- మార్కెట్ల నిర్మాణ పనులు పిల్లర్లు దాటుతలే!
- జిల్లాలోని అన్ని మున్సిపాలిటీల్లో డెడ్ స్లో..
- ఫండ్స్ కొరతతో పలుచోట్ల ఆగిన నిర్మాణాలు
- ఏండ్లు దాటుతున్నా.. నిర్మాణ పనులు ఏడియాడనే..
- సౌలత్లు లేక ఇబ్బందులు పడుతున్నామంటున్న రైతులు, చిరు వ్యాపారులు
కామారెడ్డి, వెలుగు : జిల్లాలో మున్సిపాలిటీల్లో చేపట్టిన ఇంటిగ్రేటెడ్ మార్కెట్ కాంప్లెక్స్ నిర్మాణ పనులు డెడ్ స్లోగా జరుగుతున్నాయి. పనులు త్వరగా పూర్తయి వినియోగంలోకి వస్తే కూరగాయలు, ఇతర వస్తువులు అమ్ముకోవడానికి ఈజీ అవుతుందని భావించిన రైతులు, చిరు వ్యాపారులకు నిరాశే మిగులుతోంది. ఫండ్స్కొరతతోనే పనుల్లో ఆలస్యం జరుగుతుందని కాంట్రాక్టర్లు చెప్తున్నారు.
జిల్లాలోని ప్రతి మున్సిపల్ కేంద్రంలో పట్టణ ప్రజల అవసరాలకనుగుణంగా ఇంటిగ్రేటెడ్ వెజిటేబుల్, నాన్ వెజిటేబుల్ మార్కెట్ కాంప్లెక్స్ల నిర్మాణం చేపట్టాలని ప్రభుత్వం నిర్ణయించింది. వాటి నిర్మాణానికి మున్సిపాలిటీలకు కేటాయించిన ఫండ్స్వినియోగించాలని సూచించింది. దీంతో మున్సిపల్అధికారులు జిల్లాలోని కామారెడ్డి, బాన్స్వాడ, ఎల్లారెడ్డి మున్సిపాలిటీల్లో ఇంటిగ్రేటెడ్ మార్కెట్ కాంప్లెక్స్ల నిర్మాణం చేపట్టారు. టీయూఎఫ్ఐడీసీ కింద వచ్చిన ఫండ్స్, సీఎం స్పెషల్గా శాంక్షన్ చేసే డెవలప్మెంట్ ఫండ్స్తో ఈ కాంప్లెక్సులు నిర్మిస్తున్నారు. కామారెడ్డి మున్సిపాలిటీలో రూ. 7.20 కోట్లతో, బాన్స్వాడ, ఎల్లారెడ్డిలో రూ. 2కోట్ల చొప్పున ఫండ్స్తో పనులు షురూ చేశారు. ప్రభుత్వం ఇచ్చిన స్పెషల్ ఫండ్స్ సరి పోకపోతే మున్సిపాలిటీ ఫండ్స్కూడా వినియోగించుకుని అన్ని రకాల వసతులు కల్పించాలని సూచించారు. ఆయా చోట్ల పనులు చేపట్టి ఏండ్లు దాటుతున్నా.. ఇంకా పిల్లర్ల దశ దాటడం లేదు.
ప్రస్తుత మార్కెట్లో రైతుల అవస్థలు
ప్రస్తుతం డెయిలీ మార్కెట్లో సరైన సౌలత్లు లేక రైతులు అవస్థలు పడుతున్నారు. రోడ్లపై కూర్చొని కూరగాయలు అమ్ముకుంటున్నారు. గంజు ఆవరణలో ఇప్పటికే నిర్మించిన రైతు బజార్ను కూడా అధికారులు తెరవడం లేదు. దీంతో కొనుగోలుదారులు, చిరు వ్యాపారులు ఇబ్బందులు పడుతున్నారు. ఎల్లారెడ్డిలో రూ. 2 కోట్లతో చేపట్టిన మార్కెట్ కాంప్లెక్స్ పనులు ఏడాది కాలంగా ఫిల్లర్ల దశలోనే ఉన్నాయి. బాన్స్వాడలో శ్లాబ్పనులు జరుగుతున్నాయి.
వసతులు లేక ఇబ్బందులు
డెయిలీ మార్కెట్లో కూరగాయల అమ్ముతున్నాం కానీ.. సౌలత్లు లేక ఇబ్బంది పడుతున్నం. రోడ్లపై కూర్చొనే కూరగాయలు అమ్ముకుంటున్నాం. ఎండా కాలం షురూ కావడంతో ఎక్కువ సేపు కూరగాయలు అమ్మలేక పోతున్నాం. కూరగాయలు కూడా వాడిపోతున్నాయి. పెద్ద మార్కెట్ పనులు తొందరగా పూర్తి చేయాలె.
- శ్రీనివాస్, రైతు
2001లో శంకుస్థాపనలు..
కామారెడ్డి పట్టణంలో గంజు ఏరియాలో మార్కెట్ కాంప్లెక్స్ నిర్మాణానికి 2021 మార్చి 28న స్థానిక ఎమ్మెల్యే శంకుస్థాపన చేశారు. మార్కెట్యార్డ్లోని షెడ్లను తొలగించి ఇంటిగ్రేటెడ్ కాంప్లెక్స్నిర్మాణం చేపట్టారు. ఏడాదిన్నర కావస్తున్నా.. పనులు మాత్రం సగం కూడా కాలేదు. పిల్లర్లు వేసి శ్లాబ్ వేయకుండానే వదిలేశారు. రూ.7.20 కోట్ల అంచనా వ్యయంతో టీయూఎఫ్ఐడీసీ ఫండ్స్ రూ.4.50 కోట్లు, మిగతా రూ.2.70 కోట్లు మున్సిపాల్టీ జనరల్ ఫండ్స్ ఉన్నాయి. ఇప్పటి వరకు జరిగిన పనులకు బిల్స్కూడా రాలేదని కాంట్రాక్టర్లు చెప్తున్నారు. దీంతో ఆరు నెలలుగా పనులను పూర్తిగా ఆపేశామని చెప్తున్నారు.
