గ్రేట్ హ్యాట్సాఫ్ : చెక్క గానుగ నూనెతో.. వేల కోట్ల వ్యాపారం..

సిబి మణివణ్ణన్​. చెక్క గానుగ నూనెల బిజినెస్​ చేస్తున్నాడు. ఈ మధ్య ఎక్కడ చూసినా అవే కనిపిస్తున్నాయిలే అనుకుంటుంటే కనుక మీ ఆలోచనకు అక్కడితో ఫుల్​స్టాప్​ పెట్టేయాలి. ఎందుకంటే తను ఉంటున్న కాలనీలో ఒక మూల చెక్కగానుగ షాప్​ పెట్టుకుని కూర్చోలేదు. ఇండియన్​ కిచెన్స్​లోకి మళ్లీ ఆ పాత నూనెల రుచులను చేర్చాడు. అంతేనా  ప్రపంచమంతా చెక్కగానుగ​ నూనెల సరఫరా చేస్తున్నాడు. 

తమిళనాడులోని త్రిచ్చీకి చెందిన మణివణ్ణన్​ చిన్నప్పుడు అమ్మ వేసిపెట్టే దోసెలు ఎంతో ఇష్టంగా తినేవాడు. చిన్నప్పుడెప్పుడో అమ్మ వేసిన దోసెల్ని తిన్న విషయం గుర్తుకొస్తే ఆ రుచి, వాసన మనసును తడుముతాయి. 30 ఏండ్ల తర్వాత కూడా అదే పిండి, అదే దోసె... కానీ అంత రుచిగా ఎందుకు ఉండట్లేదు? ఇదే ప్రశ్న అతన్ని చెక్కగానుగ నూనెల తయారీ వైపు మళ్లించింది. రోబోటిక్​ ఇంజినీర్​ అయిన సిబి నాలుగేండ్లలో ఎనిమిది కోట్ల విలువ చేసే కోల్డ్​ ప్రెస్డ్​ ఆయిల్​ బిజినెస్​ను విస్తరించగలిగాడు.  ఆ జర్నీ గురించి తన మాటల్లోనే...

నా బిజినెస్​ గురించి చెప్పేముందు మా తాత గురించి చెప్పాలి. మా తాత 1960–70ల మధ్యలో చెక్క గానుగ నూనెను తయారుచేసి మా ఊరితో పాటు చుట్టుపక్కల గ్రామాల్లో అమ్మేవాడు. గానుగలో పల్లీ, కొబ్బరి, పొద్దుతిరుగుడు గింజల్ని నలగ్గొట్టి నూనె తీసేవారు. ఆ నూనెను వేడిచేయకుండానే ప్యాక్​ చేసి అమ్మేవారు.1990 చివర్లో కమర్షియల్​ బ్రాండ్​ నూనెలు మార్కెట్​లోకి వెల్లువలా వచ్చిపడ్డాయి. దాంతో ట్రెడిషనల్​ నూనె తయారుచేసేవాళ్ల పనిమీద దాని ఎఫెక్ట్​ పడింది. అలా వాళ్లంతా వేరే బిజినెస్​ల్లోకి మారిపోయారు.

మా నాన్న ఆటోమొబైల్​ మాన్యుఫాక్చరింగ్​ బిజినెస్​ వైపు మళ్లాడు. మా కుటుంబం మాత్రం ఫ్రెండ్స్​, తెలిసిన వాళ్లకి గానుగ నూనె తయారుచేసి ఇస్తూనే ఉంది. రోబోటిక్స్​ అండ్​ ఆటోమేషన్​లో నా గ్రాడ్యుయేషన్​ 2015లో పూర్తయింది. ఆ తరువాత ఫ్యామిలీ బిజినెస్​ అయిన ఆటోమొబైల్​ డీలర్​షిప్స్​, రెస్టారెంట్​ నడిపే పనులు చేయడం మొదలుపెట్టా. రెస్టారెంట్​ కోసం బల్క్​లో నూనెలు కొనడానికి ఒకసారి మార్కెట్​కి వెళ్లా. అప్పుడు ఆ నూనెల్లో కెమికల్​ సాల్వెంట్స్​ను ఎక్కువ మోతాదులో వాడుతున్నట్టు, కల్తీ జరుగుతున్నట్టు గమనించా. తక్కువ రేటుకు దొరికే పామాయిల్​, పత్తి నూనెలను వంటనూనెల్లో కలిపి ఎలా కల్తీ చేస్తున్నారో స్పష్టంగా అర్థమైంది. మరీ ముఖ్యంగా పల్లీ నూనెలో 80 శాతం కాటన్​ సీడ్​ ఆయిల్​ లేదా రైస్​ బ్రాన్​ ఆయిల్​ కలుపుతున్నారు. 

