బ్రిటన్లో పోస్ట్ స్టడీ వర్క్ నిబంధనలతో పాటు పలు సంస్కరణలకు తెరతీసి మరింత మంది విదేశీ విద్యార్థులను ఆకర్షించాలని బ్రిటన్లో కొత్తగా ఏర్పాటైన బోరిస్ జాన్సన్ ప్రభుత్వం యోచిస్తోంది.
2019 మార్చి నాటికి 21,165 మందికి టైర్ 4 వీసాలు మంజూరయ్యాయని, 2018 తో (15161) పోల్చుకుంటే 40 శాతం పెరుగుదల ఉందని యూకేకు చెందిన ఆఫీస్ ఆఫ్ నేషనల్ స్టాటిస్టిక్స్ నివేదిక తెలిపింది. బ్రిటన్లో చదువుతున్న విదేశీ విద్యార్థులు 25 బిలియన్ పౌండ్స్ కంటే ఎక్కువ ఆదాయం జనరేట్ చేయడమే కాక స్థానికంగా ఉద్యోగాల కల్పనకు, వ్యాపారాభివృద్ధికి దోహదపడ్డారని 2017లో నిర్వహించిన ఓ సర్వే నివేదిక తెలిపింది. ఈ నేపథ్యంలోనే రెండు దేశాల మధ్య విద్యా సంబంధ ద్వైపాక్షిక సంబంధాలను బలోపేతం చేసేందుకు రానున్న మూడు నెలల్లో ఇండియాను సందర్శించడంతో పాటు పలు కార్యక్రమాలు చేపట్టనుంది. బ్రిటన్ ప్రభుత్వం 2011లో పోస్ట్ స్టడీ వర్క్ పర్మిట్ను రద్దు చేసిన తర్వాత అక్కడ చదివే మన విద్యార్థుల సంఖ్య బాగా తగ్గిపోయింది. 2011లో 38,677 మంది చదువుతుండగా 2016 నాటికి కేవలం 16,655 మంది మాత్రమే బ్రిటన్లో ఉన్నారు.
సంస్కరణలివే
- యూజీ, పీజీ అభ్యర్థులందరికీ ప్రస్తుతం నాలుగు నెలలుగా ఉన్న పోస్ట్ స్టడీ వర్క్ పర్మిట్ను 12 నెలలకు పెంచాలని ప్రతిపాదన. ప్రస్తుతం పీహెచ్డీ అభ్యర్థులకు మాత్రమే ఈ అవకాశం ఉంది.
- బ్రిటన్లోని ప్రముఖ యూనివర్శిటీల వైస్చాన్స్లర్లు ఈ ఏడాది సెప్టెంబర్ మొదటి వారంలో ఇండియాలో పర్యటిస్తారు. వీరు మానవ వనరుల అభివృద్ధి శాఖ అధికారులు, ఇండియన్ వైస్ ఛాన్స్లర్లతో సమావేశమై ఉన్నత విద్య, ఉద్యోగావకాశాలపై చర్చిస్తారు.
- సెప్టెంబర్లోనే లండన్ స్కూల్ఆఫ్ ఎకనామిక్స్, లీడ్స్ యూనివర్శిటీ నుంచి అధికారిక బృందాలు ఇండియాలో పర్యటిస్తాయి.
- అంతర్జాతీయ విద్యార్థులను ఆకర్షించి త్వరగా అప్లై చేసుకునేలా ప్రోత్సహించేందుకుగాను #GetReadyForClass క్యాంపెయిన్ నిర్వహణ
- బ్రిటన్లో అండర్గ్రాడ్యుయేట్ కోర్సులు చేస్తున్న బ్రిటన్ విద్యార్థులకు అదే కోర్సును కొంతకాలం ఇండియన్ యూనివర్శిటీల్లో చదువుకునే అవకాశం కల్పించడం.
- ఇందుకుగాను యూకే ఇండియా ఎడ్యుకేషన్ అండ్ రీసెర్చ్ ఇనిషియేటివ్ మొబిలిటీ ప్రోగ్రామ్ను ప్రారంభించడం. దీని కింద 2020 సెప్టెంబర్లో దాదాపు 200 మంది బ్రిటన్ స్టూడెంట్స్ ఇండియాలో చదువుకోనున్నారు.
