జస్ప్రీత్ బుమ్రా సారథ్యంలోని టీమిండియా మరో ప్రపంచ రికార్డు సొంతం చేసుకోవడానికి అడుగు దూరంలో ఉంది. ఐర్లాండ్ పర్యటనలో ఇప్పటికే రెండు మ్యాచ్‌లు గెలిచి సిరీస్ చేజిక్కించుకున్న భారత జట్టు.. బుధవారం(ఆగస్టు 23) చివరి టీ20లో తలపడనుంది. ఈ మ్యాచ్‌లో విజయం సాధిస్తే బుమ్రా సేనకు.. వైట్‌వాష్ చేసే గొప్ప అవకాశం ఉంది. దీంతో దాయాది పాకిస్తాన్ జట్టు పేరిట ఉన్న ఒక రికార్డు కనుమరుగు కానుంది. ఆ రికార్డు ఏంటో చూసేద్దామా..!
అంతర్జాతీయ టీ20 క్రికెట్‌లో ఎనిమిది వైట్‌వాష్‌లు నమోదు చేసిన ఏకైక జట్టు పాకిస్థాన్ మాత్రమే. మూడో టీ20లో ఐర్లాండ్‌పై.. భారత్ గెలిస్తే ఆ రికార్డు కనుమరుగు కానుంది. ప్రస్తుతానికి ఎనిమిది వైట్‌వాష్‌లతో పాక్‌కు సమంగా ఉన్న భారత జట్టు.. ఈ విజయంతో వైట్‌వాష్‌ల సంఖ్య తొమ్మిదికి చేరుతుంది. దీంతో టీ20 ఫార్మాట్‌లో మూడు లేదా అంతకంటే ఎక్కువ మ్యాచ్‌ల సిరీస్‌లో అత్యధిక వైట్‌వాష్‌లను నమోదు చేసిన జట్టుగా చరిత్ర సృష్టించనుంది.
టీమిండియా 8 వైట్‌వాష్‌లు ఏయే జట్టుపై అంటే..
- ఆస్ట్రేలియాపై ఒకసారి
- శ్రీలంకపై రెండుసార్లు
- వెస్టిండీస్ పై మూడుసార్లు
- న్యూజిలాండ్ పై రెండుసార్లు
ప్రస్తుతానికి ఎనిమిది సిరీస్‌లతో ఇరు జట్లు(ఇండియా, పాకిస్తాన్) సమంగా ఉన్నాయి.
