- చెరువులు, చెక్ డ్యామ్లు మరింత మెరుగ్గా నిర్వహించడంపై విధుల కేటాయింపు
- ఇరిగేషన్ డిపార్ట్మెంట్ సర్క్యులర్
హైదరాబాద్, వెలుగు: రాష్ట్రంలోని ప్రాజెక్టులు, చెరువులు, చెక్డ్యామ్లను మరింత మెరుగ్గా నిర్వహించేందుకు ఏఈఈలు, ఏఈలకు ఇరిగేషన్ డిపార్ట్మెంట్ విధులను నిర్వచించింది. జాబ్లో చేరిన తొలినాళ్లలోనే ఏఈఈలు, ఏఈలకు వివిధ అంశాలపై పట్టు ఉండేలా విధులను అప్పగించాలని పేర్కొంది. విభాగంలోని సివిల్/మెకానికల్, ఎలక్ట్రికల్, అగ్రికల్చర్కు సంబంధించిన అధికారులు ఏమేం చేయాలో సూచిస్తూ ఇటీవల సర్క్యులర్ను జారీ చేసింది. మొదటి నుంచే ఇలాంటి పనులను అప్పగించడం ద్వారా ఇరిగేషన్ ప్రాజెక్టులను సేఫ్గా, మరింత మెరుగ్గా నిర్వహించేందుకు వీలవుతుందని అధికారులు చెబుతున్నారు.
ఏఈఈ/ఏఈ సివిల్ విధులివీ..
ప్రధాన ప్రాజెక్టులు, లిఫ్ట్ స్కీమ్స్, ప్రెషర్ మెయిన్స్, డ్యాములు, కాలువలకు సంబంధించిన డిజైన్స్, అంచనా, ఎగ్జిక్యూషన్, క్వాలిటీ కంట్రోల్, నీటి నియంత్రణ, ఆపరేషన్ అండ్ మెయింటెనెన్స్ చేయాలి. డిపార్ట్మెంట్లో పనిచేసే ఏఈఈ ఐఎస్ కోడ్స్/మ్యానువల్స్ ప్రకారం డిజైన్స్ చేయాలి.
డ్రాయింగ్స్, స్పెసిఫికేషన్ కు అనుగుణంగా క్షేత్రస్థాయిలో పర్యటించి అంచనాలను తయారు చేయాలి. ప్రాజెక్టుల్లో వాడే సామగ్రి, గేట్లు, ఇతర నిర్మాణాలకు సంబంధించి ఫీల్డ్ టెస్టులు చేయాలి. అన్నింటి రికార్డులను మెయింటెయిన్ చేయాలి. ప్రాజెక్టులు నిర్మించే ప్రాంతంలో ఎలాంటి దుర్ఘటనలు జరగకుండా ముందస్తు చర్యలు చేపట్టాలి. ఏదైనా జరగరానిది జరిగితే వెంటనే ఉన్నతాధికారులకు తెలియజేయాలి. భూసేకరణ చేయాలి.
అటవీ అనుమతులు, డీపీఆర్ తయారీ వంటి వాటినీ చూసుకోవాలి. నిర్మాణంలో ఉన్న ప్రాజెక్టు పనుల పురోగతిపై ఎప్పటికప్పుడు రిపోర్టు ఇవ్వాలి. డ్యాముల గేట్లు, కాల్వల హెడ్ రెగ్యులేటర్, క్రాస్ రెగ్యులేటర్ గేట్లు, షట్టర్ల పనితీరును ఎప్పటికప్పుడు పర్యవేక్షిస్తూ ఉండాలి. నేషనల్ డ్యామ్ సేఫ్టీ అథారిటీ (ఎన్డీఎస్ఏ) నిబంధనలకు అనుగుణంగా డ్యాములు, ప్రాజెక్టుల భద్రతకు సంబంధించిన రికార్డులు నిర్వహించాలి. చెరువులు, చిన్న లిఫ్టు స్కీములు, కాల్వలకు సంబంధించి ఏఈలు అవే విధులు నిర్వర్తించాలి.
పంప్హౌస్లను పర్యవేక్షించాలి
లిఫ్ట్ స్కీములకు సంబంధించిన ఎలక్ట్రికల్ సంబంధిత పనుల బాధ్యతలను సంబంధిత ఏఈఈలు చూసుకోవాలి. పంప్హౌస్లు, మోటార్లు, సబ్స్టేషన్లు, ఇతర పనులను ఎప్పటికప్పుడు పర్యవేక్షించాలి. పంప్హౌస్లు, రిపేర్లు, డ్యామేజీలకు సంబంధించిన అంశాలపై సివిల్, మెకానికల్, ట్రాన్స్కో అధికారులతో ఎప్పటికప్పుడు సమన్వయం చేసుకోవాలి. వ్యవసాయానికి సంబంధించి ఆయకట్టులో పంటల దిగుబడిపై స్టడీ చేయాలి. గ్రామాలు, పంచాయతీల్లో సాయిల్ సాంపిళ్లను సేకరించి సారాన్ని చెక్ చేయాలి. వివిధ వ్యవసాయ పద్ధతుల ద్వారా నీటిని సమగ్రంగా వాడుకునేలా కొత్త విధానాలను రూపొందించాలి.