వామ్మో! ఇలాంటి నూనెలతో వండుకుని తింటే హెల్త్​ ప్రాబ్లమ్స్​ రాక ఏమొస్తాయి? అనిపించింది. అప్పుడు నాకు మా తాత మంచి వంటనూనెను స్టోన్​ మిల్​తో తయారుచేసే విషయం గుర్తుకొచ్చింది. రెండు తరాల క్రితమే లోకల్​గా స్టోన్​ మిల్స్​, మినిమల్​ ప్రాసెస్​లో ప్రిజర్వేటివ్స్​ కలపకుండా ఆరోగ్యకరమైన​ నూనె తయారుచేశారు. ఆ నూనెలను ప్రాసెస్​ చేయడం తక్కువే. అలాగే నిల్వ ఉండడం కోసం ఏ పదార్థాలు కలిపేవారు కాదు. అందుకే ఆ నూనెలతో వండిన వంటకాలు రుచిగా ఉండేవి. ఆ రుచులు ఒక జ్ఞాపకంగా ఉండకూడదు. వాటికి జీవం పోయాలి అనుకున్నా. మా తాతకు జ్ఞాపకంగా, రిఫైన్డ్​ ఆయిల్స్​కి ఆల్టర్నేటివ్​గా ‘ గ్రామియా’ను 2017లో నా కాలేజీ ఫ్రెండ్స్​ మొహమ్మద్​ యాసీన్​, నవీన్​ రాజంరన్​తో కలిసి మొదలుపెట్టా. 

ట్రెడిషనల్​ ఆయిల్ మేకింగ్​కు మోడర్న్​ టచ్​

గానుగ నూనెల తయారీకి ఆటోమేషన్​ తోడవడం వల్ల తయారీలో వేగం, శుభ్రత పెరిగాయి. ఆటోమేటెడ్​ ఆయిల్​ మేకింగ్​ మెషిన్​ను ట్రయల్​ అండ్​ ఎర్రర్​గా తయారుచేశా. రెండేండ్లు రీసెర్చ్​ చేసి మాన్యుఫాక్చరింగ్​ ప్రాసెస్​ను ఫైనలైజ్​చేశా. నూనె తీయడానికి వాడే రాళ్లను సెంట్రల్​, స్టేట్​ గవర్నమెంట్​అప్రూవల్​ తీసుకున్నాక క్వారీల నుంచి తెప్పించా. 2018లో దుబాయిలో ‘గల్​ఫుడ్’​ ఎగ్జిబిషన్​కు వెళ్లినప్పుడు అక్కడ యుఎస్​కి చెందిన ఒకతనితో పరిచయం అయింది. అతను జ్యూస్​, డెయిరీ బాక్స్​లు, క్లీనింగ్ సొల్యూషన్స్​ ప్యాకేజింగ్​ మెటీరియల్స్​లో స్పెషలైజేషన్​ చేశాడు. ఆయన తయారుచేసిన కార్టన్స్​లో గ్రామియాలో తయారుచేసిన నూనెలు పోయొచ్చని శాంపిల్​గా కొన్ని కార్టన్స్​ తెచ్చి వాటిలో నూనెలు నింపాడు. 

అయితే అది పేపర్​ ప్యాకేజింగ్​ కావడం వల్ల పేపర్​ నూనెలు పీల్చుకుంది. వాటితో లాభం లేదనిపించింది. ఆ తరువాత జర్మనీకి చెందిన పేపర్​ మాన్యుఫాక్చర్​ నుంచి మెటీరియల్ తెప్పించా. ఆయన రెండు నెలలపాటు ఎకో ఫ్రెండ్లీ, డ్యూరబుల్​ డిజైన్​ కోసం శ్రమపడ్డాడు. టేబుల్​టాప్​ ప్యాకింగ్ మెషిన్స్​ను యుఎస్​ నుంచి తెప్పించి చివరకు ఇప్పుడు మీరు చూస్తున్న ప్యాకేజ్​ కార్టన్స్​ను ఫైనల్​  చేశాం. ఇప్పుడు ఈ ఆయిల్ డబ్బాను రీసైకిలింగ్ యూనిట్​కి మీరు ఇచ్చేయొచ్చు. వాళ్లు కార్టన్​ బయటి పేపర్​ ప్యాకేజింగ్​ను తీసి, లోపల ఉన్న అల్యూమినియంను తిరిగి వాడతారు. క్యాప్​ ఒక్కటే ప్లాస్టిక్​ మెటీరియల్​.

