సోషల్ మీడియాను వదిలేయాలనుకుంటున్నట్లు ప్రధాని మోడీ చేసిన ప్రకటన సంచలనం సృష్టించింది. అయితే.. శాశ్వతంగా వదిలేయట్లేదని, వచ్చే ఆదివారం ఒక్క రోజు మాత్రమేనని చెప్పటంతో దీనిపై చర్చకు ఫుల్ స్టాప్ పడింది. ఈ నేపథ్యంలో అసలు సోషల్ మీడియాకు ఎవరైనా టెంపరరీగా లేదా పూర్తిగా గుడ్బై చెప్పటం సాధ్యమేనా అనే ప్రశ్న తలెత్తుతోంది. సాధ్యమేనని ఆయా సంస్థలూ చెబుతున్నాయి. ఫేస్బుక్, ట్విట్టర్, ఇన్స్టాగ్రామ్, యూట్యూబ్ తదితర మేజర్ ప్లాట్ఫామ్లు తమ యూజర్లకు ఈ ఆప్షన్లు ఇచ్చాయి.
ఈ రోజుల్లో చాలా మంది సోషల్ మీడియాను ఫాలో అవుతున్నారు. ఒకటికి మించి ప్లాట్ఫామ్ల్లో అకౌంట్లు ఉంటున్నాయి. కొందరు అదే పనిగా అప్డేట్లు చూస్తుంటే మరికొందరు ఎప్పుడో తీరిక దొరికినప్పుడు మాత్రమే తిరగేస్తున్నారు. యూజర్లు ఒకవేళ ఆ ఖాతాలను వద్దనుకుంటే కొన్నాళ్లపాటు డీయాక్టివేషన్లో ఉంచొచ్చు. లేదా పర్మనెంట్గా డిలీట్ చేసుకోవచ్చు. ఒకటీ రెండు తప్ప దాదాపు అన్ని సోషల్ మీడియా సంస్థలూ ఈ రెండు ఆప్షన్లను అందుబాటులోకి తెచ్చాయి. డీయాక్టివేట్ చేసిన అకౌంట్లను రీయాక్టివేట్ చేసుకోవచ్చు. కాకపోతే అకౌంట్లను ఓపెన్ చేసేటప్పుడు ఇచ్చిన ఫోన్ నంబర్, మెయిల్, పాస్వర్డ్ గుర్తుంచుకోవాలి.
ఫేస్బుక్ని డీయాక్టివేట్/డిలీట్ చేస్తే ఏమౌతుంది?
ఫేస్బుక్ అకౌంట్ని డీయాక్టివేట్ లేదా డిలీట్ చేయొచ్చు. డిలీట్ అయిన అకౌంట్ని తిరిగి యాక్టివేషన్లోకి తేవటానికి కుదరదు. ఫొటోలు, పోస్టులు, వీడియోలు ఎట్సెట్రా అన్నీ పోతాయి. అలా జరక్కుండా ఉండాలంటే అకౌంట్ని డిలీట్ చేసే ముందు ఆ డేటాని డౌన్లోడ్ చేసుకోవచ్చు. మన అకౌంట్ డిలీట్ అయినా ఇతరులు ఈ నెట్వర్క్లోకి పోస్ట్ చేసిన మన ఫొటోలు మాత్రం ఎక్కడికీ పోవు. ఫేస్బుక్ అకౌంట్ డిలీట్ అయితే మెసెంజర్ కూడా అందుబాటులో ఉండదు. అయితే ఫ్రెండ్స్కి మనం పంపిన మెసేజ్లను మాత్రం వాళ్ల ఇన్బాక్సులో చూడొచ్చు. కాకపోతే వాటికి మన అకౌంట్ పేరు ఉండదు. థర్డ్ పార్టీ యాప్ల్లోకి మన ఫేస్బుక్ అకౌంట్లతో లాగిన్ అయితే అవీ క్యాన్సిల్ అవుతాయి. ఆయా యాప్లను భవిష్యత్లో కూడా వాడుకోవాలనుకుంటే పాత అకౌంట్ని డిలీట్ చేసే ముందు అక్కడ మరో సోషల్ నెట్వర్క్ అకౌంట్ని ఓపెన్ చేసుకోవటం బెటర్.
