అపస్మారకస్థితిలోకి వెళ్లి యువకుడు మృతి
నలుగురు మహిళల అరెస్ట్
శంషాబాద్ పరిధిలో ఆలస్యంగా వెలుగులోకి ఘటన
శంషాబాద్, వెలుగు: మద్యానికి బానిసైన ఓ యువకుడు కాలనీలోని మహిళలతో అసభ్యంగా ప్రవర్తిస్తున్నాడని కొట్టడడంతో తీవ్రంగా గాయపడి చనిపోయిన ఘటన ఆర్జీఐఏ పోలీస్ స్టేషన్ పరిధిలో ఆలస్యంగా వెలుగులోకి వచ్చింది. ఆర్జీఐఏ పీఎస్ ఇన్ స్పెక్టర్ బాలరాజు తెలిపిన ప్రకారం.. రంగారెడ్డి జిల్లా శంషాబాద్ మున్సిపల్ పరిధి ప్రకాశ్నగర్ కాలనీకి చెందిన రాచమల్ల శివకుమార్(35), ఇంటివద్దనే కుటుంబ సభ్యులతో వేరుగా ఉంటూ మద్యానికి బానిసగా మారాడు.
అతడు తన కుటుంబ సభ్యులతో పాటు కాలనీలోని మహిళలతో అసభ్యకరంగా ప్రవర్తిస్తూ ఇబ్బంది పెడుతున్నాడు. ఒంటిపై బట్టలు తీసి భయబ్రాంతులకు గురి చేస్తున్నాడు. అతని చేష్టలతో విసిగిపోయిన కొందరు మహిళలు ఈనెల15న అతడిని పట్టుకుని చెట్టుకు కట్టేసి చితకబాది వెళ్లిపోయారు. దీంతో తీవ్రంగా గాయపడిన శివకుమార్ ను రెండు గంటల తర్వాత వచ్చి చూడగా అపస్మారక స్థితిలో కనిపించాడు.
డాక్టర్ తో చెక్ చేయించగా అప్పటికే మృతిచెందాడు. పోలీసులకు సమాచారం ఇవ్వగా వచ్చి డెడ్ బాడీని పోస్టుమార్టం కోసం ఉస్మానియాకు తరలించారు. కేసు నమోదు చేసిన ఎయిర్ పోర్ట్ పోలీసులు నిందితులైన నలుగురు మహిళలు పులుసు చంద్రకళ, కృష్ణవేణి, సంగీత, మహేశ్వరిని అదుపులోకి తీసుకోగా.. మరికొందరి ప్రమేయంపై దర్యాప్తు చేస్తున్నారు. గతంలో కూడా శివకుమార్ కాలనీవాసులతో పలుమార్లు గొడవపడి జైలుకు వెళ్లివచ్చాడు.
