పశ్చిమాసియాలో టెన్షన్​..ఇజ్రాయెల్, ఇరాన్ మధ్య యుద్ధ వాతావరణం

•     సౌత్ లెబనాన్​పై ఇజ్రాయెల్ వైమానిక దాడి
•     ఐదుగురు హెజ్​బొల్లా ఫైటర్స్ మృతి
•     నార్త్ ఇజ్రాయెల్​లోని సైనిక స్థావరంపై హెజ్​బొల్లా ప్రతి దాడి​

జెరూసలేం : పశ్చిమాసియాలో పరిస్థితి నివురుగప్పిన నిప్పులా ఉంది. ఇజ్రాయెల్, ఇరాన్ దేశాల మధ్య యుద్ధ మేఘాలు కమ్ముకున్నాయి. ఇరు దేశాలు.. తమ సరిహద్దుల వద్ద భారీగా సైనికులు, యుద్ధ ట్యాంకులను మోహరించాయి. నార్త్ ఇజ్రాయెల్​లో ఉన్న మిలటరీ స్థావరాలే లక్ష్యంగా ఇరాన్ డ్రోన్లతో విరుచుకుపడుతున్నది. అటు ఇజ్రాయెల్ కూడా ఇరాన్​పై వైమానిక దాడులకు దిగుతున్నది. మంగళవారం మిలటరీ రైడ్స్​లో భాగంగా జెనిన్ నగరంలో ఇజ్రాయెల్ సైనికులు జరిపిన కాల్పుల్లో ఎనిమిది మంది పాలస్తీనియన్లు చనిపోయారు.

మృతుల్లో 14 ఏండ్ల బాలుడితో సహా నలుగురు యువకులు ఉన్నట్లు పాలస్తీనా అధికారులు తెలిపారు. మరో ఏడుగురు తీవ్రంగా గాయపడ్డారని వివరించారు. అదేవిధంగా, సౌత్ లెబనాన్​లోని ఓ గ్రామంపై ఇజ్రాయెల్ వైమానిక దాడులు చేసింది. ఈ ఘటనలో ఐదుగురు చనిపోయారని, పది మంది వరకు గాయపడ్డారని ఆ దేశ వైద్య ఆరోగ్య మంత్రిత్వ శాఖ ప్రకటించింది. చనిపోయిన వారంతా హెజ్​బొల్లా ఫైటర్స్ అని తెలిపింది. ఈ దాడులకు ప్రతీకారంగా ఇరాన్ మద్దతు ఉన్న లెబనాన్ మిలిటెంట్ సంస్థ హెజ్​బొల్లా.. ఇజ్రాయెల్​పై డ్రోన్లతో విరుచుకుపడింది.

నార్త్ ఇజ్రాయెల్ బార్డర్ నుంచి 20 కిలో మీటర్ల లోపల ఉన్న సైనిక స్థావరంపై దాడి చేసింది. ఈ ఘటనలో ఏడుగురు పౌరులు గాయపడ్డారు. వీరిలో ఇద్దరి పరిస్థితి విషమంగా ఉన్నట్లు ఇజ్రాయెల్ మిలటరీ తెలిపింది. గాజాలో వార్ మొదలైనప్పటి నుంచి ఇజ్రాయెల్, హెజ్​బొల్లా ప్రతి రోజూ దాడులు, ప్రతిదాడులకు దిగుతున్నాయి. 

ప్రజలే లక్ష్యంగా దాడులు చేస్తున్నరు: ఇజ్రాయెల్

సాధారణ పౌరులే లక్ష్యంగా హెజ్​బొల్లా డ్రోన్లతో దాడులు చేస్తున్నదని ఇజ్రాయెల్ ప్రభుత్వం ఆరోపించింది. కాగా, ఇజ్రాయెల్ కామెంట్లను హెజ్​బొల్లా తీవ్రంగా ఖండించింది. కాగా, పశ్చిమాసియాలో నెలకొన్న ఉద్రిక్త పరిస్థితుల దృష్ట్యా ఇజ్రాయెల్​కు వెళ్లొద్దని సౌత్ కొరియా, జపాన్ తమ పౌరులకు  సూచించింది.

కాగా, ఇరాన్​కు అండగా నిలిచిన రష్యా అధ్యక్షుడు పుతిన్.. ఆ దేశ సుప్రీం లీడర్ అయతుల్లా అలీ ఖమేనీతో మాట్లాడారు. ఇజ్రాయెల్​పై జరిపే దాడుల్లో సాధారణ పౌరులు చనిపోకుండా చూడాలని సూచించినట్లు సమాచారం. ఇజ్రాయెల్​లోని సైనిక స్థావరాలే లక్ష్యంగా దాడులు చేయాలని చెప్పినట్లు తెలుస్తున్నది. 

24 గంటల్లో 45 మంది పాలస్తీనియన్ ఫైటర్లు మృతి

గడిచిన 24 గంటల్లో గాజాలో 45 మంది పాలస్తీనియన్ ఫైటర్స్​ను చంపేసినట్లు ఇజ్రాయెల్ డిఫెన్స్ ఫోర్స్ (ఐడీఎఫ్) ప్రకటించింది. హెజ్​బొల్లా జరిపిన దాడులను ఐరన్ డ్రోమ్​తో తిప్పికొడ్తున్నట్లు చెప్పింది. ఒక డ్రోన్ నహరియా టౌన్​లోని రూట్​4 హైవేపై పడటంతో పలువురికి గాయాలైనట్లు తెలిపింది. ఒకరి పరిస్థితి క్రిటికల్ ఉందని చెప్పింది. కాగా, రఫా సిటీకి దగ్గరలో తాము జరిపిన మెరుపు దాడిలో రెండు ఆర్మీ వాహనాలను ధ్వంసం చేసినట్లు హమాస్ ప్రకటించింది.