ఫేస్బుక్ అకౌంట్ను డీయాక్టివేట్ చేస్తే ప్రొఫైల్ బయటికి కనిపించదు. ఫొటోలు, పోస్టులు, వీడియోలు డిలీట్ కావు. మెసెంజర్ కూడా అందుబాటులో ఉంటుంది. ఫ్రెండ్స్తో చేసే చాటింగ్లో మన ప్రొఫైల్ పిక్చర్ని చూడొచ్చు. నెట్వర్క్లో మన పేరుతో సెర్చ్ చేయొచ్చు. థర్డ్ పార్టీ యాప్ల్లో ఫేస్బుక్ లాగిన్ కొనసాగుతుంది. అకౌంట్ రీయాక్టివేషన్ కూడా చేసుకోవచ్చు.
30 రోజుల్లోపైతే ఓకే
అకౌంట్ని ఒకవేళ డిలీట్ చేసినా ఆ డిలీట్ని క్యాన్సిల్ చేసే అవకాశాన్ని ఫేస్బుక్ కల్పిస్తోంది. ఈ ఛాన్స్ 30 రోజుల్లోపే ఉంటుంది. డేటా మొత్తం డిలీట్ కావటానికి 90 రోజులు పడుతుంది. అయినా ఆ డేటా వేరే యూజర్లకు అందుబాటులో ఉండదు.
ఫేస్బుక్ అకౌంట్ని డిలీట్ చేసే విధానం
అకౌంట్కి లాగినై, ఇన్ఫర్మేషన్ మొత్తాన్ని డౌన్లోడ్ చేసుకోవాలి. డౌన్లోడింగ్ ఆప్షన్.. ఫేస్బుక్ ఇన్ఫర్మేషన్ సెట్టింగ్స్లో ఉంటుంది. ఇన్ఫర్మేషన్ను డౌన్లోడ్ చేసుకున్నాక అకౌంట్ డీయాక్టివేషన్ అండ్ డిలీషన్పై క్లిక్ చేయాలి. అప్పుడు ‘కంటిన్యూ టు అకౌంట్ డిలీషన్’ అనే బటన్ ఓపెన్ అవుతుంది. దానిపై కొడితే పాస్వర్డ్ ఎంటర్ చేయమని అడుగుతుంది.
ఇన్స్టాగ్రామ్ విషయానికొస్తే
ఈ సోషల్ మీడియా అకౌంట్ని డీయాక్టివేట్ చేయాలన్నా, డిలీట్ చేయాలన్నా వెబ్ బ్రౌజర్ ద్వారానే సాధ్యం. ఎందుకంటే ఈ సెట్టింగ్ ఐఓఎస్, ఆండ్రాయిడ్ యాప్లో లేదు. ఒక్కసారి డిలీట్ చేస్తే ప్రొఫైల్, ఫొటోలు, వీడియోలు, కామెంట్లు, లైక్లు, ఫాలోవర్స్అన్నీ పర్మనెంట్గా పోతాయి. అదే యూజర్నేమ్తో మళ్లీ సైనప్ కావటం కుదరదు. మరో అకౌంట్కీ ఈ యూజర్నేమ్ని యాడ్ చేయలేం. డీయాక్టివేట్ చేసినప్పుడు కూడా ఇవేవీ కనిపించవు గానీ రీయాక్టివేట్ చేసినప్పుడు మాత్రం వాటిని తిరిగి పొందొచ్చు.
