- మూడు రోజుల పసికందు మృతి
- జనగామ జిల్లాలో అమానవీయ ఘటన
స్టేషన్ ఘన్పూర్, వెలుగు: తల్లి ఒడిలో సేదదీరాల్సిన 3 రోజుల పసికందు నడుముకు బండరాయి కట్టి నీటిలో పడేసి చంపేశారు. ఈ అమానవీయ ఘటన జనగామ జిల్లా స్టేషన్ఘన్పూర్లో బుధవారం చోటుచేసుకుంది. పోలీసుల కథనం ప్రకారం..స్టేషన్ఘన్పూర్ శివారు తాటికొండ రోడ్డులోని దేవాదుల రిజర్వాయర్లో బుధవారం ఓ పసికందు డెడ్బాడి తేలియాడుతుండడంతో అటువైపు వెళ్లిన స్థానికులు గమనించారు. వెంటనే పోలీసులకు సమాచారం ఇచ్చారు. దీంతో సీఐ ఆదేశాల మేరకు ఎస్సై శ్రావణ్కుమార్ తన సిబ్బందితో రిజర్వాయర్ దగ్గరకు చేరుకున్నారు.
కొందరు ఈతగాళ్లను పిలిపించి వారి సాయంతో నీళ్లలో తేలుతున్న పసికందు మృతదేహాన్ని రిజర్వాయర్ నుంచి బయటికి తీయించారు. అయితే, డెడ్బాడీ నడుముకు తాడు కట్టి ఉండడం..దానికి బండరాయి ఉండడంతో షాక్ తిన్నారు. విషయం బయటకు రావొద్దని బతికి ఉన్నప్పుడే బండ కట్టి పడేసి ఉంటారా అన్న అనుమానాలు వ్యక్తం చేశారు.
ఎస్ఐ మాట్లాడుతూ పసికందు మృతదేహాన్ని పోస్ట్మార్టం కోసం వరంగల్ ఎంజీఎం దవాఖానకు తరలించామని చెప్పారు. కేసు నమోదు చేసి దర్యాప్తు చేస్తున్నామని సీఐ రాఘవేందర్ తెలిపారు. త్వరలోనే అన్ని వివరాలు తెలుస్తాయన్నారు.
