![రఫాపై ఇజ్రాయెల్ భీకర దాడి .. 16 మంది మృతి](https://static.v6velugu.com/uploads/2024/05/israel-attack-on-rafa-and-16-dies_QIRNLAPxWb.jpg)
- తల్ ఆల్ సుల్తాన్ పక్కనే ఉన్న వాయువ్య రఫాపై వైమానిక దాడి
- సురక్షిత ప్రాంతంగా ప్రకటించిన చోటే తాజాగా బాంబుల మోత
కైరో: రఫాపై ఇజ్రాయెల్ మరోసారి విరుచుకుపడింది. తల్ ఆల్ సుల్తాన్ పక్కనే ఉన్న వాయువ్య రఫాపై మంగళవారం వైమానిక దాడి చేసింది. ఫ్లైటర్ జెట్లు, డ్రోన్లతో దాడికి పాల్పడింది. బాంబుల మోతలతో ఈ ప్రాంతమంతా దద్దరిల్లింది. ఈ ఘటనలో 16 మంది పాలస్తీనియన్లు మృతిచెందినట్టు పాలస్తీనియన్ సివిల్ డిఫెన్స్, పాలస్తీనియన్ రెడ్ క్రీసెంట్ పేర్కొంది.
గాజా-–ఈజిప్ట్ సరిహద్దు వెంబడి రఫాలో పరిమిత కార్యకలాపాలను నిర్వహిస్తున్నట్టు ఇజ్రాయెల్ తెలుపగా.. రఫాలోని పశ్చిమ ప్రాంతాల్లో కూడా సోమవారం రాత్రిపూట భారీ బాంబు పేలుళ్లు జరిగినట్లు నివాసితులు పేర్కొన్నారు. ఆదివారం రాత్రి కూడా రఫాపై ఇజ్రాయెల్ భీకర వైమానిక దాడి చేసింది. ఈ ఘటనలో ఏకంగా 45 మంది పాలస్తీనా పౌరులు ప్రాణాలు కోల్పోయారు. 60 మందికి గాయాలయ్యాయి. ఈ ఘటన మరువకుముందే రఫాపై ఇజ్రాయెల్ మళ్లీ విరుచుకుపడింది.
తల్ అల్ సుల్తాన్ ప్రాంతాన్ని సురక్షిత ప్రాంతంగా ఇజ్రాయెలే ప్రకటించింది. దీంతో ఉత్తర, మధ్య గాజా నుంచి కట్టుబట్టలతో తరలి వచ్చిన పాలస్తీనియన్లు ఇక్కడ గుడారాలు వేసుకొని తలదాచుకుంటున్నారు. కాగా, ఇది దురదృష్టకర ఘటన అని ఇజ్రాయెల్ ప్రధాని నెతన్యాహు విచారం వ్యక్తంచేశారు. దీనిపై విచారణ జరుపుతున్నట్టు ఇజ్రాయెల్ మిలిటరీ తెలిపింది.
ప్రపంచవ్యాప్తంగా నిరసనలు
రఫాపై దాడిని ప్రపంచ దేశాలు ఖండించాయి. ఇజ్రాయెల్పై అమెరికా, ఫ్రాన్స్ సహా స్పెయిన్, ఇటలీ, ఐర్లాండ్, నార్వే, ఈజిప్టు, ఖతార్, తుర్కీయేలు మండిపడ్డాయి. ఈ దాడులకు నిరసనగా పారిస్లోని ఇజ్రాయెల్ ఎంబసీ ఎదుట 10 వేల మంది ఆందోళనలో పాల్గొన్నారు. మాడ్రిడ్ బార్సిలోనాలోనూ నిరసనలు తెలిపారు. గాజాలో వెంటనే కాల్పుల విరమణ జరపాలని యునైటెడ్ నేషన్స్తోపాటు ఈయూ, ఈజిప్ట్, ఖతార్, సౌదీ అరేబియా, ఫ్రాన్స్ డిమాండ్ చేశాయి.