డీయాక్టివేట్ చేసే విధానం
ఇన్స్టాగ్రామ్ ప్రొఫైల్ పేజీలోని ఎడిట్ ప్రొఫైల్పై క్లిక్ చేయాలి. తర్వాత కిందికి వచ్చి ‘టెంపరర్లీ డిజేబుల్ మై అకౌంట్’ అనే ఆప్షన్పై కొట్టాలి. అప్పుడు ‘ఎందుకు డీయాక్టివేట్ చేస్తున్నారు’ అనే ప్రశ్న అడుగుతుంది. దానికి ఏదో ఒక ఆన్సర్ని సెలెక్ట్ చేసుకోవాలి. ఇది తప్పనిసరి. ఆన్సర్ సెలెక్ట్ చేసుకున్నాక పాస్వర్డ్ని రీఎంటర్ చేయమని కోరుతుంది. రీయాక్ట్వేట్ చేసుకోవాలంటే పాస్వర్డ్ను గుర్తుపెట్టుకోవాలి.
ఇలా డిలీట్ చేయొచ్చు
డిలీట్ యువర్ అకౌంట్ పేజ్లోకి వెళ్లాలి. ఎందుకంటే ఈ ఆప్షన్ రెగ్యులర్ సెట్టింగ్స్లో ఉండదు. దీనికి బదులు అక్కడ ఒక లింక్ ఉంటుంది. అది.. ఇస్టాగ్రామ్ డాట్కం/అకౌంట్స్/రిక్వెస్ట్/రిమూవ్/పర్మనెంట్. డిలీట్ చేయాలన్నా ఏదో ఒక కారణం చెప్పాలి. అక్కడ ఉన్న కొన్ని రీజన్లలో ఒకదాన్ని సెలెక్ట్ చేసుకోవాలి. ఇది మాండేటరీ. ఇప్పడు పాస్వర్డ్ని మళ్లీ ఎంటర్ చేయాలి. తర్వాత ‘పర్మనెంట్లీ డిలీట్ మై అకౌంట్’ ఆప్షన్పై క్లిక్ చేయాలి.
చానల్ను హైడ్, డిలీట్ చేయొచ్చిలా..
యూట్యూబ్కి లాగినై అడ్వాన్స్డ్ అకౌంట్ సెట్టింగ్స్కి వెళ్లాలి. అందులో కింద ‘డిలీట్ చానల్’ ఆప్షన్ ఉంటుంది. అక్కడే హైడ్ లేదా డిలీట్ ఆప్షన్లనూ చూడొచ్చు. ‘హైడ్ మై చానల్’ అనే బటన్ నొక్కితే సరిపోతుంది. చానల్ని డిలీట్ చేయాలంటే యూట్యూబ్కి లాగినై పైన కనిపించే డిలీట్ చానల్ సెట్టింగ్స్లోకి వెళ్లాలి. అక్కడ ‘ఐ వాంట్ టు పర్మనెంట్లీ డిలీట్ మై చానల్’ అనే ఆప్షన్ని సెలెక్ట్ చేసుకోవాలి. చానల్ని డిలీట్ చేయాలంటే కన్ఫర్మేషన్ కోసం అక్కడ కనిపించే రెండు బాక్స్లను సెలెక్ట్ చేసుకోవాలి. ఒకటి.. డిలీట్ మై చానల్. రెండు.. డిలీట్ మై కంటెంట్. ఈ రెండు ఆప్షన్లను సెలెక్ట్ చేసుకుంటే అప్డేట్కి టైమ్ పడుతుందని యూట్యూబ్ చెబుతుంది. అప్పటివరకు మన వీడియోల థంబ్నెయిల్స్ని సైట్లో కొద్దిసేపు చూడొచ్చు. గూగుల్ అకౌంట్లో ఉండే వేరే డేటాపైన ఆ ఎఫెక్ట్ పడదు.
