లేబర్ ఇన్సూరెన్స్ దందా వెనుక ఆఫీసర్ల హస్తం!

• ప్రైవేటు ఏజెంట్లను నియమించుకుని దందా
• పరిహారం అందిన తరువాత అందరికీ వాటాలు
• బ్రోకర్లపైనే యాక్షన్​.. ఆఫీసర్లపై చర్యలు తీసుకోని పోలీసులు

హనుమకొండ, వెలుగు : లేబర్​ఆఫీస్​లో కార్మికుల ఇన్సూరెన్స్ పేరుతో దందా కొనసాగుతూనే ఉంది. క్షేత్రస్థాయిలో లబ్ధిదారుల నుంచి వసూళ్లు చేపట్టి, నకిలీ చలాన్లు, లేబర్​కార్డులు సృష్టించి.. అర్హత లేకున్నా ఇన్సూరెన్స్ క్లెయిమ్స్ చేస్తున్నారు. ఇందులో బ్రోకర్లు ముఖ్య పాత్ర పోషిస్తుండగా.. తెరవెనుక ఆఫీసర్లే అంతా నడిపిస్తున్నారనే ఆరోపణలున్నాయి. అప్లికేషన్​ వచ్చింది మొదలు.. ఎంక్వైరీ, అప్రూవల్ వరకు అసిస్టెంట్​లేబర్​ఆఫీసర్లే అన్నీ చూసుకుంటున్నారు. ప్రైవేటు ఏజెంట్లను నియమించుకుని మరీ దందా సాగిస్తున్నారు. రెండ్రోజుల కిందట పరకాల ఏఎల్​వో నియమించుకున్న ఏజెంట్లు, ఇతర గ్యాంగ్​పట్టుబడడమే ఈ దందాకు సాక్ష్యంగా నిలుస్తుండగా.. మిగతా ప్రాంతాల్లోనూ ఇదే తరహా బాగోతం నడుస్తోంది.

ఏజెంట్లదే హవా..
లేబర్ కార్డు కలిగిన లబ్ధిదారుడు చనిపోతే బాధిత కుటుంబానికి ప్రభుత్వం నుంచి ఆర్థిక సహాయం అందిస్తుంటుంది. నార్మల్ డెత్ అయితే రూ.1.30 లక్షలు, యాక్సిడెంటల్​గా చనిపోతే రూ.6.30 లక్షలు చెల్లిస్తుంటుంది. లేబర్​డిపార్ట్​మెంట్ అందించే పరిహారం కోసం ఎవరైనా దరఖాస్తు పెట్టుకుంటే అసిస్టెంట్​ లేబర్​ ఆఫీసర్లు ఫీల్డ్​ విజిట్​ చేసి, లబ్ధిదారు కార్డు, డెత్​ వివరాలు పరిశీలించి అన్నీ సక్రమంగా ఉంటే పరిహారం కోసం అప్రూవల్​ఇవ్వాల్సి ఉంటుంది. కానీ ఉమ్మడి వరంగల్ జిల్లాలో 11 మంది ఏఎల్​వోలు ఉండగా.. అందులో కొందరు ఆఫీసర్లు ప్రైవేటు ఏజెంట్లను నియమించుకున్నారు. ఫీల్డ్ ఎంక్వైరీ నుంచి మొదలు అన్ని వ్యవహారాలు వారితోనే చక్కబెడుతున్నారు. కొందరు ఆఫీసర్లు తమ అఫీషియల్​ లాగిన్​ ఐడీలు కూడా ఏజెంట్లకు ఇచ్చి, అప్లికేషన్​ వెరిఫికేషన్ నుంచి ఇన్సురెన్స్​ అప్రూవల్స్​ దాకా అన్నీ వారితోనే చేయిస్తుండటం గమనార్హం.  

