- బీట్లాహియా పట్టణంలో బాంబుల వర్షం
- 150 మందికి గాయాలు.. మరో 17 మంది గల్లంతు
గాజా: ఇజ్రాయెల్– హమాస్ మధ్య యుద్ధం రోజురోజుకూ తీవ్రరూపం దాలుస్తున్నది. గాజా స్ట్రిప్ నుంచి మిలిటెంట్ సంస్థను తుడిచిపెట్టడమే లక్ష్యంగా ఇజ్రాయెల్ విరుచుకుపడుతున్నది. తాజాగా, మంగళవారం ఉత్తర గాజాలోని బీట్లాహియా పట్టణంపై ఇజ్రాయెల్ సైన్యం ఎయిర్ స్ట్రైక్ చేసింది. జనావాసాలపై బాంబుల వర్షం కురిపించింది.
ఈ దాడిలో మొత్తం 60 మంది మృతిచెందగా.. 150 మందికి గాయాలయ్యాయి. మృతుల్లో 20 మంది చిన్నారులున్నారని, ఎక్కువ సంఖ్యలో మహిళలున్నారని పాలస్తీనా ఆరోగ్య మంత్రిత్వ శాఖ తెలిపింది. 17 మంది ఆచూకీ దొరకడంలేదని, వారిని మృతిచెందినట్టుగానే భావిస్తున్నామని పేర్కొన్నది. కాగా, ఈ దాడిపై ఇప్పటివరకూ ఇజ్రాయెల్ స్పందించలేదు.
చెల్లాచెదురుగా డెడ్ బాడీలు..
బీట్లాహియా పట్టణంలోని ఓ నాలుగు అంతస్థుల బిల్డింగ్పై ఇజ్రాయెల్ సైన్యం దాడి చేసిన దృశ్యాలకు సంబంధించిన వీడియోను రాయిటర్ విడుదల చేసింది. ఈ దాడితో ఆ బిల్డింగ్ చాలావరకు ధ్వంసమైపోగా, చెల్లాచెదురుగా పడిన మృతదేహాలు, క్షతగాత్రులతో అక్కడ భీతావహ పరిస్థితి నెలకొన్నది. శిథిలాలనుంచి మృతదేహాలను వెలికి తీసి, దుప్పట్లలో చుట్టి అక్కడ ఉంచారు. క్షతగాత్రులను రక్షించేందుకు స్థానికులు ముందుకు వచ్చారు.
ఎలాంటి ముందస్తు సమాచారం లేకుండా ఇజ్రాయెల్ సైన్యం ఈ భవనంపై బాంబు దాడి చేసిందని, మృతదేహాలు గోడలపై చెల్లాచెదురుగా పడిపోయాయని ఓ స్థానికుడు వెల్లడించాడు. కాగా, ఇప్పటివరకూ ఇజ్రాయెల్ జరిపిన దాడిలో దాదాపు లక్ష మంది వరకు చనిపోయినట్టు పాలస్తీనా సివిల్ ఎమర్జెన్సీ సర్వీస్ తెలిపింది. గాజాలోని దవాఖానల్లో మెడికల్ ఎక్విప్మెంట్, డాక్టర్లు, సిబ్బంది కొరత తీవ్రంగా ఉన్నదని పేర్కొన్నది.
ఈ దాడులపై కౌన్సిల్ఆన్అమెరికన్ ఇస్లామిక్ రిలేషన్స్ (సీఏఐఆర్‌) స్పందించింది. గాజాపై దాడులను విరమించేలా చూసి, అక్కడి ప్రజల ప్రాణాలను కాపాడాలని కోరింది.
