ప్రపంచ పోటీతత్వ ర్యాంకుల్లో భారతదేశం గత ఏడాదితో పోలిస్తే ఈసారి మూడు స్థానాలు దిగజారి 40వ స్థానానికి పరిమితమైంది. 2022లో 37వ స్థానంలో ఉండేది. 2019–21 మధ్య మూడేండ్లు భారత్ వరుసగా 43వ ర్యాంకుతోనే సరిపెట్టుకున్నది. ఐఎండీ జాబితాలో సింగపూర్ ఒక స్థానం పడిపోయి నాలుగో స్థానానికి పరిమితం కాగా, డెన్మార్క్, ఐర్లాండ్, స్విట్జర్లాండ్ వరుసగా తొలి మూడు స్థానాల్లో నిలిచాయి. నెదర్లాండ్స్ ఐదో స్థానం దక్కించుకోగా తైవాన్, హాంకాంగ్, స్వీడన్, అమెరికా, యూఏఈ వరుసగా టాప్–10లో నిలిచాయి.
ఇంటర్నేషనల్ ఇన్స్టిట్యూట్ ఫర్ మేనేజ్మెంట్ డెవలప్మెంట్(ఐఎండీ) 2023, జూన్ 27న విడుదల చేసిన నివేదిక ప్రకారం భారత్ తన సామర్థ్యాన్ని మెరుగుపరుచుకున్నా ఇతర దేశాలతో పోలిస్తే వ్యాపార సామర్థ్యం, మౌలిక సదుపాయాలు, ఆర్థిక ప్రదర్శన వంటి వాటిలో కొంత వెనుకబడి ఉంది. మారకం రేటు స్థిరత్వం, పరిహారం స్థాయిలు, కాలుష్య నియంత్రణలో మెరుగుదల వంటివి భారత స్కోరులో మెరుగుపడ్డాయి.
అధిక జీడీపీ వృద్ధిని కొనసాగించడం, ఆర్థిక మార్కెట్ అస్థిరతను ఎదుర్కోవడం, ద్రవ్యోల్బణం, ఆర్థిక లోటు నియంత్రణ, డిజిటల్ ట్రాన్స్ఫర్మేషన్ వేగవంతం చేయడం, మౌలిక సదుపాయాల అభివృద్ధికి వనరుల సమీకరణ వంటి సవాళ్లను భారత్ ఈ ఏడాది ఎదుర్కొంటున్నదని ఐఎండీ తన నివేదికలో వివరించింది.