కార్డు లేకున్నా ఓకే..
ఏఎల్​వోలు ఏర్పాటు చేసుకున్న ఏజెంట్లు తమ కింద మరికొంతమందిని నియమించుకుంటున్నారు. దీంతో కింది స్థాయి బ్రోకర్లు గ్రామాల్లో ఎవరైనా చనిపోతే.. దశ దిన కర్మ పూర్తికాకముందే వారి ఇండ్ల ముందు వాలిపోతున్నారు. ఆ తరువాత చనిపోయిన వ్యక్తికి లేబర్​ కార్డు ఉందో.. లేదో ఆరా తీస్తున్నారు. కార్డు ఉంటే ఇన్సురెన్స్​ తొందరగా క్లెయిమ్​ చేయిస్తామంటూ మాట కలిపి, పర్సంటేజీలు మాట్లాడుతున్నారు. ఒకవేళ కార్డు లేదని తెలిస్తే.. చనిపోయిన వ్యక్తి ఆధార్​, రేషన్​ కార్డు, ఇతర పేపర్లు కలెక్ట్​ చేస్తున్నారు. ఆ తరువాత చనిపోయిన వ్యక్తి గతంలోనే  పొందినట్లుగా లేబర్​ కార్డులు తయారు చేస్తున్నారు. అయితే 2019 నుంచి లేబర్​ డిపార్ట్​మెంట్ కు కొత్త సాఫ్ట్ వేర్​ అందుబాటులోకి రాగా.. అందులో లేబర్​ కార్డు కోసం లబ్ధిదారులు కట్టే మీ సేవా చలాన్లను వెరిఫై చేసే సౌలభ్యం అందుబాటులోకి వచ్చింది. కానీ బ్యాంక్​ చలాన్లను  వెరిఫై చేసే  అవకాశం లేకపోవడంతో.. అలాంటి చలాన్ల ఆధారంగా దందా సాగిస్తున్నట్లు తెలిసింది. అంతేగాకుండా తరచూ లేబర్​ డిపార్ట్​మెంట్​  సైట్ మొరాయిస్తుండటం, అందులోని లోపాలను గుర్తించి ఏజెంట్లు ఆఫీసర్ల సహకారంతో ఈ బాగోతం నడిపిస్తున్నారనే ప్రచారం జరుగుతోంది. 

ఆఫీసర్లపై ఎంక్వైరీ ఏది?
లేబర్ డిపార్ట్​మెంట్ లో జరుగుతున్న దందాలపై ఇటీవల టాస్క్​ ఫోర్స్​ పోలీసులు నజర్​ పెట్టారు.  కొ ద్దిరోజుల కిందట ఓ పెద్దాఫీసర్​ నియమించుకున్న ఏజెంట్.. లైసెన్స్​రిన్యూవల్ పేరున అక్రమంగా వసూళ్లకు పాల్పడుతుండగా.. అరెస్ట్​ చేశారు. రెండ్రోజుల కిందట పరకాల ఏఎల్​వో నియమించుకున్న ఏజెంట్​తో పాటు మరో ఆరుగురిని అదుపులోకి తీసుకున్నారు. నిందితుల వెనుక కొందరు ఆఫీసర్లే ఉన్నారని తెలిసినా పోలీస్​ అధికారులు కూడా వారిపై ఎలాంటి యాక్షన్​ తీసుకోకపోవడం అనుమానాలకు తావిస్తోంది. కేవలం బ్రోకర్లపైనే పోలీసులు ప్రతాపం చూపుతున్నారని, అసలు సూత్రధారులపై ఎందుకు యాక్షన్​ తీసుకోవడం లేదనే ప్రశ్నలు వెల్లువెత్తుతున్నాయి. దందా విషయం బయటపడిన తరువాత డిపార్ట్​మెంట్ పెద్దాఫీసర్లేగానీ, లోకల్​ పోలీసులే గానీ ఎలాంటి ఎంక్వైరీ చేయకపోవడం కూడా అనుమానాలకు తావిస్తోంది. ఇకనైనా లేబర్​ డిపార్ట్​మెంట్ పెద్దాఫీసర్లు, పోలీసులు కార్మిక బీమా పేరున సాగుతున్న దందాకు అడ్డుకట్ట వేయాలని, లేదంటే ప్రభుత్వ ఖజానాకు భారీగా గండిపడే అవకాశం ఉందనే అభిప్రాయాలు వ్యక్తమవుతున్నాయి.