పాక్ నుంచి కవ్వింపు చర్యలు పెరుగుతుండగా వాటిని డీల్ చేసేందుకు అవసరమైన యుద్ధ విమానాలను భారత్ సమకూర్చుకుంటోంది. ఇందులో భాగంగానే భారత ప్రభుత్వం ఫ్రాన్స్ నుంచి 26 రాఫెల్-ఎం (మెరైన్) యుద్ధ విమానాలను కొనుగోలు కోసం రూ. 63 వేల కోట్లతో మెగా డీల్ కుదుర్చుకుంది.
ఏప్రిల్ 28న అధికారికంగా ఈ రక్షణ ఒప్పందం జరిగింది. ఢిల్లీలోని నౌసేనా భవన్‌లో భారతదేశంలోని ఫ్రెంచ్ రాయబారి అధ్యక్షత వహించిన సంతకాల కార్యక్రమానికి రక్షణ కార్యదర్శి రాజేష్ కుమార్ సింగ్, నేవీ వైస్ చీఫ్ వైస్ అడ్మిరల్ కె. స్వామినాథన్ హాజరయ్యారు. రక్షణ మంత్రి రాజ్‌నాథ్ సింగ్ పాల్గొన్నారు. వర్చువల్ గా ఈ ఒప్పందం కుదిరింది. వాస్తవానికి ఈ డీల్ కు ప్రధాని మోదీ నేతృత్వంలోని కేబినెట్ కమిటీ ఆన్ సెక్యూరిటీ (సీసీఎస్) ఏప్రిల్ 9న 2025న ఆమోదం తెలిపింది
ఈ ఒప్పందం కుదిరిన తర్వాత ఐదేండ్లకు యుద్ధ విమానాల డెలివరీ మొదలవుతుంది. 2031 నాటికి మొత్తం 26 రాఫెల్–మెరైన్ ఫైటర్ జెట్స్ నేవీ చేతికి అందే అవకాశం ఉంది. ఈ డీల్‌‌‌‌లో భాగంగా ఫ్రాన్స్‌‌‌‌కు చెందిన డసాల్ట్ ఏవియేషన్ నుంచి మెయింటెనెన్స్, లాజిస్టికల్ సపోర్టు, శిక్షణ అందుతుంది. కొన్ని విడిభాగాలు దేశీయంగా తయారుచేయాలనే నిబంధన కూడా ఉన్నట్టు తెలిసింది. రాఫెల్–మెరైన్ జెట్స్ కొనుగోలు చేసేందుకు 2023లోనే డిఫెన్స్ మినిస్ట్రీ అప్రూవల్ ఇచ్చింది.
అడ్వాన్స్‌‌‌‌డ్ మెరైన్ జెట్స్..
ఈ డీల్‌‌‌‌లో భాగంగా 22 సింగిల్ సీటర్, 4 ట్విన్ సీటర్ జెట్స్‌‌‌‌ను కేంద్రం కొనుగోలు చేయనుంది. వీటిని ఐఎన్ఎస్ విక్రాంత్ విమాన వాహక నౌకపై మోహరించనుంది. తద్వారా ఇండియన్ ఓషియన్‌‌‌‌లో మన బలాన్ని పెంచుకోవాలని కేంద్రం భావిస్తున్నది. రాఫెల్–మెరైన్ జెట్స్‌‌‌‌ను ప్రపంచంలోనే అత్యాధునిక నావల్ ఫైటర్ జెట్స్‌‌‌‌గా పరిగణిస్తారు.
వీటికి ల్యాండింగ్ గేర్లు, ఫోల్డింగ్ వింగ్స్, డెక్ ల్యాండింగ్ లాంటి ప్రత్యేకతలు ఉన్నాయి. ఇప్పటికే మన దేశ ఎయిర్‌‌‌‌‌‌‌‌ఫోర్స్ దగ్గర 36 రాఫెల్ ఫైటర్ జెట్స్ ఉన్నాయి. మరిన్ని రాఫెల్ జెట్స్ కొనుగోలు చేయాలని ఐఏఎఫ్ ఆలోచన చేస్తున్నది. డిఫెన్స్ రీసెర్చ్ అండ్ డెవలప్‌‌‌‌మెంట్ ఆర్గనైజేషన్ (డీఆర్‌‌‌‌‌‌‌‌డీవో) దేశీయంగా తయారు చేసిన ఐదో తరం ఫైటర్ జెట్స్‌‌‌‌ను కూడా మోహరించేందుకు నేవీ ప్లాన్ చేస్తున్నది.
రాఫెల్-M శక్తి
పొడవు: 15.27 మీటర్లు
వెడల్పు: 10.80 మీటర్లు
ఎత్తు: 5.34 మీటర్లు
బరువు: 10,600 కిలోగ్రాములు
వేగం: 1,912 కి.మీ/గం.
పరిధి: 3,700 కిలోమీటర్లు
విమాన ఎత్తు: 50,000 అడుగులు
INS విక్రాంత్ నుంచి స్కీ-జంప్ టేకాఫ్ చేయగల సామర్థ్యం
తక్కువ దూరాలలో ల్యాండింగ్, టేకాఫ్ చేయగల సామర్థ్యం
అణు దాడులు చేయగల సామర్థ్యం.
గాలి మధ్యలో ఇంధనం నింపుకునే సామర్థ్యంతో అమర్చబడింది
