- బీఆర్ఎస్ సర్కార్ను కూకటి వేళ్లతో పెకిలిస్తం: రాహుల్
- ధరణితో పేదల భూములను కల్వకుంట్ల ఫ్యామిలీ గుంజుకుంది
- కేసీఆర్ చదువుకున్న స్కూల్, కాలేజీ కూడా కాంగ్రెస్సే కట్టింది
- వరంగల్, నర్సంపేట, మణుగూరు కార్నర్ మీటింగ్స్లో ప్రసంగం
వరంగల్/నర్సంపేట/భద్రాద్రికొత్తగూడెం/మణుగూరు, వెలుగు: కేసీఆర్ దోచుకున్న ప్రతి పైసాను రాష్ట్రంలో తాము అధికారంలోకి రాగానే కక్కిస్తామని కాంగ్రెస్ ముఖ్యనేత రాహుల్ గాంధీ అన్నారు. ఆ సొమ్ముతోనే ఆరు గ్యారంటీ స్కీములు అమలు చేస్తామని స్పష్టం చేశారు. రాష్ట్రంలో కాంగ్రెస్ తుఫాన్ నడుస్తున్నదనే విషయం కేసీఆర్కు అర్థమైందని, అతిపెద్ద తుఫాన్ముందుందని అన్నారు. ‘‘తెలంగాణతో మాది రక్త సంబంధం.. కేసీఆర్ది రాజకీయ సంబంధం. ప్రజల కోసం సోనియా గాంధీ తెలంగాణ ఇస్తే.. రాష్ట్ర సంపద మొత్తం ఒకే కుటుంబానికి చేరింది” అని తెలిపారు.
శుక్రవారం వరంగల్ జిల్లా నర్సంపేట, వరంగల్ సిటీలో, కొత్తగూడెం జిల్లా మణుగూరులో కార్నర్ మీటింగ్స్లో రాహుల్ గాంధీ మాట్లాడారు. బీఆర్ఎస్ అవినీతికి కాళేశ్వరం ప్రాజెక్టు పరాకాష్ట అని మండిపడ్డారు. ‘‘ప్రాజెక్టులో పగుళ్లు కనిపిస్తున్నయ్‍. గోడలు పగిలిపోతున్నయ్. పిల్లర్లు కూలిపోతున్నయ్‍. ఎందుకంటే.. అక్కడ అవినీతి రాజ్యమేలుతున్నది కాబట్టి. ఒక్క కాళేశ్వరం ప్రాజెక్టుతోనే కేసీఆర్ ఫ్యామిలీ రూ.లక్ష కోట్ల ప్రజాధనాన్ని దోచుకుంది” అని ఆరోపించారు. కాంగ్రెస్ ప్రభుత్వం రాగానే కేసీఆర్ అవినీతి సొమ్మును బయటకు తీసి, ప్రజలకు ఇస్తామని చెప్పారు.
ధరణితో 20 లక్షల మందికి గోస
ధరణి పోర్టల్‍ తీసుకొచ్చి పేదల భూములను కేసీఆర్, ఆయన కుటుంబ సభ్యులు, బీఆర్‍ఎస్లీడర్లు అక్రమంగా వాళ్ల వాళ్ల పేర్ల మీద రాయించుకున్నారని, ధరణితో రాష్ట్రంలోని 20 లక్షల మంది నష్టపోయారని రాహుల్ గాంధీ అన్నారు. ‘‘కాంగ్రెస్ ప్రభుత్వం ఏం చేసిందని పదేపదే కేసీఆర్ అడుగుతున్నడు. ఆయన చదువుకున్న స్కూల్, కాలేజీ, యూనివర్సిటీని కూడా కట్టింది కాంగ్రెస్ ప్రభుత్వమే అని గుర్తుంచుకోవాలి” అని చెప్పారు.
బీఆర్ఎస్ ఎమ్మెల్యేలు కేసీఆర్ బాటలోనే నడుస్తున్నారని, దళితబంధు లబ్ధిదారుల నుంచి రూ.3 లక్షలు లంచం తీసుకున్నారని రాహుల్ ఆరోపించారు. ‘‘రాష్ట్రంలో ప్రభుత్వ ఉద్యోగులకు టైమ్కు జీతాలు కూడా సర్కారు ఇవ్వడం లేదు. కేసీఆర్ఎన్ని డబుల్‍ బెడ్రూం ఇండ్లు కట్టిండో.. ఎంతమందికి ఉచితంగా ఎరువులు పంపిణీ చేసిండో చెప్పాలి” అని నిలదీశారు.
ఎంఐఎం లీడర్లకు ఒక్కోచోట ఒక్కో రేటు..
బీజేపీ, బీఆర్‍ఎస్కు ఎంఐఎం సహకరిస్తున్నదని రాహుల్ ఆరోపించారు. ‘‘మహారాష్ట్ర, అస్సాం, రాజస్థాన్‍, గుజరాత్‍ రాష్ట్రాల్లో బీజేపీ గెలిచేలా.. కాంగ్రెస్ అభ్యర్థులపై ఎంఐఎం తమ క్యాండేట్లను పోటీలో పెట్టింది. బీజేపీ వద్ద పైసలు తీసుకుని.. కాంగ్రెస్కు వ్యతిరేకంగా ఎంఐఎం లీడర్లు పనిచేస్తరు. ఒక్కో రాష్ట్రంలో ఒక్కో రేటు తీసుకుంటరు” అని దుయ్యబట్టారు. కేసీఆర్ వెనుక మోదీ ఉన్నారని ఆరోపించారు. ‘‘ఈ అసెంబ్లీ ఎన్నికల్లో తెలంగాణ నుంచి బీఆర్ఎస్ పార్టీని, కేసీఆర్‍ను.. పార్లమెంట్ ఎన్నికల్లో నరేంద్ర మోదీ సర్కారును కూకటి వేళ్లతో పెకిలించడం మా ప్రధాన లక్ష్యం” అని రాహుల్ చెప్పారు.
బీజేపీ సైగ చేస్తే.. బీఆర్ఎస్ ఎంపీలు సైలెంట్
బీజేపీ, బీఆర్ఎస్ వేర్వేరు కాదని రాహుల్గాంధీ ఆరోపించారు. ‘‘బీజేపీ, బీఆర్ఎస్ నేతలు ఢిల్లీలో, తెలంగాణలో ఒకరికొకరు సాయం చేసుకుంటున్నరు. పార్లమెంట్‍లో వాళ్ల బంధాన్ని నేను స్వయంగా చూసిన. బీఆర్ఎస్ ఎంపీలను బీజేపీ ఎంపీలు కండ్లతో కట్టడి చేసేవాళ్లు. పెద్ద నోట్ల రద్దు, రైతు బిల్లు వంటి ప్రధాన బిల్లులు సభలోకి వచ్చాక బీజేపీ, ప్రధాని మోదీ టీమ్సైగలు చేయగానే బీఆర్‍ఎస్ఎంపీలు ఏమీ మాట్లాడేవాళ్లు కాదు” అని అన్నారు. ఆ రెండు పార్టీలపై తమ పోరాటం ఆగదని చెప్పారు. దేశానికి ఆర్‍ఎస్‍ఎస్‍, బీజేపీతో పెద్ద ప్రమాదం ఉందని, విద్వేషాలు రెచ్చగొట్టడం వాటి నైజమని దుయ్యబట్టారు. ప్రేమ విత్తనాలు నాటేందుకు కాంగ్రెస్ ప్రయత్నిస్తున్నదని, అది కాంగ్రెస్డీఎన్‍ఏలోనే ఉందని ఆయన అన్నారు.
