- హెలికాప్టర్ ప్రమాదంలో చనిపోయినట్లు ప్రకటించిన ఇరాన్
- విదేశాంగ మంత్రి హొస్సేన్‌ సహా మొత్తం తొమ్మిది మంది మృతి
- ఆదివారం అజర్బైజాన్ అటవీ ప్రాంతంలో కూలిన హెలికాప్టర్
- సోమవారం ఉదయం శకలాలను గుర్తించిన రెస్క్యూ బృందాలు
- ఇరాన్లో ఐదురోజులు సంతాప దినాలు.. రైసీ మృతిపై ప్రపంచ నేతల సంతాపం
దుబాయ్: హెలికాప్టర్ ప్రమాదంలో ఇరాన్ ప్రెసిడెంట్ ఇబ్రహీం రైసీ దుర్మరణం చెందారు. ఆయన ప్రయాణిస్తున్న హెలికాప్టర్ ఆదివారం అజర్బైజాన్ సరిహద్దుల్లోని దట్టమైన అటవీ ప్రాంతంలో కుప్పకూలిన విషయం తెలిసిందే. వెంటనే స్పందించిన ఆ దేశ అధికార యంత్రాంగం సహాయక చర్యలు చేపట్టింది. అయితే, భారీ వర్షాల కారణంగా రెస్క్యూ పనులకు ఆటంకం ఏర్పడింది.
సోమవారం ఉదయం రెడ్ క్రీసెంట్ సొసైటీ సంఘటనా స్థలానికి చేరుకొన్నది. ప్రమాదం జరిగిన స్థలాన్ని గుర్తించింది. ఆ తర్వాత కాసేపటికే రైసీ ప్రాణాలు కోల్పోయినట్టు ఇరాన్ అధికారిక వార్తా సంస్థ ధ్రువీకరించింది. రైసీతోపాటు విదేశాంగ మంత్రి హొస్సేన్‌ అమీరబ్దొల్లహియాన్, తూర్పు అజర్బైజాన్ ప్రావిన్సు గవర్నర్ తదితరులు కన్నుమూసినట్టు ప్రకటించింది.
డ్యాంలను ప్రారంభించి వస్తుండగా ప్రమాదం
ఇరాన్, అజర్బైజాన్ రెండు దేశాలు సంయుక్తంగా వాటి సరిహద్దుల్లో కిజ్ కలాసీ, ఖొదాఫరీన్ అనే రెండు డ్యాంలను నిర్మించాయి. ఆదివారం ఉదయం అక్కడికి చేరుకొన్న ఇబ్రహీం రైసీ, అజర్బైజాన్ ప్రెసిడెంట్ ఇల్హమ్ అలియేవ్తో కలిసి వాటిని ప్రారంభించారు. అనంతరం విదేశాంగ మంత్రి హోస్సేన్అమీరబ్దొల్లహియాన్, ఈస్ట్ అజర్బైజాన్ ప్రావిన్స్ గవర్నర్మలేక్‌ రహ్‌‌‌‌మతీ, ఇతర అధికారులతో కలిసి తబ్రిజ్ పట్టణానికి మూడు హెలికాప్టర్లలో బయలుదేరారు.
మిగతా రెండు హెలికాప్టర్లు గమ్యస్థానానికి చేరుకోగా, రైసీ ప్రయాణిస్తున్న హెలికాప్టర్ మాత్రం టెహ్రాన్నగరానికి వాయువ్య దిశగా 600 కిలోమీటర్ల దూరంలోని జోల్ఫా నగర సమీపంలో కూలిపోయింది. ప్రమాదం విషయం తెలుసుకున్న ఇరాన్ భద్రతా దళాలు రెస్క్యూ ఆపరేషన్ చేపట్టాయి. సోమవారం ఉదయం సంఘటనా స్థలానికి చేరుకొన్న ఇరాన్ రెడ్క్రీసెంట్ సొసైటీ, ప్రమాదానికి గురైన చాపర్ను గుర్తించింది.
