న్యూయార్క్: కాంగ్రెస్ నేతల దాడికి గురైన జర్నలిస్ట్ రోహిత్ శర్మకు ఇండియన్ ఓవర్సీస్ కాంగ్రెస్ చీఫ్ శామ్ పిట్రోడా క్షమాపణలు చెప్పారు. ఇటీవల ప్రతిపక్షనేత రాహుల్ గాంధీ అమెరికా పర్యటనలో ఈ దాడి జరిగింది. దీంతో ఆదివారం శ్యామ్ పిట్రోడా శర్మకు ఫోన్ చేసి విచారం వ్యక్తంచేశారు. జర్నలిస్టులపై ఇటువంటి దాడులు ఆమోదయోగ్యం కాదని.. అది దురదృష్టకరమైన ఘటన అని అన్నారు. రాహుల్ గాంధీ అమెరికా పర్యటన సందర్భంగా సెప్టెంబరు 7న టెక్సస్రాష్ట్రంలోని డాలస్లో మీటింగ్ నిర్వహించారు. దీన్ని కవర్ చేయడానికి రోహిత్ శర్మ అక్కడకు వెళ్లారు.
ఈ సందర్భంగా శ్యామ్ పిట్రోడాతో రోహిత్ శర్మ మాట్లాడుతూ... రాహుల్ గాంధీ అమెరికా చట్టసభ సభ్యులతో సమావేశం సందర్భంగా బంగ్లాదేశ్లో హిందువులపై జరుగుతున్న దాడుల అంశాన్ని లేవనెత్తారా అని ప్రశ్నించారు. దీనిపై అక్కడే ఉన్న కాంగ్రెస్ కార్యకర్తలు, రాహుల్ అభిమానులు అభ్యంతరం వ్యక్తంచేస్తూ దాడికి పాల్పడ్డారు. దీనిపై రోహిత్ శర్మకు ఫోన్ చేసి శ్యామ్ పిట్రోడా సారీ చెప్పారు. అలాగే ఈ ఘటనపై సమగ్ర దర్యాప్తు జరిపి బాధ్యులను గుర్తిస్తామన్నారు. వివాదాస్పదమైన ప్రశ్నలు అడుగుతున్నావని దాదాపు 15 మంది తనపై దాడికి పాల్పడ్డారని, ఒక గదిలో కొంతసేపు నిర్బంధించారని రోహిత్ శర్మ చెప్పారు.
