- ప్రాజెక్టుతో పాటు కాల్వల మరమ్మతులపైనా దృష్టి పెట్టండి
- రాష్ట్రంలో పనిచేయని 334 లిఫ్టులనూ బాగు చేయాలి
- నెల్లికల్ లిఫ్ట్ను రెండు దశల్లో పూర్తి చేయండి
- ఫేజ్1లో వచ్చే ఖరీఫ్ నాటికి 7,600 ఎకరాలకు నీళ్లివ్వాలని అధికారులకు ఆదేశం
- జానారెడ్డి, ఎంపీ రఘువీర్ రెడ్డి, ఎమ్మెల్యే జైవీర్ రెడ్డితో కలిసి ఉత్తమ్రివ్యూ
హైదరాబాద్, వెలుగు: నాగార్జునసాగర్డ్యామ్ స్పిల్వేపై పడిన గుంతలపై ఐఐటీ రూర్కీతో అధ్యయనం చేయించాలని అధికారులను ఇరిగేషన్ శాఖ మంత్రి ఉత్తమ్ కుమార్ రెడ్డి ఆదేశించారు. ఐఐటీ రూర్కీ టీమ్ ఇచ్చే రిపోర్ట్ఆధారంగా స్పిల్వేకి మరమ్మతులు చేయించాలని సూచించారు. రాష్ట్రంలోని వ్యవసాయ అవసరాలను తీర్చేందుకు సాగర్ ప్రాజెక్టును దాని సామర్థ్యం మేరకు వినియోగించుకోవాల్సిన అవసరం ఉందని చెప్పారు. మంగళవారం ఆయన ఇరిగేషన్ శాఖ అధికారులతో సాగర్ ప్రాజెక్టుతో పాటు నాగార్జునసాగర్ నియోజకవర్గంలోని వివిధ లిఫ్ట్ స్కీములపై సమీక్ష చేశారు.
ఈ సమావేశంలో మాజీ మంత్రి జానా రెడ్డి, నల్గొండ ఎంపీ రఘువీర్ రెడ్డి, నాగార్జునసాగర్ ఎమ్మెల్యే జైవీర్ రెడ్డి, ఇరిగేషన్ సెక్రటరీ రాహుల్ బొజ్జా ఉన్నతాధికారులు పాల్గొన్నారు. ఈ సందర్భంగా సాగర్ ప్రాజెక్టు, కాల్వలకు మరమ్మతులను ప్రాధాన్యంగా తీసుకోవాలని అధికారులను మంత్రి ఉత్తమ్ ఆదేశించారు. నల్గొండ జిల్లాలోని వివిధ ఇరిగేషన్ ప్రాజెక్టులకు సంబంధించి భూసేకరణను వేగవంతం చేయాల్సిందిగా కలెక్టర్కు ఆదేశాలిచ్చారు. ప్రాజెక్టులను టైమ్కు పూర్తి చేయాల్సిన అవసరం ఉందని, ఆ పనుల పురోగతికి భూసేకరణ అడ్డంకిగా మారకూడదని సూచించారు.
అన్ని లిఫ్టులనూ బాగు చేయండి
రాష్ట్రంలో 334 లిఫ్ట్ స్కీములు పూర్తిగా లేదా పాక్షికంగా పనిచేయడం లేదని, వాటి కింద 4,69,138 ఎకరాల ఆయకట్టు ఉందని మంత్రి ఉత్తమ్ చెప్పారు. వాటిని బాగు చేసి పునరుద్ధరించాలని అధికారులను ఆదేశించారు. ముఖ్యంగా చిన్న లిఫ్టు స్కీములపై దృష్టి సారించాలని, నిధుల కేటాయింపులో ప్రాధాన్యం ఇవ్వాలని సూచించారు. పెద్ద లిఫ్ట్లకు ఖర్చు ఎక్కువ అవుతుందని, తక్కువ ఖర్చుతో చేపట్టే చిన్న లిఫ్టులతో ఎక్కువ లబ్ధి చేకూరుతుందన్నారు.
నల్గొండ జిల్లాలోని 39 లిఫ్టులను రిపేర్ చేయాలని, అందుకు అంచనాలను సిద్ధం చేయాలని అధికారులను ఆదేశించారు. నెల్లికల్ లిఫ్టు పనులను వేగవంతం చేయాలన్నారు. రెండు దశలుగా పనులు చేపట్టాలన్నారు. 24,624 ఎకరాలకు నీళ్లందించే ఈ ప్రాజెక్టును రూ.664.8 కోట్లతో ప్రభుత్వం చేపడుతున్నదని, ఫేజ్ 1లో భాగంగా వచ్చే ఖరీఫ్ సీజన్లో 7,600 ఎకరాలకు నీళ్లిచ్చేలా ప్రాజెక్టు పనులను పూర్తి చేయాలన్నారు.
లింక్ కెనాల్ను పూర్తి చేయండి
సాగర్ హైలెవెల్, లోలెవెల్ కెనాల్ను కలిపే లింక్ కెనాల్పనులను చేపట్టాలని మంత్రి ఉత్తమ్ఆదేశించారు. మేదవరం, పోతునూరు, సంగారం, పెద్దవూర, తుంగతుర్తి చెరువులను కలుపుతూ సాగే ఈ కెనాల్పనులకు రూ.62.26 కోట్లు ఖర్చవుతాయని, అందుకు అవసరమైన 65.02 ఎకరాల భూమిలో ఇప్పటికే 43.31 ఎకరాలను సేకరించామని తెలిపారు. దానికి వెంటనే టెండర్లను పిలవాలన్నారు. ఏఎంఆర్పీలో లెవెల్కెనాల్డిస్ట్రిబ్యూటరీలను కాంక్రీట్ లైనింగ్తో పటిష్టపరచాలని అధికారులను ఆదేశించారు.
డీ1 నుంచి డీ27 డిస్ట్రిబ్యూటరీల వరకు 6 సెంటీమీటర్ల మందంతో కాంక్రీట్ లైనింగ్ వేయాలని, 90.43 కిలోమీటర్ల మేర చేపట్టే ఈ పనులకు రూ.42.26 కోట్లు ఖర్చవుతుందని పేర్కొన్నారు. నాగార్జునసాగర్ లో లెవెల్ మెయిన్ కెనాల్(వరద కాల్వ)ను 63 కిలోమీటర్ల వరకు సీసీ లైనింగ్తో పటిష్టపరచాలన్నారు. అందుకు రూ.125 కోట్లు ఖర్చవుతుందని అంచనా వేశారు. ఈ వరద కాల్వ కింద సాగర్, మిర్యాలగూడ, నల్గొండ నియోజకవర్గాల్లో 80 వేల ఎకరాలకు నీరు అందుతుందని చెప్పారు. కాగా, అనుములవారిగూడెంలో శశిలేరువాగుపై చెక్డ్యామ్ను నిర్మించేందుకు చర్యలు చేపట్టాలన్నారు.
