భద్రాచలం, వెలుగు : సీతారామచంద్రస్వామి దేవస్థానంలో గురువారం సీతారాముల కల్యాణం వైభవంగా జరిగింది. కర్నాటక రాష్ట్రం తిరునారాయణపురం మేల్కోట దివ్యదేశం యదుగిరి యతిరాజ మఠం నారాయణ జీయర్ స్వామీజీ సీతారాముల దర్శనం అనంతరం నిత్య కల్యాణంలో పాల్గొన్నారు. ఆయనకు దేవస్థానం అర్చకులు ఘనంగా స్వాగతం పలికారు. గర్భగుడిలో ప్రత్యేక పూజలు అనంతరం లక్ష్మీతాయారు అమ్మవారి సన్నిధిలో ఆయనకు వేదాశీర్వచనం ఇచ్చి ప్రసాదం, జ్ఞాపికలను అందజేశారు.
ఈ సందర్భంగా బేడా మండపంలో నిత్య కల్యాణం జరగ్గా భక్తులతో పాటు నారాయణ జీయర్స్వామీజీ కూడా పాల్గొన్నారు. విశ్వక్షేన పూజ, పుణ్యాహవచనం, రక్షాబంధం, కంకణధారణ, యజ్ఞోపవీతం, జీలకర్రబెల్లం, మాంగల్యధారణ, తలంబ్రాల వేడుక అనంతరం మంత్రపుష్పం సమర్పించాక క్రతువు ముగిసింది. భక్తులకు తీర్థగోష్టి నిర్వహించారు. మాధ్యాహ్నిక ఆరాధన తర్వాత సాయంత్రం దర్బారుసేవ జరిగింది.
