సైబర్ నేరాల అడ్డాగా ఆ రెండు నగరాలు

47 శాతం మోసాలతో పాట్నా టాప్
41 శాతం కేసులతో హైదరాబాద్ సెకండ్
ఎక్కువ మోసాలు జరుగుతున్నది ఆ నగరాల్లోనే

‘మీకు లాటరీ తగిలింది. కోట్ల రూపాయలు మీ కోసం వెయిటింగ్. ప్రాసెసింగ్ ఫీజు పంపితే.. ఆ డబ్బు మీదే’.. ఓ మెయిల్. దాన్ని క్లిక్ చేసి లక్షలు పోగొట్టుకున్నోళ్లు ఎంతో మంది.

‘మీ అకౌంట్లో కొద్ది రోజులుగా ట్రాన్సాక్షన్స్ ఏవీ జరగట్లేదు. దీంతో మీ అకౌంట్ బ్లాక్ అయింది. తిరిగి యాక్టివేట్ కావాలంటే ఆన్లైన్లో చేసుకోండి. ఓటీపీ చెప్పండి’.. ఓ మెసేజ్. నిజమేనని దాన్ని క్లిక్ చేసి అన్ని వివరాలు చెప్పేసి పైసలు పోగొట్టుకున్నోళ్లు చాలా మందే.

ఇలాంటి సైబర్ నేరాలు ఒకటి కాదు.. రెండు కాదు. ఎప్పుడూ ఎక్కడో ఓ చోట జరుగుతూనే ఉన్నాయి. ఆ సైబర్ నేరాలకు అడ్డా ఏంటో తెలుసా? టయర్2 సిటీలేనట. మెట్రో సిటీలతో పోలిస్తే టయర్2 సిటీల్లోనే ఎక్కువగా ఇలాంటి నేరాలు జరుగుతున్నాయని తేలింది. కే7 కంప్యూటింగ్ అనే సంస్థ చేసిన స్టడీలో ఈ విషయం వెల్లడైంది. సైబర్ థ్రెట్ మానిటర్ (సీటీఎం) పేరిట ఆ కంపెనీ రిపోర్టును విడుదల చేసింది. ఆయా సిటీలన్నీ సైబర్ నేరగాళ్లకు స్వీట్ స్పాట్స్గా ఉన్నాయని పేర్కొంది.

పాట్నాలోనే ఎక్కువ

దేశంలో ఏ సిటీలో లేనంతగా బీహార్ రాజధాని పాట్నాలోనే ఎక్కువగా సైబర్ నేరాలు జరుగుతున్నట్టు స్టడీలో తేలింది. 47 శాతం మంది సైబర్ యూజర్లు సైబర్ నేరాల బారిన పడుతున్నారు. మెట్రో సిటీలు, వేరే టయర్2 సిటీలతో పోలిస్తే పాట్నాలోనే ఎక్కువ మంది సైబర్ నేరాల బారిన పడుతున్నారు. ఆ తర్వాత గౌహతిలో 45 శాతం మంది, లక్నో 44%, భువనేశ్వర్ 43%, జైపూర్లో 40 శాతం మంది సైబర్ దాడులకు బాధితులయ్యారు. దేశంలోని పది మందిలో ముగ్గురు ఒకటి లేదా అంతకన్నా ఎక్కువ సార్లు సైబర్ దాడుల బారిన పడి మోసపోతున్నారని స్టడీ తేల్చింది.

మెట్రోల్లో హైదరాబాద్ సెకండ్

ఇక, మెట్రో సిటీల్లో జరిగిన నేరాల్లో చెన్నై టాప్ ప్లేస్లో ఉంది. పోయిన క్వార్టర్ (త్రైమాసికం)తో పోలిస్తే ఇప్పుడు 2 శాతం కేసులు తగ్గినా, 46 శాతం కేసులతో టాప్లో ఉందని రిపోర్టు వెల్లడించింది. ఈ జాబితాలో 41 శాతం కేసులతో హైదరాబాద్, కోల్కతాలు సెకండ్ ప్లేస్లో ఉన్నాయి. పోయిన క్వార్టర్తో పోలిస్తే హైదరాబాద్లో 2 శాతం కేసులు పెరిగాయి. బెంగళూరులో 39 శాతం, పుణేలో 35 శాతం మంది సైబర్ నేరగాళ్ల బారిన పడ్డారు. అహ్మదాబాద్లో 37 శాతం కేసులు నమోదయ్యాయి. 1 శాతం తగ్గింది. ముంబైలో 30 శాతం మంది మోసపోయారు. ఇక, పోయిన త్రైమాసికంతో పోలిస్తే ఢిల్లీలో 6 శాతం కేసులు పెరిగాయి. ఏ మెట్రో సిటీతో పోల్చినా నేరాల పెరుగుదలలో ఢిల్లీనే టాప్. అక్కడ 34 శాతం మంది సైబర్ దాడుల బారిన పడ్డారు.