- అలాగే బ్రిటిష్ కౌన్సిల్ నిర్వహించే ఫ్యూచర్ లీడర్స్ కనెక్ట్ ప్రోగ్రామ్ లో నలుగురు భారతీయులు హసీబా బేగం, ఖాజ్రి బబ్బార్, శాంభవి సింగ్, శ్రేయా జునేజా పాల్గొనడం
అప్లికేషన్ ప్రాసెస్
యూకేలో చదవాలనుకునేవారు ‘టైర్ 4 (జనరల్ స్టూడెంట్ వీసా) వీసా తీసుకోవాల్సి ఉంటుంది. పాయింట్ బేస్డ్ (పీబీఎస్) సిస్టమ్లో ఫండ్స్ మెయింటెనెన్స్ ఆధారంగా పాయింట్లు కేటాయిస్తారు. ముందుగా ఏ కాలేజీలో చేరాలో నిర్ణయించుకొని సంబంధిత వెబ్సైట్లో రిజిస్టర్ చేసుకోవాలి. యూనివర్శిటీ నుంచి అడ్మిషన్ ఆఫర్ లెటర్ వచ్చిన తర్వాత ఫండ్స్ సిద్ధం చేసుకోవాలి. అనంతరం ఆన్లైన్లో వీసాకు దరఖాస్తు చేసుకోవాలి. ఆన్లైన్ లేదా టెలిఫోన్ ద్వారా ఇంటర్వ్యూకు అపాయింట్మెంట్ కోరవచ్చు. అపాయింట్మెంట్ లభిస్తే అప్లికేషన్ తో పాటు సంబంధిత డాక్యుమెంట్స్తో ఇంటర్వ్యూ కు హాజరవ్వాలి. వీసా ఫీజు, బయోమెట్రిక్ ఇన్ఫర్మేషన్, డిజిటల్ ఫోటో సబ్ మిట్ చేసిన తర్వాత అన్ని సరిగా ఉంటే వీసా మంజూరు చేస్తారు. అయితే వీసాకు దరఖాస్తు చేయాలంటే యూకేలో చదువు కోసం విద్యార్థులు అంగీకరిస్తున్నట్లు యూనివర్శిటీ ఇచ్చే కన్ఫర్మింగ్ అండ్ యాక్సెప్టెన్స్ ఆఫ్ స్టడీ (సీఏఎస్) నంబర్ తప్పనిసరి. ఇది సంబంధిత యూనివర్శిటీ ప్రొవైడ్ చేస్తుంది.
ఇవీ బెనిఫిట్స్
బ్రిటన్ ఎడ్యుకేషన్ సిస్టమ్ పురాతనమైనది. ఇక్కడి విశ్వవిద్యాలయాలు నాలుగైదు శతాబ్దాల కింద ఏర్పడి అంతర్జాతీయ గుర్తింపు కలిగి ఉన్నాయి. దాదాపు 50 వేలకు పైగా కోర్సులు అందుబాటులో ఉన్నాయి. వీటికి ప్రపంచవ్యాప్త గుర్తింపు ఉంది. ఇంగ్లిష్ లాంగ్వేజ్ నాలెడ్జ్తో పాటు కెరీర్ కు కావాల్సిన అన్ని రకాల స్కిల్స్ నేర్పించడం ఈ యూనివర్శిటీల ప్రత్యేకత. ప్రపంచస్థాయి ప్రమాణాలు కలిగిన ఇన్ఫ్రాస్ర్టక్చర్తో 30 శాతం రీసెర్చ్ ఒక్క బ్రిటన్ నుంచే వస్తోంది. లండన్ 5వ స్టూడెంట్ ఫ్రెండ్లీ సిటీగా గుర్తింపు పొందింది. ఇతర దేశాల్లో డిగ్రీకి నాలుగు, పీజీకి రెండు నుంచి మూడేళ్ల కాలవ్యవధి ఉండగా బ్రిటన్లో వీటి కంటే తక్కువగా డిగ్రీ మూడు, పీజీ ఒక సంవత్సరంలో పూర్తవుతుంది. బ్రిటన్ మొత్తం విద్యార్థుల్లో దాదాపు 60 శాతం విదేశీ విద్యార్థులే కావడంతో కల్చరల్ డైవర్శిటీ కూడా ఎక్కువే.
గతంలోనే మార్పులు
- 2016కు ముందు డిగ్రీలు పూర్తవగానే విద్యార్థులు స్వదేశాలకు వెళ్ళిపోవాల్సి వచ్చేది. కానీ 2016 తర్వాత కార్పొరేట్ ఇంటర్న్షిప్ చేసుకునే అవకాశం కల్పించారు. దీంతో ఫుల్టైమ్ జాబ్ సాధించే అవకాశం విద్యార్థులకు లభించింది. మళ్లీ ఇప్పుడు 12 నెలల పాటు పోస్ట స్టడీ వర్క్ పర్మిట్ ను కల్పించాలని భావిస్తున్నారు.