ట్విట్టర్ పర్మటెంట్ డిలీట్ వీలు కాదు
ఈ ప్లాట్ఫామ్లో అకౌంట్ డీయాక్టివేటింగ్కి మాత్రమే ఛాన్స్ ఉంది. పర్మనెంట్గా డిలీట్ చేయటానికి ఆప్షన్ లేదు. పైగా అకౌంట్ డీయాక్టివేషన్కి ముందే డేటాను డౌన్లోడ్ చేసుకోవాలి. ఎందుకంటే.. ‘డీయాక్టివేట్ అయిన అకౌంట్లకు డేటా డౌన్లోడింగ్ లింక్లు పంపటం కుదరదు’ అని ట్విట్టర్ డీయాక్టివేషన్ పేజీ చెబుతోంది. అంతేకాదు. డేటా డౌన్లోడ్ కోసం కూడా ముందుగానే రిక్వెస్ట్ పెట్టాలి. డీయాక్టివేట్ చేసేటప్పుడే ఎన్ని రోజుల్లో రీయాక్టివేట్ చేసుకుంటామనే పీరియడ్ని సెలెక్ట్ చేసుకోవచ్చు.
దీనికి ప్రస్తుతం రెండు ఆప్షన్లు ఉన్నాయి. ఒకటి.. 30 రోజులు. రెండు.. 12 నెలలు. ట్విట్టర్ అనేది పబ్లిక్ ప్లాట్ఫామ్ కాబట్టి మన అకౌంట్ని డీయాక్టివేట్ చేసుకున్నా కొద్దోగొప్పో గూగుల్ లేదా బింగ్ వంటి ఇన్ఫర్మేషన్ సెర్చింజన్లలో అందుబాటులో ఉంటుంది. ట్విట్టర్ అకౌంట్ని డీయాక్టివేట్ చేసుకోవాలంటే ప్రొఫైల్ ఐకాన్పై క్లిక్ చేసి, ‘సెట్టింగ్స్ అండ్ ప్రైవసీ’కి వెళ్లాలి. తర్వాత ‘అకౌంట్’పై ట్యాప్ చేసి, కిందకి వచ్చి ‘డీయాక్టివేట్ యువర్ అకౌంట్’ పైన బటన్ నొక్కాలి. పాస్వర్డ్ ఎంటర్ చేసి, ‘ఎస్’పై క్లిక్ కొట్టి కన్ఫామ్ చేయాలి.
ఇలా డీయాక్టివేట్ చేయొచ్చు
ఫేస్బుక్ సెట్టింగ్స్లోకి వెళ్లి, ఇన్ఫర్మేషన్ అనే ఆప్షన్ దగ్గర ‘డీయాక్టివేషన్ అండ్ డిలీషన్’పై క్లిక్ చేస్తే, ‘కంటిన్యూ కావాలా’ అని అడుగుతుంది. ఓకే కొడితే పాస్వర్డ్ ఎంటర్ చేయాల్సి ఉంటుంది.
యూట్యూబ్ చానల్
యూట్యూబ్లో ‘హైడ్’ లేదా ‘పర్మనెంట్లీ డిలీట్’ ఆప్షన్లు ఉంటాయి. చానల్ని హైడ్ చేస్తే కామెంట్లు, వాటికి ఇచ్చే రిప్లైస్ అన్నీ పర్మనెంట్గా డిలీట్ అవుతాయి. ఇతర గూగుల్ ప్రాపర్టీస్లో ఉండే చానల్ డేటా మాత్రం ఎక్కడికీ పోదు. కానీ.. చానల్ పేరు, వీడియోలు, లైక్లు, సబ్స్క్రిప్షన్లు, సబ్స్ర్కైబర్లు పబ్లిక్కి అందుబాటులో ఉండవు. ‘ప్రైవేట్’గా మారిపోతాయి. హైడ్ చేసిన చానల్ని రీయాక్టివేట్ చేసుకోవచ్చు. ఒకవేళ యూట్యూబ్ చానల్ని డిలీట్ చేస్తే చానెల్ యూఆర్ఎల్, చానల్ నేమ్ ఎప్పటికీ ఇంటర్నెట్లో కనిపించవు. అనలిటిక్స్లో సెర్చ్ చేసినా దొరకవు. అగ్రిగేట్ రిపోర్టుల్లో చానల్ వాచ్టైమ్ డేటా అందుబాటులో ఉన్నా ఆ సమాచారం ఫలానా చానల్ది అంటూ యూట్యూబ్ సంస్థ చెప్పదు.
