చాలావరకు నటీనటుల్ని స్క్రీన్ నేమ్స్తోనే గుర్తుపెట్టుకుంటారు ఆడియెన్స్. మొదట్లో ఏ క్యారెక్టర్ బాగా సక్సెస్ అవుతుందో ఆ పేరు గుర్తుండిపోతుంది. ఈమె పేరు కూడా అంతే.అసలు పేరు శ్వేత త్రిపాఠి శర్మ. కానీ, ఆడియెన్స్కి మాత్రం ‘గోలు గుప్తా’ అంటే తెలుస్తుంది. మీర్జాపూర్ వెబ్ సిరీస్లో చేసిన క్యారెక్టర్ పేరే గోలు గుప్తా. ఇప్పటికే మూడు సీజన్లు పూర్తి చేసుకున్న వెబ్ సిరీస్లో కూడా గోలు గుప్తా క్యారెక్టర్ ఉంది. రీసెంట్గానే మూడో సీజన్ రిలీజ్ అయ్యి ఓటీటీలో స్ట్రీమింగ్ అవుతోంది. శ్వేత త్రిపాఠి ఉరఫ్ గోలు గుప్తా జర్నీ గురించి ఆమె మాటల్లోనే...
‘‘మాది ఢిల్లీ. నాన్న ఐఏఎస్ ఆఫీసర్. అమ్మ టీచర్గా పనిచేసి రిటైర్ అయింది. చిన్నప్పుడు అండమాన్ అండ్ నికోబార్ ఐల్యాండ్లో కొన్నాళ్లు ఉన్నాం. తర్వాత ముంబైకి వెళ్లిపోయాం. అండమాన్లో ఉన్నప్పుడు చాలా ఎంజాయ్ చేశా. ప్రతి వారం ఐల్యాండ్స్కు పిక్నిక్కి వెళ్లేవాళ్లం. నా చదువు విషయానికొస్తే.. సెకండరీ ఎడ్యుకేషన్ వరకు న్యూఢిల్లీలో చదివా. ఆ తర్వాత నేషనల్ ఇనిస్టిట్యూట్ ఆఫ్ ఫ్యాషన్ టెక్నాలజీలో ఫ్యాషన్ కమ్యూనికేషన్ డిగ్రీ చేశా. 2018లో యాక్టర్, ర్యాపర్ అయిన చైతన్య శర్మని పెండ్లి చేసుకున్నా.
లాయర్ అవ్వాలనుకున్నా
నటనలోకి అడుగుపెట్టకముందు సొసైటీలో మార్పు తీసుకొచ్చేందుకు లాయర్ కావాలనుకున్నా. బయటకు వచ్చి మాట్లాడలేని వాళ్లకు నేను గొంతుక అవ్వాలనుకున్నా. న్యూస్ పేపర్ చదివేటప్పుడు కొన్ని వార్తలు నా మీద బాగా ఎఫెక్ట్ చూపించేవి. మాట్లాడడానికి నోరు రాక, బలం లేక, బలగం లేక ఉన్న వాళ్ల కోసం నిలబడాలి అనుకునేదాన్ని. కానీ లోలోపల ఎక్కడో నటించాలనే చిన్న కోరిక ఉండేది. నాన్న ఐఏఎస్, అమ్మ టీచర్, నా సిస్టర్ థియేటర్ ఆర్ట్స్ చేస్తోంది. సమ్మర్లో సరదాగా నా సిస్టర్తో కలిసి థియేటర్ వర్క్షాప్స్కి వెళ్లేదాన్ని.
అలా వెళ్లినప్పటికీ నా మైండ్లో నటనకు సంబంధించి ఎలాంటి గోల్స్ ఉండేవి కావు. కొన్నిసార్లు పలానాది చేయాలనే లక్ష్యం ఉండకపోవడమే మంచిది అనిపిస్తుంది. ఎందుకంటే అలాంటప్పుడు ఏది హ్యాపీగా అనిపిస్తే అది చేసుకుంటూ వెళ్లొచ్చు కదా!
ఓటీటీలో డిఫరెంట్ రోల్స్
నా ఫోకస్ స్టోరీ, నేను చేసే క్యారెక్టర్ మీదే ఉంటుంది. నేను ఎంచుకునే కథలు కాస్త వేరుగా ఉంటాయి. అదెలాగంటే.. సామాన్యమైన వ్యక్తులు ఎక్స్ట్రార్డినరీ ఫీట్లు చేస్తుంటారు. ఆ లైన్లో ఉండే కథలంటే నాకు ఇష్టం. అవకాశం వచ్చిన క్యారెక్టర్స్ చేస్తున్నా. అన్ని రకాల క్యారెక్టర్స్ సినిమాల్లో రావు. కానీ ఓటీటీలో ఆ ఛాన్స్ ఉంటోంది. ఓటీటీలో ఒకే రకమైన పాత్రలు కాకుండా రకరకాల పాత్రలు వస్తుంటాయి. ఇలాంటి పాత్రలే చేయాలని నేను అనుకోను. హెవీ డ్రామా, కాంప్లికేటెడ్ క్యారెక్టర్స్ ఉన్న స్క్రిప్ట్స్ వస్తే బాగుంటుంది అనిపిస్తుంది.
