ఖమ్మం టౌన్/ఫొటోగ్రాఫర్ , వెలుగు : ఖమ్మం బల్లేపల్లి లోని ఎస్ఎఫ్ఎస్ పాఠశాలలో విక్రమ్ సారాబాయ్ సైన్స్ ప్రాంగణంలో రెండు రోజులపాటు జరిగే జిల్లా స్థాయి విద్యా వైజ్ఞానిక , ఇన్స్పైర్ ప్రదర్శనలు సోమవారం ప్రారంభమయ్యాయి. ముఖ్యఅతిథిగా అడిషనల్ కలెక్టర్ శ్రీనివాస్ రెడ్డి హాజరయ్యారు. ఈ సందర్భంగా ఆయన మాట్లాడారు. ప్రతి విద్యార్థి ప్రశ్నించే గుణాన్ని పెంపొందించుకొని, సైంటిఫిక్గా ఆలోచించాలని సూచించారు. ఆదిమానవుల నుంచి నేటి వరకు అన్ని ఆవిష్కరణలకు సైన్స్ కారణం అన్నారు.
అనంతరం మానవ ప్రగతికి కారణమైన చక్రం, నిప్పు, ఇంజన్ మొదలైన అంశాలతో మేడసాని శేషగిరిరావు రచించిన పాటకు విద్యార్థుల డ్యాన్స్ బాగుందని అభినందించారు. ఈ ప్రదర్శనలో వివిధ పాఠశాల నుంచి వచ్చిన విద్యార్థులు 530 ఎక్జిబిట్ లు , 119 ఇన్స్పైర్ ఎగ్జిబిట్లను ప్రదర్శించారు. ఈ కార్యక్రమంలో మేయర్ పునుకొల్లు నీరజ డీఈఓ సోమశేఖర శర్మ , అర్బన్ మండల విద్యాధికారి కేవీ శైలజా లక్ష్మి పాల్గొన్నారు.