ఇవీ కారణాలు..

వివిధ మొబైల్స్, సెక్యూరిటీ సిస్టమ్లోని లోపాలను ఆసరాగా చేసుకుని సైబర్ నేరగాళ్లు రెచ్చిపోతున్నట్టు రిపోర్టు వెల్లడించింది. విండోస్, ఐవోస్ రెండు సిస్టమ్లలోనూ లోపాలున్నట్టు చెప్పింది. ఐఫోన్లోని ఐమెసేజ్, సిరిల్లోని లోపాలు సైబర్ నేరగాళ్లకు దారులు చూపుతున్నాయని చెప్పింది. ఇక, విండోస్లోని రిమోట్ డెస్క్టాప్ ప్రొటోకాల్ కూడా సైబర్ దాడులకు వల్నరబుల్గా మారినట్టు చెప్పింది. దాంతో పాటు ఇంటర్నెట్లోని వర్చువల్ ప్రైవేట్ నెట్వర్క్స్(వీపీఎన్) ద్వారా కూడా సైబర్ నేరగాళ్లు యూజర్ల మొబైళ్లు, కంప్యూటర్లలోకి చొరబడిపోతున్నారని పేర్కొంది.

విండోస్: దీంట్లో అతిపెద్ద సమస్య యూఎస్బీ స్టోరేజ్ డివైజ్ ఆధారిత మాల్వేర్. దాంతో పాటు ట్రోజన్స్, పొటెన్షియల్లీ అన్వాంటెడ్ ప్రోగ్రామ్స్, యాడ్వేర్, డిసెప్టర్స్, కాయిన్మైనర్స్ వంటివీ దాడులు ఈజీ అయ్యేలా చేస్తున్నాయి.

మొబైల్స్: మొబైల్స్లో సైబర్ ఎటాక్లకు అతిపెద్ద కారణం యాడ్వేర్. కొత్తగా వచ్చిన యాండ్రాయిడ్ మాల్వేర్లూ దాడులకు బాటలు వేస్తున్నాయి.

మ్యాక్: గతంతో పోలిస్తే ఇప్పుడు మ్యాక్పైనా ఎటాక్లు పెరిగిపోయాయి. పీయూపీలు, యాడ్వేర్, అవసరం లేని అప్లికేషన్ల ద్వారా సైబర్ నేరగాళ్లు చొరబడిపోతున్నారు. పీయూపీ కేటగిరీలో యాడ్వేర్తో చేస్తున్న దాడుల వాటా 55 శాతం. అవసరం లేని యాప్ల ద్వారా 42 శాతం, కాయిన్మైనర్ ద్వారా మరో 3 శాతం దాడులు జరుగుతున్నాయి.

నేరగాళ్లు అప్ డేట్ అవుతున్నరు

‘‘నేరగాళ్లు ఎప్పటికప్పుడు అప్ డేట్ అవుతున్నారు. ఇది ఇటు కంపెనీలకు, అటు యూజర్లకు పెద్ద ముప్పే తెచ్చి పెడుతుంది. పెరుగుతున్న ఇంటర్నెట్ వాడకంతో సైబర్ దాడుల ముప్పు మరిం త పొంచి ఉంది. కాబట్టి వచ్చే ఏడాది కంపెనీలకు పెద్ద పరీక్షే. చిన్నా పెద్ద అన్న తేడా లేకుండా కంపెనీలు సైబర్ దాడుల నుంచి రక్షించుకునేలా యూజర్లకు అవగాహన కల్పించాలి. ప్రభుత్వమూ అవేర్ నెస్ పెంచాలి’’- జే కేశవర్ధనన్ , ఫౌండర్ , సీటీవో, కే7 కంప్యూటింగ్