హైదరాబాద్: రాష్ట్ర రాజధాని హైదరాబాద్లో కల్తీ ఫుడ్ తయారీపై ఫుడ్ సేఫ్టీ అధికారులు ఉక్కుపాదం మోపుతున్నారు. నిత్యం నగరంలోని పలు చోట్ల ఆకస్మిక తనిఖీలు చేస్తూ కల్తీ రాయుళ్ల భరతం పడుతున్నారు. ఈ క్రమంలోనే శుక్రవారం (నవంబర్ 29) రాజేంద్రనగర్లోని స్కై ఫుడ్ ప్రొడక్ట్స్లో ఫుడ్ సేఫ్టీ అధికారులు తనిఖీలు చేపట్టారు. చిన్నపిల్లలు తినే చాక్లెట్లను అపరిశుభ్రంగా దుమ్ము ధూళిలోనే తయారు చేస్తున్నట్లు గుర్తించారు.
మ్యానుఫ్యాక్చరింగ్, ఎక్స్పైరీ డేట్ లేకుండానే ప్రొడక్ట్స్ను షాప్స్కు సప్లై చేస్తున్నట్లు గుర్తించి నిర్వాహకులపై ఆగ్రహం వ్యక్తం చేశారు. 950 కిలోల కోకో పౌడర్, 75 కిలోల కలర్డ్ షుగర్ కోటెడ్ సోంపును అధికారులు సీజ్ చేశారు. ఫుడ్ ప్రొడక్ట్స్ శాంపిల్స్ సేకరించి ల్యాబ్కి పంపారు. అనంతరం నిర్వాహకులకు ఫుడ్ సేఫ్టీ అధికారులు షో కాజ్ నోటీసులు జారీ చేశారు. ఫుడ్ సేఫ్టీ నిబంధనలకు విరుద్ధంగా వ్యవహరించి ప్రజల ప్రాణాలతో చెలగాటమాడితే కఠిన చర్యలు తప్పవని ఈ సందర్భంగా అధికారులు హెచ్చరించారు.