- హెచ్డీ పూర్తి చేసినవారికి 12 నెలలపాటు పోస్ట స్టడీ వర్క్ పర్మిట్కు ఆమోదం తెలిపారు. ఈ టైమ్లో విద్యార్థులు ఎంట్రప్రెన్యూర్గా కూడా మారొచ్చు.
- కన్ఫర్మేషన్ ఆఫ్ యాక్సెప్టెన్స్ ఫర్ స్టడీస్ లో తెలిపిన కోర్సు కంటే తక్కువ స్థాయి కోర్సులో చేరకూడదు.
- ఎలాంటి లాంగ్వేజ్ టెస్ట్ లేకుండానే ఒక కంపెనీలో పనిచేస్తున్న ఉద్యోగులను అదే కంపెనీకి చెందిన యూకే ఆఫీసుకు బదిలీ చేసే ఇంట్రా కంపెనీ ట్రాన్స్‌‌‌‌ఫర్ (ఐసీటీ) ఆపర్చునిటీ కూడా వచ్చింది. దీనికి ముందు ఇంగ్లిష్ టెస్ట్ తప్పనిసరిగా ఉండేది.
- బిజినెస్ వీసా విజిటర్స్, టూరిస్ట్లు షార్ట్‌‌‌‌టర్మ్ కోర్సులు/ట్రైనింగ్ సెషన్స్లో పాల్గొనే అవకాశం కల్పించారు.
విదేశాల్లో చదువుతున్న భారతీయ విద్యార్థులు
అమెరికా 211703
కెనడా 124000
అస్ట్రేలియా 87115
సౌదీ అరేబియా 70800
యూఏఈ 50000
న్యూజిలాండ్ 30000
బహ్రెయిన్ 27200
బ్రిటన్ 16550
చైనా 18171
సోర్స్: మినిస్ట్రీ ఆఫ్ ఎక్స్టర్నల్ అఫైర్స్
(2018 జూలై 18 నాటికి)
టాప్‌ – 10 ఇన్స్టిట్యూట్స్
- యూనివర్శిటీ ఆఫ్ ఆక్స్ఫోర్డ్
- యూనివర్శిటీ ఆఫ్ కేంబ్రిడ్జ్
- ఇంపీరియల్ కాలేజ్ ఆఫ్ లండన్
- యూనివర్శిటీ కాలేజ్ ఆఫ్ లండన్
- లండన్ స్కూల్ ఆఫ్ ఎకనామిక్స్ అండ్ పొలిటికల్ సైన్స్
- యూనివర్శిటీ ఆఫ్ ఎడిన్బర్గ్
- కింగ్స్ కాలేజ్, లండన్
- యూనివర్శిటీ ఆఫ్ మాన్చెస్టర్
- యూనివర్శిటీ ఆఫ్ బ్రిస్టల్
- యూనివర్శిటీ ఆఫ్ వార్విక్
సోర్స్: టైమ్స్ వరల్డ్ యూనివర్శిటీ ర్యాంకింగ్స్
పార్ట్టైం జాబ్స్.. స్కాలర్షిప్స్
డిప్లొమా, సర్టిఫికెట్ కోర్సులైతే వారానికి 10 గంటలు, డిగ్రీ, మాస్టర్స్ చదివేవారు వారానికి 20 గంటలు పార్ట్టైం వర్క్ చేసుకునే వెసులుబాటు ఉంటుంది. యావరేజ్ లివింగ్ కాస్ట్ కూడా తక్కువే. దాదాపు 19 స్కాలర్షిప్స్ ద్వారా కోర్సుతో పాటు అకామడేషన్కూ ఫైనాన్షియల్ సపోర్ట్ లభిస్తుంది. నేషనల్ హెల్త్ సర్వీస్ ద్వారా ఫ్రీ మెడికల్ ట్రీట్మెంట్ సదుపాయం ఉంటుంది. కోర్సు పూర్తి చేసుకొని బ్రిటన్లో నివసించే అంతర్జాతీయ విద్యార్థుల సంఖ్య పై ఎలాంటి పరిమితి లేదు కాబట్టి స్టడీస్ అయ్యాక అక్కడే ఫుల్టైం ఎంప్లాయ్మెంట్ వెతుక్కోవచ్చు. 35 వేల బ్రిటిష్ పౌండ్స్ శాలరీ ఉంటే పర్మనెంట్ బ్రిటిష్ సిటిజెన్గా దరఖాస్తు చేసుకోవచ్చు.
