మహబూబ్నగర్లో అప్​గ్రేడ్ చేసి వదిలేసిన్రు.. సీహెచ్​సీలు, వంద పడకల హాస్పిటల్స్​లో.. పూర్తి స్థాయిలో అందని వైద్యం

•     క్యాడర్​ పోస్టులు శాంక్షన్​ చేయలే 
•        వేధిస్తున్న డాక్టర్ల కొరత
•     సిబ్బంది లేక రూమ్స్​కే పరిమితమైన ఎక్విప్​మెంట్స్​

మహబూబ్​నగర్, వెలుగు: ప్రతి నియోజకవర్గానికి వంద పడకల దవాఖానాను కట్టిస్తామని గత ప్రభుత్వం ప్రకటించింది. ఈ మేరకు కొన్ని నియోజకవర్గాల్లో హాస్పిటల్స్​ను కట్టించింది. కానీ, సరిపడా సిబ్బందిని కేటాయించలేదు. క్యాడర్​ పోస్టులను శాంక్షన్​ చేయలేదు. అప్​గ్రేడ్​ కాకముందు ఉన్న పీహెచ్​సీ స్టాఫ్​నే కేటాయించారు. తగినంత స్టాఫ్​ లేకపోవడంతో సరైన వైద్యం అందడం లేదు. మరికొన్ని నియోజకవర్గాల్లో బిల్డింగులకు భూమిపూజ చేసినా.. ఇంత వరకు పనులు స్టార్ట్​ చేయలేదు.

రెండేండ్లు కావస్తున్నా..

మహబూబ్​నగర్​ జిల్లా బాలానగర్, కోయిల్​కొండ​పీహెచ్​సీలను సివిల్​ హాస్పిటల్స్​గా అప్​గ్రేడ్​ చేస్తూ ఎనిమిదేండ్ల కింద ఉత్తర్వులు జారీ అయ్యాయి. వీటిని డెవలప్​​చేసేందుకు రూ.2.20 కోట్ల చొప్పున ఫండ్స్​ మంజూరు చేశారు. ఐదేండ్ల వరకు బిల్డింగ్​ పనులు కొనసాగాయి. గత ఏడాది జనవరి 18న ఆ బిల్డింగ్​లకు అప్పటి హెల్త్​ మినిస్టర్​ హరీశ్​రావు ప్రారంభించారు. బాలానగర్​ హాస్పిటల్  వైద్య విధాన పరిషత్​ ఆధ్వర్యంలో నడుస్తుండగా ఇంత వరకు అవసరం మేర​డాక్టర్లను నియమించలేదు. 

ఈ హాస్పిటల్​లో ఆరుగురు  రెగ్యులర్​ డాక్టర్లు, ఇద్దరు స్టాఫ్​ నర్సులు, ఆరుగురు నర్సులు, ఇద్దరు ల్యాబ్​ టెక్నీషియన్లు, ఇద్దరు అటెండర్లతో కలిసి 16 మంది ఉండాలి. కానీ, ఇంత వరకు ఎవరినీ అలాట్​ చేయలేదు. ఈ హాస్పిటల్​ను ప్రారంభించి రెండేండ్లు కావస్తున్నా ఉన్నతాధికారుల​నుంచి సిబ్బంది కేటాయింపుపై ఉత్తర్వులు రాలేదు. ప్రస్తుతం షాద్​నగర్​ నుంచి ఐదుగురు డాక్టర్లు, ఐదుగురు సిబ్బంది డిప్యుటేషన్​పై వచ్చి వెళ్తున్నారు. కోయిల్​కొండ కమ్యూనిటీ హెల్త్​ సెంటర్​లోనూ చాలీచాలని సిబ్బందితో నెట్టుకొస్తున్నారు. 

జడ్చర్లలోనూ అదే పరిస్థితి..