అందుకే అక్కడ మొదలుపెట్టాం

త్రిచ్చీలో అయితే అగ్రికల్చర్​కి దగ్గరగా ఉంటుంది. ఫ్రెష్​, రా మెటీరియల్స్​ దొరుకుతాయి అనుకున్నాం. అంతేకాకుండా అక్కడి వాతావరణం వేడిగా, పొడిగా ఉంటుంది. అది మా ప్రాసెస్​కు చాలా అవసరం. గింజల నుండి నూనె తీసేముందు వాటిని ఎండపెట్టడానికి బాగుంటుంది. తమిళనాడు, రాజస్తాన్​, కేరళ నుంచి తక్కువ తేమ ఉన్న గింజలు తీసుకొస్తాం. నిజానికి చాలా ఆయిల్​ కంపెనీలు తక్కువ ధరకు తేమ తీయని గింజలు కొని వాడుతుంటాయి. రేటు ఎక్కువైనా మేం మాత్రం తక్కువ తేమ ఉన్న గింజలనే తెస్తాం. వాటిని ఒక రోజంతా ఎండపెడతాం. మా ప్రాసెస్​ చెప్పేముందు రిఫైన్డ్​ నూనెలు ఎలా తయారుచేస్తారో మీకు తెలియాలి. 

రిఫైన్డ్​ నూనెలు తయారీకి రెండు పద్ధతులు వాడతారు. అవి ఎక్స్​పెల్లర్​ అండ్​ సాల్వెంట్​ ఎక్స్ ట్రాక్షన్​ అని రెండు పద్ధతులు. ఎక్స్​పెల్లర్ పద్ధతి​లో గింజలను వేగించి, హై స్పీడ్ మెషిన్​లో నలగ్గొడతారు. నూనె బయటకు వచ్చేప్పటికి దాని టెంపరేచర్​ 120 డిగ్రీలు ఉంటుంది. అంత టెంపరేచర్​లో ఉండడం వల్ల ఆరోగ్యానికి మేలుచేసే వాల్యూస్​ అన్నీ పోతాయి. సాల్వెంట్ ఎక్స్​ట్రాక్షన్​లో కెమికల్​ సాల్వెంట్స్​ను కలిపి గింజల్లో ఫ్యాట్స్​ తీసేస్తారు. నూనె టెంపరేచర్​ ఎందుకు పెంచుతారంటే నూనె క్వాంటిటీ పెంచుకునేందుకు. ఎక్కువ వేడిచేస్తే నూనెలోని ట్రాన్స్​ ఫ్యాట్​ కంటెంట్​ విడిపోయి క్వాంటిటీ పెరుగుతుంది. ఇలాంటి నూనె కార్డియోవాస్కులార్​ రిస్క్​ను పెంచుతుంది. ఇంటర్నేషనల్​ జర్నల్​ ఆఫ్​ ఫుడ్​ అండ్​ న్యూట్రిషనల్​ సైన్స్​ వాళ్లు 2022 లో చేసిన ఒక స్టడీ ప్రకారం ఇలాంటి  ప్రాసెస్​ వల్ల గింజల్లో ఉన్న సహజ సిద్ధమైన పోషకాలు, యాంటీఆక్సిడెంట్​లు పోతాయి. ఫైనల్​గా వచ్చిన ప్రొడక్ట్​లో ఫ్లేవర్​ ఉండదు. ఆరోగ్యానికి ఎటువంటి లాభం లేదని చెప్పింది.

గ్రామియాలో ఇలా...