ఓటీటీ ప్లాట్ఫామ్లో నాకు అలాంటి పాత్రలు వస్తున్నాయి. నేను చేసిన సినిమాల్లో, వెబ్సిరీస్ల్లో ‘ఇలాంటి పాత్ర ఎందుకు చేసింది?’ అని ఆడియెన్స్కి అనిపించొచ్చు. కానీ నేను ఫలానా రోల్ చేస్తున్నాను అంటే అది ఎందుకు చేస్తున్నా అనేదానికి ఒక లెక్క ఉంటుంది. ఉదాహరణకు ‘కాలకూట్’ అనే వెబ్సిరీస్లో నేను నటించడానికి కారణం వ్యవస్థలో టాక్సిక్గా మారిన పురుషాధిక్యత. ఎదుటి వాళ్లను చాలా ఈజీగా జడ్జ్ చేయడం వంటి అంశాలు. అలాంటి స్క్రిప్ట్స్లో నటించడం నాకు ఇంట్రెస్ట్.
మీర్జాపూర్ విషయానికొస్తే...
‘మీర్జాపూర్’ వెబ్ సిరీస్లో నటించిన అందరికీ అది చాలా స్పెషల్. ఎందుకంటే మేం అనుకున్నదానికంటే హైట్స్కి తీసుకెళ్లారు ఆడియెన్స్. సిరీస్ని సూపర్ హిట్ చేశారు. అంతగా రీచ్ వచ్చిన ఈ సిరీస్ రెండో సీజన్ చేయాలి అన్నప్పుడు మామీద రెస్పాన్సిబిలిటీ పెరిగింది. దాన్ని ఒత్తిడి అనుకోకుండా బాధ్యతగా తీసుకున్నా. ఎందుకంటే ఎవరైనా మిమ్మల్ని బాగా ప్రేమిస్తే, దాన్ని వాళ్లకు తిరిగి ఇవ్వాలి. అప్పుడు ఇంకా ఎక్కువ పొందగలం. మీర్జాపూర్ సీజన్ 3 విషయానికొస్తే.. షూటింగ్ టైం అంతా సరదాగా గడిచిపోయింది.
ఎప్పటికప్పుడు ఆడియెన్స్ని సర్ప్రైజ్ చేయాలనిపిస్తుంది నాకు. ఎందుకంటే ఎప్పుడూ ఒకేలా కనిపిస్తే ఎలా? మన చుట్టూరా ఎన్నో ఎమోషన్స్ ఉంటాయి. అలా ఏ ఎమోషన్ ఎవరికి కనెక్ట్ అవుతుందో తెలియదు కదా! అందుకే నేను పలు రకాల ఎమోషన్స్ ఉన్న పాత్రల మీద ఎక్కువ ఫోకస్ చేస్తా. యాక్టర్గా నేను ఎన్నో జీవితాలను ఎక్స్పీరియెన్స్ చేస్తా. అలాగే వ్యక్తిగత జీవితంలో కూడా ట్రావెలింగ్ అంటే నాకు చాలా ఇష్టం. దానివల్ల రకరకాల అభిరుచులు, కల్చర్స్, ఫుడ్ వంటి ఎన్నో విషయాలు తెలుస్తాయి. ఈరోజు నేనిలా ఉండడానికి కారణం నేను చిన్నప్పట్నించీ చేసిన ట్రావెలింగ్. మా ఆయనకి కూడా ట్రావెలింగ్ అంటే ఇష్టం. అందుకే ఫ్రీ టైం దొరికితే టూర్ వేస్తుంటాం ఇద్దరం కలిసి.
అవకాశం బట్టి కెరీర్
విక్కీ కౌశల్ గర్ల్ఫ్రెండ్గా ‘మసాన్’లో నటించా. అందులో నా పాత్ర పేరు జెనియా ఖాన్. అప్పటినుంచి నాకు ఒక ఐడెంటిటీ వచ్చింది. టాటా స్కై, మెక్ డొనాల్డ్స్, వొడాఫోన్ వంటి బ్రాండ్స్ అడ్వర్టైజ్మెంట్స్లో కనిపించా. ‘ఫెమినా’ అనే మహిళా పత్రికకు ఫొటో ఎడిటర్గా కూడా పనిచేశా. సిట్కామ్ ‘క్యా మస్త్ హై లైఫ్’లో చేయడానికి ముందు ముంబైలో ‘పిక్సియాన్ ట్రైలర్ హౌస్’ అనే పోస్ట్ ప్రొడక్షన్ హౌస్లో పనిచేశా. సొంతంగా ‘ఆల్ మై టీ ప్రొడక్షన్స్’ అనే థియేటర్ కంపెనీ నడుపుతున్నా. ‘బిందాస్’ అనే మ్యూజిక్ ఛానెల్తో కలిసి వర్క్ చేశా.
ఆ తర్వాత తమిళంలో ‘మెహందీ సర్కస్’ అనే సినిమా అవకాశం వచ్చింది. ‘మీర్జాపూర్’ సిరీస్లో అవకాశం వచ్చింది. ‘గాన్ కేశ్’ అనే సినిమాలో అలోపేషియా వ్యాధి వల్ల జుట్టు కోల్పోయిన యువతిగా, ఆత్మస్థైర్యం కోల్పోయిన డాన్సర్ రోల్ చేశా. టీవీఎఫ్ ‘ట్రిప్లింగ్’లో నటించా. అందులో నా పాత్రకు చాలా మంచి రెస్పాన్స్ వచ్చింది. ఆ తర్వాత ‘లాఖోం మే ఏక్’ సీజన్2లో డాక్టర్ శ్రేయాగా లీడ్ రోల్ చేశా. సినిమా, ఓటీటీ అని తేడా లేకుండా ఎందులో అవకాశం వస్తే అది చేస్తున్నా.
- ప్రజ్ఞ
