వనపర్తి, వెలుగు: వినియోగదారులకు కూరగాయలు, మాంసం, చికెన్, చేపలు, పండ్లు ఒకే చోట అందించడంతో పాటు వ్యాపారులంతా ఒకే చోట తమ వస్తువులు అమ్ముకునేందుకు చేపట్టిన ఇంటిగ్రేటెడ్ మార్కెట్లు అందుబాటులోకి రాలేదు. వనపర్తిలో పూర్తయినా ప్రారంభించకపోగా, మిగిలిన చోట పనులు పెండింగ్లో ఉన్నాయి. వనపర్తి జిల్లాలోని ఐదు మున్సిపాలిటీల్లో ఇంటిగ్రేటెడ్ మార్కెట్ నిర్మాణాలను రెండేండ్ల కింద ప్రారంభించారు. ఒక్క జిల్లా కేంద్రంలోనే పాత అగ్రికల్చర్ మార్కెట్ యార్డులో నిర్మించిన ఇంటిగ్రేటెడ్ మార్కెట్ పనులు పూర్తి కాగా, పెబ్బేరు, కొత్తకోట, ఆత్మకూరు, అమరచింత మున్సిపాలిటీల్లో పనులు ఇంకా కొనసాగుతూనే ఉన్నాయి.
రోడ్ల పక్కనే అమ్మకాలు..
జిల్లాలోని ఐదు మున్సిపాలిటీల్లో కూరగాయలు, పండ్లు, నాజ్వెజ్ వ్యాపారులు రోడ్ల పక్కనే అమ్ముతున్నారు. ఇంటిగ్రేటెడ్ మార్కెట్లు పూర్తయితే వారంతా ఒకే కాంప్లెక్స్లో అమ్మకాలు చేసుకునే అవకాశం ఉంది. రోడ్ల పక్కనే కూరగాయలు, మాంసం, చేపలు అమ్ముతుండడంతో దుమ్ము, ధూళితో వ్యాపారులు ఇబ్బంది పడుతుండగా, వాటిని కొనేందుకు వెనకాడుతున్నారు. వర్షాకాలం, వేసవిలో ఇబ్బంది పడుతున్నామని వ్యాపారులు వాపోతున్నారు.
నిర్మాణాలు ఇలా...
- వనపర్తిలోని పాత అగ్రికల్చర్ మార్కెట్ యార్డులో రూ.19.50 కోట్లతో నిర్మించిన మార్కెట్ పూర్తయింది. చిరు వ్యాపారులకు షెడ్లు కేటాయించడమే ఆలస్యం. పట్టణం నడిబొడ్డున ఈ మార్కెట్ ఉండడంతో వినియోగదారులకు ఎంతో సౌకర్యంగా ఉంటుంది.
- పెబ్బేరు పట్టణంలోని అగ్రికల్చర్ మార్కెట్ యార్డులో ఇంటిగ్రేటెడ్ మార్కెట్ నిర్మాణానికి రూ.2 కోట్లు మంజూరయ్యాయి. స్లాబ్ లెవల్ వరకు నిర్మాణం జరిగింది.
- కొత్తకోట, ఆత్మకూరు, అమరచింత మున్సిపాలిటీల్లో రూ.2 కోట్ల చొప్పున మంజూరు చేసి చేపట్టిన మార్కెట్ పిల్లర్ల దశలోనే ఉన్నాయి.
వినియోగంలోకి తెస్తాం..
వనపర్తిలోని ఇంటిగ్రేటెడ్ మార్కెట్ నిర్మాణం పూర్తయింది. ఎన్నికల అనంతరం పూర్తి స్థాయిలో వినియోగంలోకి తెచ్చేలా చర్యలు తీసుకుంటున్నాం.
పూర్ణచందర్, మున్సిపల్ కమిషనర్
