ఆఫ్ఘనిస్తాన్ తో మూడు టీ20ల సిరీస్ లో భాగంగా ఇండియన్ యంగ్ బ్యాటర్లు ఇషాన్ కిషన్, శ్రేయాస్ అయ్యర్ లకు 15 మంది ప్రాబబుల్స్ లో చోటు దక్కని సంగతి తెలిసిందే. ఫామ్ లో ఉన్న వీరిని ఎంపిక చేయకపోవడానికి అసలు కారణం ఎవరికీ తెలియలేదు. సంజు శాంసన్ , జితేష్ శర్మ లాంటి యంగ్ ప్లేయర్లకు అవకాశం ఇచ్చిన సెలక్టర్లు వీరిద్దరిని పట్టించుకోలేదు. అయితే తాజా సమాచార ప్రకారం వీరిద్దరిని ఎంపిక చేయకపోవడానికి అసలు కారణం తెలిసిపోయింది.
కిషన్ మానసికంగా అలసిపోయాడనే కారణంగా దక్షిణాఫ్రికా టెస్ట్ సిరీస్ నుంచి రెస్ట్ తీసుకున్నాడు. ఈ కారణంగానే క్రికెట్ నుంచి కొంతకాలం బ్రేక్ కావాలని కోరాడు. అయితే ఈ వికెట్ కీపర్ బ్యాటర్ తాజాగా దుబాయ్‌లో మాజీ కెప్టెన్ MS ధోనితో కలిసి పార్టీ చేసుకుంటూ కనిపించాడు. దీనికి తోడు ఒక ప్రముఖ టీవీ క్విజ్ షోలో ఇషాన్ కనిపించడం వైరల్ గా మారింది. మానసికంగా అలసిపోయానని ఇలా తిరిగినందుకు బీసీసీఐ కిషన్ మీద వేటు వేసింది. దీని ప్రకారం కిషన్ టీ20 వరల్డ్ కప్ కు సెలక్టవ్వడం అనుమానంగా మారింది.
మరోవైపు శ్రేయాస్ అయ్యర్ దక్షిణాఫ్రికా టెస్టు సిరీస్‌లో పేలవమైన షాట్ ఎంపిక కారణంగా సెలక్టర్లు తమ అసంతృప్తిని వ్యక్తం చేశారు. ఫామ్‌ను తిరిగి పొందేందుకు రంజీ ట్రోఫీలో ముంబై తరపున ఆడాలని సిఫార్సు చేశారు. ఇప్పటికే ముంబై జట్టులో చేరిన ఈ స్టార్ ప్లేయర్..MCA శరద్ పవార్ క్రికెట్ అకాడమీ గ్రౌండ్‌లో 12 నుండి 15 వరకు ఆంధ్రప్రదేశ్ జరగబోయే మ్యాచ్ లో ఆడనున్నాడు. రహానే ముంబై జట్టుకు కెప్టెన్ గా వ్యవహరిస్తాడు. 29 ఏళ్ల అయ్యర్ చివరిసారిగా 2018లో ముంబై తరఫున రంజీ ట్రోఫీ మ్యాచ్ ఆడాడు.దాదాపు ఆరేళ్ళ తర్వాత మళ్ళీ రంజీ బాట పట్టాడు. అయ్యర్ ఇప్పటివరకు 67 ఫస్ట్ క్లాస్ మ్యాచ్‌ల్లో 13 సెంచరీలతో 5407 పరుగులు చేశాడు.
