కామారెడ్డి టౌన్, వెలుగు : ఇతర రాష్ట్రాల నుంచి మద్యం తెచ్చి కామారెడ్డి జిల్లాలో అమ్ముతున్న వ్యక్తులను అరెస్టు చేసినట్లు ఎక్సైజ్ ఆఫీసర్లు తెలిపారు. బుధవారం జిల్లా కేంద్రంలో ఉమ్మడి జిల్లాకు చెందిన ఎక్సైజ్ ఎన్ఫోర్స్మెంట్ డిప్యూటీ కమిషనర్ దశరథ్ తెలిపిన ప్రకారం.. ఈనెల 2న కామారెడ్డి జిల్లా సదాశివనగర్ మండలం కుప్రియాల్లో తనిఖీలు చేపట్టగా గోవా, హర్యానా మద్యం పట్టుబడగా ఇద్దరు వ్యక్తులను అరెస్టు చేశామన్నారు.
వీరిచ్చిన సమాచారంతో మరి కొన్ని చోట్ల దాడులు చేసి మరో 9 మందిని పట్టుకున్నట్టు తెలిపారు. మేడ్చల్ జిల్లా బౌరంపేట, బాచుపల్లి ఏరియాల్లో తనిఖీలు చేపట్టి మద్యం స్వాధీనం చేసుకున్నామని, దీని విలువ రూ.13.25 లక్షల విలువ ఉంటుందన్నారు. పట్టుబడిన వారిలో కుప్రియాల్కు చెందిన రాజ్కుమార్, వెంకట్రెడ్డి, నాగిరెడ్డిపేట మండలం పెద్ద ఆత్మకూర్కు చెందిన క్రిష్ణారెడ్డి, నారాయన్రెడ్డి, తాడ్వాయి మండలం ఎండ్రియాల్ వాసి చంద్రకాంత్రెడ్డి, హైదరాబాద్ కు చెందిన రమేశ్, ఆకాశ్, వై.వి.రెడ్డి, మదుసూధన్రెడ్డి ఉన్నట్టు వివరించారు. సమావేశంలో జిల్లా ఎక్సైజ్ సూపరిండెంట్ రవీంధర్ తదితరులు పాల్గొన్నారు.
