- ఇండియా ఓ స్వర్గం
- పాక్కు వెళ్లని అదృష్టవంతుల్లో నేనొకడిని: ఆజాద్
న్యూఢిల్లీ: పాకిస్థాన్కు వెళ్లని అదృష్టవంతుల్లో తానూ ఒకడినని గులాంనబీ ఆజాద్ అన్నారు. హిందుస్థానీ ముస్లింనని చెప్పుకునేందుకు గర్వపడుతున్నానన్నారు. ఈనెల 15న ఆయన పదవీ కాలం ముగియనుండడంతో మంగళవారం రాజ్యసభలో నిర్వహించిన వీడ్కోలు సమావేశంలో ఆజాద్ మాట్లాడారు. ఇండియా ఓ స్వర్గమన్నారు. స్వాతంత్ర్యం వచ్చిన తర్వాత తాను పుట్టానని, పాక్లో ఘటనలను చూసి, ఇండియన్ ముస్లింని అయినందుకు గర్వపడుతున్నానని అన్నారు. 2007లో జమ్మూకాశ్మీర్ సీఎంగా ఉన్నప్పుడు జరిగిన టెర్రర్ ఎటాక్ను గుర్తు చేస్తూ.. లోయలో టెర్రరిజం అంతమవ్వాలని దేవుడిని మొక్కుకుంటున్నానని చెప్పారు. మిగతా ముస్లిందేశాల్లోని ముస్లింలు తమలో తామే కొట్టుకుని చస్తున్నారు. ఒక్క ఇండియాలోనే అంతా కలిసిమెలిసి ఉంటున్నారని ఆజాద్ చెప్పారు. ప్రపంచంలో గొప్ప ముస్లిం ఎవరని అంటే.. ఇండియన్ ముస్లింలేనని అన్నారు. అఫ్గానిస్తాన్ నుంచి ఇరాక్ దాకా ముస్లిం దేశాల్లో పరిస్థితులు ఎలా ఉన్నాయో అందరికీ తెలిసిందేనన్నారు.
అటల్ జీ నుంచి ఎంతో నేర్చుకున్నా
పార్లమెంట్ జీవితం తనకెన్నో విషయాలు నేర్పిందని ఆజాద్ చెప్పారు. ఇందిరా గాంధీ, రాజీవ్ గాంధీల పాలన చూసి తాను రాజకీయాల్లోకి వచ్చానన్నారు. బీజేపీతో కాకుండా మాజీ ప్రధాని అటల్ బిహారీ వాజ్పేయితో ఎలా మాట్లాడేవారో తమకు ఇందిరా గాంధీ ఎప్పుడూ చెబుతుండేవారన్నారు. ప్రతిపక్ష నేతగా ఎలా ఉండాలో అటల్ జీ నుంచే నేర్చుకున్నానని చెప్పారు. అవలీలగా ఆయన తన బాధ్యతలను నెరవేర్చారన్నారు.
For More News..