వైద్యారోగ్య శాఖ మంత్రిగా ఉన్న సమయంలో సి.లక్ష్మారెడ్డి జడ్చర్ల హాస్పిటల్​ను వంద పడకల హాస్పిటల్​గా అప్​గ్రేడ్​ చేసేందుకు 2017లో ఉత్తర్వులు జారీ చేశారు. 2021లోనే పనులు పూర్తయ్యాయి. నాలా పక్కనే హాస్పిటల్​ను కట్టడంతో ఆ ఏడాది వచ్చిన వర్షాలకు హాస్పిటల్​లోకి వర్షపు నీరు వచ్చి చేరింది. దీంతో కొన్నాళ్లు ఓపెనింగ్​ను వాయిదా వేశారు. 

అసెంబ్లీ ఎన్నికలు రావడంతో మే 5న లక్ష్మారెడ్డితో కలిసి అప్పటి మినిష్టర్​ హరీశ్ రావు దీన్ని ఓపెన్​ చేశారు. ఈ హాస్పిటల్​ను వంద పడకలకు అప్​గ్రేడ్​చేసినా ఇంత వరకు డాక్టర్లు, సిబ్బందిని అలాట్​ చేయలేదు. ప్రస్తుతం 13 మంది డాక్టర్లు మాత్రమే ఉన్నారు. వీరిలో ముగ్గురు ఔట్​ సోర్సింగ్​ కింద పని చేస్తున్నారు. మిగతా సిబ్బందిని అలాట్​ చేయలేదు. ఇక మార్చురీ రూమ్​ పనులు కంప్లీట్​ చేయలేదు. ఈ విషయంపై హాస్పిటల్​ సిబ్బంది సోమవారం జడ్చర్ల ఎమ్మెల్యే జనంపల్లి అనిరుధ్​రెడ్డికి వినతిపత్రం అందజేశారు. హాస్పిటల్​లో సిబ్బంది కొరత తీర్చాలని కోరారు.

శంకుస్థాపనకే పరిమితం..

మక్తల్ నియోజకవర్గ కేంద్రంలో ఇప్పటి వరకు వంద పడకల హాస్పిటల్​ నిర్మించలేదు. గతంలోనే స్థలాన్ని కేటాయించినా అప్పటి ప్రభుత్వం నిర్లక్ష్యంతో పనులు స్టార్ట్​ చేయలేదు. వాస్తవానికి ఇక్కడ 150 పడకల హాస్పిటల్​ కట్టాల్సి ఉంది. అందులో 50 పడకలు పిల్లల హాస్పిటల్​ కోసం కేటాయించాలని గత ప్రభుత్వం నిర్ణయించింది. ఇందుకు గాను రూ.34 కోట్ల కేటాయించారు. కానీ, హడావుడిగా ఎన్నికలకు ముందు అక్టోబరు 7న అప్పటి మంత్రి హరీశ్​రావు భూమిపూజ చేశారు. అదే రోజు దేవరకద్రలోనూ వంద పడకల హాస్పిటల్​ నిర్మాణానికి భూమిపూజ చేయాల్సి ఉన్నా, ఈ ప్రోగ్రాంను  క్యాన్సిల్​ చేశారు. 

రూమ్స్​కు తాళాలు..

వంద పడకల హాస్పిటల్స్, సర్టిఫైడ్​ హాస్పిటల్స్​కు టీఎస్ ఎంఐడీసీ రెగ్యులర్​ నార్మ్స్​ ప్రకారం ఎక్విప్​మెంట్​ను పంపిస్తోంది. ఇందులోభాగంగానే హాస్పిటల్స్​ ఓపెనింగ్​కు ముందే వీటిని పంపారు. కానీ, సరిపడా సిబ్బంది లేకపోవడంతో ఈ ఎక్విప్​మెంట్లను ఉపయోగించడం లేదు. దీంతో ఈ ఎక్విప్​మెంట్లను భద్రపర్చిన గదులకు తాళాలు వేశారు. వాడుకలో లేకపోవడంతో ఆ పరికరాలన్ని తుప్పు పడుతున్నాయి. కోట్లు పెట్టి కొన్న పరికరాలు నిరుపయోగంగా మారాయి. ఇప్పటికైనా అధికారులు స్పందించి సరిపడా సిబ్బందిని కేటాయించాల్సిన అవసరం ఉంది.