- సీఎం టైమ్ ఇస్తే విద్యుత్ స్కామ్పై వివరాలిస్త
- అటెండర్ పేరిట రూ.2 కోట్ల స్కామ్ జరిగింది
- కామారెడ్డి ఎమ్మెల్యే కాటిపల్లి వెంకటరమణారెడ్డి
కామారెడ్డి, వెలుగు : రాష్ట్రంలో రూ. 80 వేల కోట్ల విద్యుత్ స్కామ్పై చర్చ జరుగుతోందని, ఆ శాఖలోనే అటెండర్ పేరిట రూ.2 కోట్ల మేర స్కామ్ జరిగిందని కామారెడ్డి ఎమ్మెల్యే కాటిపల్లి వెంకటరమణారెడ్డి పేర్కొన్నారు. తనకు సీఎం రేవంత్ రెడ్డి టైమ్ ఇస్తే, స్కామ్ కు సంబంధించి పూర్తి వివరాలు నేరుగా అందిస్తానన్నారు. లేకుంటే అసెంబ్లీలో ప్రస్తావించి, పత్రికాముఖంగా వివరిస్తానని చెప్పారు. ఆదివారం కామారెడ్డిలోని బీజేపీ ఆఫీసులో మీడియా సమావేశంలో రమణా రెడ్డి మాట్లాడారు. గతంలో కాంగ్రెస్ ప్రభుత్వ హయాంలో ఉచిత విద్యుత్ కోసం 14 పీపీఏలు (ఫవర్ పర్చేస్అగ్రిమెంట్లు) జరిగాయన్నారు.
అప్పుడు విద్యుత్ శాఖ మంత్రిగా షబ్బీర్అలీ ఉన్నారని ఆయన గుర్తుచేశారు. నాయక్ అనే విద్యుత్ శాఖ ఉద్యోగి.. షబ్బీర్ అలీ ఇంట్లో 18 ఏండ్లుగా పనిచేస్తున్నాడని, అలాగే మైనారిటీ శాఖకు చెందిన షాబాజ్అనే మరో ఉద్యోగి 15 ఏండ్లుగా ఆయన ఇంట్లో పనిచేస్తున్నారని చెప్పారు. ఏడుసార్లు ఓడిన వ్యక్తి వద్ద ఏ హోదాలో ఇద్దరు మనుషులకు పనిచేసే అవకాశం ఇచ్చారని రమణారెడ్డి ప్రశ్నించారు. వారికి ప్రతినెలా రూ.లక్షల్లో జీతం ఉందని, ఈ లెక్కన రూ.2 కోట్లపైనే ప్రజాధనం వృథా అయిందని ఆరోపించారు. మళ్లీ ఇప్పుడు షబ్బీర్ అలీ మంత్రిపదవి కోసం సీఎం రేవంత్ రెడ్డి చుట్టూ తిరుగుతున్నారని తెలిపారు. ప్రజారంజక పాలన అందిస్తానని చెబుతున్న రేవంత్రెడ్డి.. ఈ విషయమై ఆలోచించాలని ఆయన కోరారు.
