామీలను నెరవేర్చడం చేతగాక మాజీ సీఎం కేసీఆర్పై నెపెం నెడుతున్నారని విమర్శించారు.
నాగార్జునసాగర్ ఎడమ కాల్వ నీళ్లను ఏపీ తరలించుకుపోతుంటే హారతులు పట్టిన ద్రోహులు కాంగ్రెస్ నేతలని ధ్వజమెత్తారు. కాంగ్రెస్ పార్టీ 420 హామీలు ఇచ్చిందని, ఆ హామీల్లో నెరవేర్చింది ఒక్కటే అని పేర్కొన్నారు. అది కూడా మహాలక్ష్మి పథకాన్ని అమలు చేసి పంచాయితీకి తెరతీసిందన్నారు. మిగతా హామీల గురించి నిలదీస్తే నోటికొచ్చినట్టు మాట్లాడుతున్నారన్నారు. ఎస్సారెస్పీలో నీళ్లు ఉన్నా ఇవ్వలేకపోతున్నారని మండిపడ్డారు. త్వరలో కేసీఆర్ బయటకు వస్తారని చెప్పారు. ఈ సమావేశంలో మాజీ ఎమ్మెల్యేలు భాస్కర్రావు, కంచర్ల భూపాల్ రెడ్డి, రవీంద్ర కుమార్, గాదరి కిశోర్ కుమార్, జడ్పీ చైర్మన్ బండా నరేందర్ రెడ్డి తదితరులు పాల్గొన్నారు.
