2024 టీ20 ప్రపంచకప్‌లో రోహిత్ సేన సెమీఫైనల్లో అడుగుపెట్టింది. శనివారం(జూన్ 22) ఆంటిగ్వా వేదికగా బంగ్లాదేశ్‌‌తో జరిగిన మ్యాచ్‌లో టీమిండియా 50 పరుగుల తేడాతో విజయం సాధించింది. తొలుత భారత జట్టు 196 పరుగులు చేయగా.. లక్ష్యఛేదనలో బంగ్లాదేశ్ నిర్ణీత ఓవర్లలో 8 వికెట్లు కోల్పోయి 146 పరుగులు చేసింది.
అలరించిన పాండ్యా
ఈ మ్యాచ్‌లో మొదట బ్యాటింగ్ చేసిన టీమిండియా నిర్ణీత 20 ఓవర్లలో 5 వికెట్ల నష్టానికి 196 పరుగులు చేసింది. భారత బ్యాటర్లలో సూర్యకుమార్ యాదవ్ (6) ఒక్కడే నిరాశ పరిచాడు. రోహిత్ శర్మ (23; 11 బంతుల్లో), విరాట్ కోహ్లీ (37; 28 బంతుల్లో), రిషభ్‌ పంత్ (36; 24 బంతుల్లో), శివమ్ దూబె (34; 24 బంతుల్లో), హార్దిక్ పాండ్యా(50*; 27 బంతుల్లో 4 ఫోర్లు, 3 సిక్స్‌లు) రాణించారు. బంగ్లా బౌలర్లలో తంజిమ్ హసన్ 2, రిషాద్ హొస్సేన్ 2, షకిబ్ అల్ హసన్ ఒక వికెట్ పడగొట్టారు.
పోరాడిన శాంటో
197 పరుగుల భారీ ఛేదనలో బంగ్లాదేశ్ ఏ దశలోనూ విజయం దిశగా సాగలేదు. మంచి భాగస్వామ్యాలు నెలకొల్పినా.. వేగంగా ఆడలేకపోయారు. అదే వారికి విజయాన్ని దూరం చేసింది. బంగ్లా కెప్టెన్ నజ్ముల్ హొస్సేన్ శాంటో(40; 32 బంతుల్లో ఒక ఫోర్, 3 సిక్స్‌లు) ఒక్కడు కాసేపు పోరాడాడు.
భారత బౌలర్లలో కుల్దీప్ యాదవ్ 3 వికెట్లు పడగొట్టగా.. అర్షదీప్, బుమ్రా రెండేసి వికెట్లు తీసుకున్నారు. భారత స్పీడ్ గన్ జస్ప్రీత్ బుమ్రా తన 4 ఓవర్లలో కేవలం 13 పరుగులివ్వడం గమనార్హం. బుమ్రాను ఎదుర్కోవడానికి బంగ్లా బ్యాటర్ల దగ్గర సమాధానమే లేకపోయింది. వికెట్ కాపాడుకుంటే చాలు అన్నట్లుగా బ్యాటింగ్ చేశారు.
India crush Bangladesh to take a huge step into the semifinals 💪
— ESPNcricinfo (@ESPNcricinfo) June 22, 2024
🔗 https://t.co/TViqUcv5FD | #INDvBAN pic.twitter.com/9DTOsBVEkp