అదే కోల్డ్ ప్రెస్డ్​లో అయితే రాయి, చెక్క రోకలి వాడతారు. ఇదివరకు రోజుల్లో ఎద్దుకి కాడె వేసి తిప్పే నూనె మిల్లుల మెథడ్​ మేం వాడేది. ఈ పద్ధతిలో చెక్క రోకలి నిమిషానికి 19–20 సార్లు చాలా నెమ్మదిగా తిరుగుతుంది. దీనివల్ల నూనె టెంపరేచర్​ 50 డిగ్రీలకు మించదు. అందుకే పోషకాలు, సువాసన, సాంద్రత​ ఎక్కడికీ పోవు. ఈ ప్రాసెస్​ అంతా ఆటోమేషన్​ చేయడం వల్ల ఒక్కో వ్యక్తి 20 కేజీల గింజలను ముప్పావుగంటలో నలగ్గొట్టగలుగుతున్నాడు. నూనె బయటకు వచ్చిన తరువాత దానిలో ఉండే చెత్తను వడకట్టేందుకు కాటన్​ ఫిల్టర్​ ఉంటుంది. 

శుభ్రమైన ఆ నూనె ట్యాంక్​లోకి పంపి, ఆ తరువాత ప్యాకేజ్​ చేసి డిస్ట్రిబ్యూట్​ చేస్తాం. ఈ ప్రాసెస్​లో స్టీల్​ గ్రైండర్స్, స్టీం బాయిలర్స్​ వాడతాం. నూనె తీశాక మిగిలే ఆయిల్ కేక్స్​ను గోలీల్లా మార్చి తమిళనాడులో ఉన్న డెయిరీ ఫామ్స్​కు పంపిస్తాం. అక్కడ పశువులకు పెడతారు. అలాగే పౌల్ట్రీ ఫామ్స్​లో ఆహారంగా కూడా వాడుతున్నారు. ఆయిల్​ కేక్స్​ను నలగ్గొట్టి ఆర్గానిక్​ ఫార్మర్స్​కి ఇస్తే... వాళ్లు ఫెర్టిలైజర్​గా వాడుతున్నారు.

పల్లీ, నువ్వుల నూనెల షెల్ఫ్​ లైఫ్​ ఒక ఏడాది ఉంటుంది. కొబ్బరి నూనె అయితే ఆరు నెలలలోపు వాడాలి. మేం తయారుచేసే నూనెలు చిక్కగా ఉంటాయి. దానివల్ల వంటకాల్లో తక్కువ నూనె పడుతుంది. వేపుళ్లు చేసేటప్పుడు ఈ విషయం మీకు బాగా తెలుస్తుంది. ఐదు లీటర్ల రిఫైన్డ్​ ఆయిల్​ ప్యాకెట్​ కంటే ఎక్కువ రోజులు మా బ్రాండ్​ నాలుగు లీటర్ల కాంబో వస్తుంది.  ప్రస్తుతానికి మా బ్రాండ్​లో నుండి పల్లీ నూనె బెస్ట్ సెల్లర్​. లీటర్​ 410 రూపాయలు. కొబ్బరి, నువ్వుల నూనెలు 440 నుంచి 620 రూపాయల వరకు ఉన్నాయి. కనగయం జాతి ఆవుల నుంచి తీసిన ఎ2 నెయ్యిని 500 మిల్లీ లీటర్లు 990 రూపాయలకు అమ్ముతున్నాం​. 

మార్కెట్​లో ఉన్న ప్రొడక్ట్స్​ కంటే మా ప్రొడక్ట్స్​ రేటు ఎక్కువనే విషయం మేం కూడా అంగీకరిస్తాం. అందుకు కారణం లేకపోలేదు. ఎక్స్​పెల్లర్​ పద్ధతిలో ఒక కేజీ రా మెటీరియల్​కి 500 మిల్లిలీటర్ల నూనె తీయొచ్చు. కానీ మా ట్రెడిషనల్​ పద్ధతిలో అదే మోతాదు రా మెటీరియల్​కి 300 మిల్లీ లీటర్ల నూనె మాత్రమే వస్తుంది. అందుకే మా ప్రొడక్ట్స్​ రేట్లు కాస్త ఎక్కువ. అయితే కమర్షియల్​గా తయారవుతున్న మిగతా నూనెలతో పోలిస్తే మా నూనెలు హెల్దీ. నూనె వాడే విషయంలో కూడా జాగ్రత్తగా ఉండాలి. ఒకే నూనెని ఎక్కువ కాలం వాడకూడదు. ఒక నూనె వాడాక మరొక నూనె వాడడం అనేది మంచి పద్ధతి.

