నటుడిగానే కాకుండా రచయిత, సంగీత కళాకారుడిగా కూడా తనకంటూ ఒక ప్రత్యేకమైన గుర్తింపు తెచ్చుకున్నాడు ఈ బాలీవుడ్ నటుడు. కేన్స్, సన్డాన్స్ ఫిల్మ్ ఫెస్టివల్స్లో అధికారికంగా పోటీపడిన ఏకైక ఇండియన్ యాక్టర్ కూడా ఇతనే. అతనెవరోకాదు.. శశాంక్ అరోరా. తన గురించి ఇంట్రెస్టింగ్ సంగతులు ఇవే.
న్యూఢిల్లీకి చెందిన శశాంక్ తండ్రి గ్రాఫిక్ డిజైనర్, తల్లి రచయిత కాగా శశాంక్కి సిస్టర్ పెయింటర్. ఇలా ఇంట్లో వాళ్లంతా కళలపై మక్కువ చూపేవారు. వాళ్లతో కలిసి ఆర్టిస్టిక్ ప్రపంచంలో పెరగడం వల్లే తనకు కూడా కళలపై ఆసక్తి వచ్చిందంటాడు అరోరా. మొదటి నుంచి వాళ్ల ప్రభావం తన మీద ఉండేది. పైగా స్వతహాగా శశాంక్కి సంగీతం, నాటకాలు వేయడం అంటే చాలా ఇష్టం ఉండేది. దాంతో హైస్కూల్ చదువు పూర్తవ్వగానే పై చదువుల కోసం కెనడా వెళ్లాడు. అక్కడ చదువుతోపాటు నటన, ఫిల్మ్ మేకింగ్, మ్యూజిక్ కూడా నేర్చుకున్నాడు. మానవ హక్కుల కోసం పోరాడే యాక్టివిస్ట్లకు చెందిన వీధి నాటకాలు వేసే గ్రూపులో చేరాడు. ఢిల్లీలోనూ వీధి నాటకాల్లో నటించాడు.
2008లో ముంబైకి వచ్చిన శశాంక్ రెండేండ్లపాటు యాక్టింగ్ కోర్సు చేశాడు. ఆ తర్వాత యాక్టింగ్ ఇనిస్టిట్యూట్లో గెస్ట్ టీచర్గా, కాస్టింగ్ డైరెక్టర్ దగ్గర అసిస్టెంట్గా పనిచేశాడు. అలా చేస్తూనే యాక్టింగ్ ఆఫర్స్ కోసం ప్రయత్నాలు చేసేవాడు. ‘మ్యోహో’ అనే సినిమాతో 2012లో సినిమాల్లో సపోర్టింగ్ పాత్రలో నటించాడు. 2014లో ‘టిట్లీ’ సినిమాతో ప్రేక్షకులకు దగ్గరయ్యాడు. ఆ సినిమా కేన్స్ ఫిల్మ్ ఫెస్టివల్లో పోటీపడింది. ఆ సినిమాకు గాను శశాంక్ కూడా ఫిల్మ్ఫేర్, స్టార్డస్ట్, స్టార్ స్క్రీన్, జీ సినీ వంటి అవార్డ్లకు బెస్ట్ డెబ్యూ యాక్టర్గా నామినేట్ అయ్యాడు. 2016లో ‘బ్రహ్మన్ నమన్’ సినిమా సన్డాన్స్ ఫిల్మ్ ఫెస్టివల్లో పోటీపడింది. అలా ఈ రెండు ఫిల్మ్ ఫెస్టివల్స్లోనూ పోటీపడిన ఏకైక నటుడు శశాంక్.
