ఆస్ట్రేలియాతో 5టీ 20ల సిరీస్ లో భాగంగా వైజాగ్ లో జరిగిన తొలి టీ20 మ్యాచ్ లో టీమిండియా ఘన విజయం సాధించిన సంగతి తెలిసిందే. భారీ లక్ష్య ఛేదనలో ఉత్కంఠ భరితంగా జరిగిన ఈ మ్యాచ్ లో భారత్ రెండు వికెట్ల తేడాతో థ్రిల్లింగ్ విక్టరీ కొట్టింది. ఈ నేపథ్యంలో నేడు(నవంబర్ 26) కేరళ వేదికగా రెండో టీ20 మ్యాచ్ కు సిద్ధమవుతుంది. ఈ మ్యాచ్ లోనూ గెలిచి సిరీస్ పై పట్టు బిగించే ప్రయత్నం చేయాలని భారత్ భావిస్తుంది. అయితే ఈ మ్యాచ్ కు వర్షం అంతరాయం కలిగించే అవకాశం కనిపిస్తుంది. త్రివేండ్రంలో జరగనున్న ఈ మ్యాచ్ కు వర్షం పడుతుందో లేదో ఇప్పుడు చూద్దాం.
శనివారం ఉదయం ఇక్కడ భారీ వర్షాలు కురిశాయి. పిచ్ మొత్తానికి కవర్లు కప్పినా వర్షం నీళ్లు నిలిచిపోయాయి. రాబోయే 48 గంటల్లో ఇక్కడ కుండపోతగా వర్షాలు కురిసే అవకాశం ఉంది. అయితే ఈ రోజు వాతావరం చూసుకుంటే మ్యాచ్ కు పెద్దగా వర్షం గండం లేనట్టుగానే రిపోర్ట్స్ చెబుతున్నాయి. AccuWeather ప్రకారం, ఉదయం ఎండగా ఉంటుందని.. మధ్యాహ్నం చిరు జల్లులు పడే అవకాశం ఉన్నట్లుగా తెలుస్తుంది. ఇక సాయంత్రం 7 గంటలకు ప్రారంభమయ్యే మ్యాచ్‌పై ఎలాంటి వర్షం కురిసే అవకాశం లేదని స్పష్టం చేసింది .
ఇటీవల వర్షాలు కురుస్తున్నప్పటికీ మ్యాచ్ రోజు గరిష్ట ఉష్ణోగ్రత 25 డిగ్రీల సెల్సియస్‌ఉంటుందని రిపోర్ట్స్ తెలియజేస్తున్నాయి. దీంతో ఈ మ్యాచ్ ఎలాంటి వర్షం అంతరాయం లేకుండా సజావుగా జరిగే అవకాశం ఉంది. ఒకవేళ మ్యాచ్ సమయంలో వర్షం పడితే ఓవర్లు కుదిస్తారు. అప్పటికీ సాధ్యపడకపోతే మ్యాచ్ ను రద్దు చేస్తారు. ప్రస్తుతం భారత్ 5 టీ 20 ల సిరీస్ లో 1-0 ఆధిక్యంలో నిలిచింది.
