ఆఫీసర్ల రెసిడెన్షియల్ కాంప్లెక్స్ కోసం కూల్చేసే అవకాశం.. కనుమరుగు కానున్న చారిత్రక బిల్డింగ్!
హనుమకొండ, వెలుగు : ఓరుగల్లు నగరంలో మరో చారిత్రక కట్టడం కనుమరుగయ్యే అవకాశం కనిపిస్తోంది. ఇప్పటికే మల్టీ సూపర్ స్పెషాలిటీ హాస్పిటల్ కోసం వరంగల్ సెంట్రల్ జైల్ కాలగర్భంలో కలిసిపోగా.. ఇప్పుడు హనుమకొండలోని సుబేదార్ బంగ్లా కూడా అదే లిస్ట్ లో చేరబోతున్నట్లు తెలుస్తోంది. పాలనా సౌలభ్యం కోసం ప్రభుత్వం డిస్ట్రిక్ట్ ఆఫీసర్స్ రెసిడెన్షియల్ కాంప్లెక్స్ నిర్మిస్తుండగా.. సీఎం కేసీఆర్ చెప్పిన ప్రమాణాలకు అక్కడున్న స్థలం సరిపోయే పరిస్థితి లేదు. దీంతో సుబేదార్ బిల్డింగ్ను తొలగించే అవకాశం ఉన్నట్లు తెలిసింది. గురువారంతో ఆ బిల్డింగుకు పునాదులు పడి 137 ఏండ్లు నిండాయి.
ఏండ్ల కిందటి నిర్మాణం.. ఎన్నో ప్రత్యేకతలు
ప్రస్తుతం హనుమకొండ కలెక్టర్ క్యాంప్ ఆఫీస్ గా వినియోగిస్తున్న బిల్డింగుకు 1886 లోనే పునాదులు పడ్డాయి. అప్పటి బ్రిటిష్ సుబేదార్ మేజర్ జార్జ్ పాల్మార్ భార్య ఆగస్టు 10న బిల్డింగ్ నిర్మాణ పనులకు శంకుస్థాపన చేశారు. కాగా ఈ చారిత్రక బంగ్లాను ఎన్నో ప్రత్యేకతలతో నిర్మించారు. మొత్తం 13 ఎకరాల విస్తీర్ణంలో బంగ్లా నిర్మాణం మొత్తం పటిష్టమైన డంగు సున్నంతో జరిగింది. బంగ్లాలోకి ఎంట్రన్స్ వద్ద కమాన్ కు పెద్ద సైజు గడియారం ఉంటుంది. లోపలికి వెళ్లగానే నాటి చరిత్రను కళ్లకు కట్టే భవంతి, నీటి కొలను, ఫౌంటెన్లు ఉంటాయి. భవంతిలోపల చెక్క మెట్లు ఉన్నాయి. శతాబ్ధం దాటినా ఇంతవరకు ఆ బంగ్లా చెక్కుచెదరకపోవడం విశేషం.
కాగా స్వాతంత్రం ముందు వరకు సుబేదార్ నివాసంగా వాడిన ఈ భవనాన్ని 1950 నుంచి జిల్లా కలెక్టర్ నివాసంగా మార్చారు. అప్పటి నుంచి ఇప్పటివరకు దాదాపు 42 మంది కలెక్టర్లు ఇదే బిల్డింగులోనే ఉన్నారు. కాగా ఈ ఆవరణలో మెట్ల బావి ఉండగా..1982 లో జవహర్ కలెక్టర్ గా ఉన్న సమయంలో పూడిక తీయించారు. అప్పుడు నిజాం కాలంనాటి కత్తులు, ఇతర సామాగ్రి లభించాయి. వాటిని పురావస్తు శాఖకు అప్పగించారు.
11 కోట్లతో ఆఫీసర్స్ రెసిడెన్షియల్ కాంప్లెక్స్
ఇంటిగ్రెటెడ్ డిస్ట్రిక్ట్ ఆఫీసర్స్ కాంప్లెక్స్ లోభాగంగా హనుమకొండ కలెక్టరేట్ కాంప్లెక్స్ నిర్మించారు. రెండేండ్ల కిందట ఆ బిల్డింగ్ ఓపెనింగ్కు వచ్చిన సీఎం కేసీఆర్ హనుమకొండ కలెక్టర్ సహా ఇతర అధికారులకు ఒకేచోట రెసిడెన్షియల్ కాంప్లెక్స్ నిర్మించాలన్నారు. ఈ మేరకు సుబేదార్ బంగ్లా ప్రాంగణంలో అధికారులు రూ.11 కోట్ల కాంప్లెక్స్ నిర్మాణం చేపట్టారు. ఇందులో 6 వేల చదరపు అడుగుల విస్తీర్ణంతో కలెక్టర్ రెసిడెన్షియల్ కాంప్లెక్స్, దాదాపు మూడు వేల ఎస్ఎఫ్టీలో రెండు అడిషనల్ కలెక్టర్ల బిల్డింగ్, మరో ఎనిమిది డిస్ట్రిక్ట్ లెవల్ ఆఫీసర్ల జీ ప్లస్ వన్ బిల్డింగ్ నిర్మిస్తున్నారు.
అదే ప్లేసులో పార్కింగ్, గార్డెనింగ్, ఇతర సదుపాయాలతో మోడ్రన్ బిల్డింగ్ నిర్మిస్తున్నారు. కాగా సీఎం కేసీఆర్ చెప్పిన ప్రకారం కలెక్టరేట్ కాంపౌండ్ లోనే హెలీప్యాడ్ ప్లాన్ చేస్తున్నట్లు తెలిసింది. చారిత్రక సుబేదార్ బంగ్లాను సంరక్షించేందుకు ప్రభుత్వం చర్యలు తీసుకోవాలని కోరుతున్నారు.