సక్సెస్ హైవే

చెన్నయ్​, బెంగళూరు, హైదరాబాద్​, ముంబయి, ఢిల్లీల్లో మైక్రో వేర్​హౌజ్​లను తెరిచాక లాభాలు పెరిగాయి. మామూలుగా అయితే ఇతర బ్రాండ్​లకు ఒకటే వేర్​హౌజ్​ ఉండి, పాపులర్ డెలివరీ పార్ట్​నర్స్​తో కలిసి ప్రొడక్ట్​ను డెలివరీ చేస్తాయి. మైక్రో వేర్​హౌజ్​ల వల్ల ఆర్డర్​ వచ్చిన మరుసటి రోజు డెలివరీ చేయగలుగుతున్నాం. అదికూడా లోకల్​ డెలివరీ కంపెనీల సాయం తీసుకుని.  ఎక్కువమంది కస్టమర్లు ప్రొడక్ట్​ కొనడంతో డెలివరీ కాస్ట్ కూడా తగ్గిపోయింది. మా పొడ్రక్ట్​కి ఇంటర్నేషనల్​ ఆర్గనైజేషన్​ ఫర్​ స్టాండర్డైజేషన్​ (ఐఎస్​ఓ)22000, యుఎస్​ ఫుడ్​ అండ్​ డ్రగ్​ అడ్మినిస్ట్రేషన్​ (ఎఫ్​డిఎ) ఆమోదం 2020లో వచ్చింది. 

యుఎస్​లో దక్షిణాది వాళ్లు ఎక్కువగా ఉండే న్యూ జెర్సీ, మిడిల్​ ఈస్ట్​లో లులు మార్కెట్స్​లో ప్రొడక్ట్ సేల్​ బాగుంది. ప్రతి నెలా యుఎస్​కి పాతికవేల లీటర్లు పంపిస్తున్నాం. దాదాపు 50 లక్షల రూపాయలు నెలకి ఎక్స్​పోర్ట్స్​ ద్వారానే వస్తుంది. మిగతా సగం ఇక్కడి అమ్మకాల్లో వస్తుంది. కెనడా, యుకె, మిడిల్​ ఈస్ట్​, సింగపూర్, మలేసియాల్లో ఉన్న ఎన్​ఆర్​ఐల కోసంమార్కెట్​ విస్తరించే ఆలోచనలో ఉన్నాం. ఏడాది కాలంగా స్టార్​ హోటల్స్​, ఆయుర్వేద హాస్పిటల్స్​ క్యాంటీన్స్​ వాళ్లు మమ్మల్ని అప్రోచ్​ అయ్యారు. అడయార్​ ఆనంద భవన్​ వాళ్లు కూడా ఒక్కో అవుట్​ లెట్​కు వంద లీటర్ల ఆయిల్​ తీసుకుంటున్నారు. అమెజాన్​, జియోమార్ట్​, ఫ్లిప్​కార్ట్, బిగ్​ బాస్కెట్​ వంటి ఇ–కామర్స్​ వెబ్​సైట్స్​లో కూడా మా ప్రొడక్ట్​ ఉంది. 

ప్రస్తుతం రెండింట మూడో వంతు ఆదాయం మా వెబ్​సైట్​ నుంచి వస్తుంది. మా కీ– డెలివరీ పార్ట్​నర్ డున్​జో​. కొవిడ్​–19 ప్యాండెమిక్​ అప్పుడు ఆఫ్​లైన్​ స్టోర్​లో కొనే మా పాత కస్టమర్లకు డెలివరీ ఇచ్చేందుకు డున్​జో చాలా బాగా పనిచేసింది. చెన్నయ్​లో అమ్మా నాన్న సూపర్​మార్కెట్​లో, బెంగళూరులోని కొన్ని స్టోర్స్​లో మా ప్రొడక్ట్స్​ ఉంచాలనుకుంటున్నాం. దక్షిణాదిన సక్సెస్​ అయింది. ఇక ఉత్తర భారత్​, ఈశాన్య రాష్ట్రాల్లో ఆముదం నూనె తయారీని లాంచ్​ చేస్తున్నాం. ఇవేకాకుండా సెకండరీ ఆయిల్స్​ అయిన వేప, అవిసె, మునగ నూనెలు తయారుచేసే ఆలోచనలో ఉన్నాం” అని చెప్పాడు సిబి​.