ముక్కలైన హెలికాప్టర్ శకలాలను పరిశీలించాక అందులో ఎవరూ బతికి ఉండే అవకాశంలేదని వెల్లడించింది. కాగా, ప్రెసిడెంట్ రైసీ మరణవార్తను అధికారిక వార్తాసంస్థ ధ్రువీకరించగానే ఇరాన్ కేబినెట్ అత్యవసరంగా భేటీ అయింది. దేశసేవలో అధ్యక్షుడు ప్రాణత్యాగం చేశారని, ఆయన సేవలు మరువలేమని పేర్కొంది. నల్లరంగు వస్త్రంతో అలంకరించిన రైసీ కుర్చీపై ఆయన ఫొటో పెట్టి సంతాపం ప్రకటించింది.
తాత్కాలిక అధ్యక్షుడిగా మహమ్మద్ మొఖ్బర్
దేశ మొదటి వైస్ ప్రెసిడెంట్ మహమ్మద్ మొఖ్బర్ను దేశ తాత్కాలిక ప్రెసిడెంట్గా ఇరాన్ సుప్రీం లీడర్ అయతొల్లా అలీ ఖమేనీ నియమించారు. సంతాప సందేశంలో భాగంగా ఖమేనీ ఈ విషయాన్ని వెల్లడించారు. కాగా, దేశంలో ఐదురోజులు సంతాప దినాలుగా ప్రకటించారు. ఈ ప్రమాదం ఇరాన్ పాలనపై ఎలాంటి ప్రభావం చూపదని అయతొల్లా ఖమేనీ అన్నారు.
మరోవైపు, రైసీ మృతిపై ఓవైపు అంతా సంతాపం తెలుపుతున్న విషాదవేళ.. కొంతమంది మాత్రం సంబరాలు చేసుకున్నారు. హెలికాప్టర్ ప్రమాదంలో అధ్యక్షుడు మృతిచెందిన వార్త తెలిసి వీధుల్లోకి వచ్చి పటాకులు కాల్చారు. ఇస్లామిక్ చట్టాల అమలులో రైసీ కఠినంగా వ్యవహరించడంతో కొంతమంది ప్రజలు ఆయనను ద్వేషిస్తున్నారు.
ప్రపంచ దేశాల సంతాపం
ఇరాన్ అధ్యక్షుడు ఇబ్రహీరం రైసీ మృతిపై ప్రపంచ దేశాలు సంతాపం ప్రకటించాయి. రైసీ మరణం విచారకరమని, తనను దిగ్భ్రాంతికి గురిచేసిందని భారత ప్రధాని మోదీ తెలిపారు. ఇండియా–ఇరాన్ ద్వైపాక్షిక సంబంధాలను బలోపేతం చేయడంలో రైసీ కృషి ఎప్పటికీ గుర్తుంటుందని అన్నారు. ఇరాన్ అధ్యక్షుడి కుటుంబ సభ్యులకు సానుభూతి తెలియజేస్తున్నానని, ఈ కష్ట సమయంలో ఇరాన్కు అండగా నిలుస్తామని చెప్పారు.
రైసీ మృతికి మంగళవారం దేశంలో సంతాప దినంగా ప్రకటించారు. ఇరాన్ ప్రెసిడెంట్, విదేశాంగ మంత్రి మరణవార్త తనను షాక్కు గురిచేసిందని, ఆ దేశానికి అండగా ఉంటామని భారత విదేశాంగ మంత్రి ఎస్.జైశంకర్ అన్నారు. పాకిస్తాన్ ఒకరోజు సంతాపదినంగా ప్రకటించింది. ఈ విషాద సమయంలో ఇరాన్కు తాము మద్దతుగా ఉంటామని, దీన్నినుంచి ఆ దేశం ధైర్యంగా బయటపడుతుందని పాకిస్తాన్ ప్రధాని షెహబాజ్ షరీఫ్ట్వీట్చేశారు.
ఇబ్రహీం రైసీ మృతి విచారకరమని ఇరాక్ ప్రధాని షియా ఆల్ సుదానీ పేర్కొన్నారు. హౌతీస్ సుప్రీం రెవల్యూషనరీ కమిటీల చీఫ్ మహమ్మద్ అలీ ఆల్హౌతీ సంతాపం ప్రకటించారు. రైసీ మృతిపై చైనా అధ్యక్షుడు జిన్పింగ్విచారం వ్యక్తంచేశారు. మంచి స్నేహితుడిని కోల్పోయామని తెలిపారు.