ప్రస్తుతం సినిమాలతోపాటు మేడ్ ఇన్ హెవెన్, ది గ్రేట్ ఇండియన్ మర్డర్, తనావ్ వంటి వెబ్ సిరీస్లతో పలు భాషల్లో ఆడియెన్స్కి మరింత చేరువయ్యాడు. లేటెస్ట్గా ఓటీటీలో స్ట్రీమ్ అవుతోన్న ‘తనావ్ –2’ వెబ్ సిరీస్లో జునైద్ పాత్రలో తన నటనతో ఆకట్టుకుంటున్నాడు. తనావ్.. రెండు సీజన్లు కలిపి 24 ఎపిసోడ్లు ఉంటుంది. ఈ సిరీస్ సోనీలివ్లో తెలుగుతోపాటు మరో ఆరు భాషల్లో అందుబాటులో ఉంది.
తనావ్ 2లో జునైద్గా..
‘‘ఇందులో నా రోల్ పేరు జునైద్. సౌత్ కాశ్మీర్కి చెందిన కుర్రాడిగా కనిపిస్తా. చిన్నతనంలో అతను హింస, చావు, అన్యాయం వంటివి చూస్తూ పెరిగాడు. అక్కడ జరిగే పాలిటిక్స్, అక్కడి వారి మిషన్ ఎజెండా వంటివి తన మైండ్లో నాటుకుపోతాయి. ఇలాంటి క్యారెక్టర్ నేనెప్పుడూ చేయలేదు. జునైద్లాంటి ఒక మైండ్ సెట్ ఉన్న కాశ్మీరీ కుర్రాడిగా నటించడం చాలా కష్టం అనిపించింది.
ఆ కుర్రాళ్ల ఆలోచన చాలా భిన్నంగా ఉంటుంది. నా పాత్ర కొన్నిసార్లు భయపెడుతుంది కూడా. ఇకపోతే కాశ్మీరీ లాంగ్వేజ్ నేర్చుకోవడం చాలా కష్టం. దాంతో నేను ఉర్దూ, కశ్మీరీ మిక్స్ చేసి మాట్లాడాను. అది ఆడియెన్స్, మరీ ముఖ్యంగా రెండు భాషలూ వచ్చినవాళ్లు నేను మాట్లాడింది యాక్సెప్ట్ చేస్తారా? లేదా అని కొంచెం టెన్షన్ పడ్డాను. ఒక ఆర్టిస్ట్గా ఎవరికి నచ్చినా, నచ్చకపోయినా రియాలిటీని చూపించడం మా బాధ్యత.’’
ఆ సినిమాకు మ్యూజిక్..
కాలేజీలో ఉన్నప్పుడు మ్యుజీషియన్ అవ్వాలనుకునేవాడట శశాంక్. నటనకంటే మ్యూజిక్ ఇంకాస్త ఎక్కువ ఇష్టం అంటాడు. అందులోనే తనకు శాటిస్ఫాక్షన్ ఉంటుందంటాడు శశాంక్. ఆ ఇష్టంతోనే కెరీర్ బిగినింగ్లోనే మ్యూజిక్ టాలెంట్ని కూడా బయటపెట్టాడు. నివిన్ పౌలీ లీడ్‌ రోల్లో చేసిన ‘ముతొన్’ అనే మలయాళ సినిమాలో సలీం అనే పాత్రలో నటించే అవకాశం వచ్చింది. అయితే, ఆ సినిమాలోని ‘బిఖ్రే’ అనే పాటకు మ్యూజిక్ కంపోజ్ చేసి తన లక్ పరీక్షించుకున్నాడు.
అంతేనా... 2019లో విడుదలైన ఆ సినిమాకి మంచి రెస్పాన్స్‌ కూడా వచ్చింది. ఈ సినిమాకి బెస్ట్ సపోర్టింగ్ యాక్టర్ కేటగిరీలో ‘ఇండియన్ ఫిల్మ్ ఫెస్టివల్ సిన్సిన్నాటి’ అవార్డ్ కూడా సొంతం చేసుకున్నాడు. ఆ తర్వాత ఏడాది వరుసగా ‘మేరే సాథియాన్’, ‘ధమ్కీ’, ‘ఓడ్ టు బటర్ చికెన్ పార్ట్ –1’ వంటి పాటలు కంపోజ్ చేశాడు.
