భద్రాచలం, వెలుగు: భద్రాచలం సమీపంలోని ఎటపాక(ప్రస్తుతం ఏపీలో విలీన గ్రామం)లో నిర్మించిన రామాయణం థీమ్ పార్క్లో కొందరు స్థానికులు గుడిసెలు వేసుకునేందుకు సోమవారం ప్రయత్నించారు. విషయం తెలుసుకున్న భద్రాచలం దేవస్థాన ఈవో శివాజీ.. తన సిబ్బందితో సంఘటనా స్థలానికి చేరుకున్నారు. ఈక్రమంలో దేవస్థానం స్టాఫ్కు, ఆక్రమణదారులకు మధ్య వాగ్వాదం జరిగింది. దీంతో ఈవో శివాజీ, ఎటపాక మండల పోలీసులకు సమాచారం ఇచ్చారు. సీఐ, ఎస్సై పార్క్ వద్దకు చేరుకున్నారు.
ఆక్రమణదారులను చెదరగొట్టారు. కాగా, ఉమ్మడి ఏపీలో అప్పటి టూరిజం డెవలప్మెంట్ కార్పొరేషన్ 15 ఎకరాల్లో రామాయణం థీమ్ పార్క్ నిర్మించింది. విభజన అనంతరం అది విలీన గ్రామంలోకి వెళ్లిపోయింది. ఇటీవల ఆంధ్రాకు చెందిన కొందరు నేతలు థీమ్ పార్క్ భూముల్లో పక్కా భవనాలు కడుతుండగా.. దేవస్థానం స్టాఫ్ అడ్డుకుని, ఆ తర్వాత వదిలేశారు. దీంతో తాము సైతం గుడిసెలు వేసుకుంటామని కొంతమంది స్థానికులు థీమ్ పార్క్ భూముల్లోకి చొరబడ్డారు. ప్రస్తుతం ఇరు వర్గాల మధ్య చర్చలు నడుస్తున్నాయి.
