- ఈఎస్ఏకు చెందిన ప్రోబా–3 ఉపగ్రహాలను నిర్ణీత కక్ష్యలో చేర్చిన ఇస్రో రాకెట్
- ఎన్ఎస్ఐఎల్ భాగస్వామ్యంతో ప్రయోగం
- సైంటిస్టులకు ఇస్రో చైర్మన్ సోమనాథ్ అభినందనలు
న్యూఢిల్లీ: భారత అంతరిక్ష పరిశోధనా సంస్థ (ఇస్రో) చేపట్టిన పీఎస్ఎల్వీ సీ –59 ప్రయోగం విజయవంతమైంది. ఏపీలోని నెల్లూరు జిల్లా శ్రీహరి కోటలోని సతీశ్ ధావన్ స్పేస్ సెంటర్ (షార్) నుంచి గురువారం సాయంత్రం 4.04 గంటలకు వాహక నౌక నిప్పులు చిమ్మూతూ నింగిలోకి దూసుకెళ్లింది. యురోపియన్ స్పేస్ ఏజెన్సీ (ఈఎస్ఏ)కి చెందిన ప్రోబా–3తోపాటు మరికొన్ని ఉపగ్రహాలను నిర్ణీత కక్ష్యలోకి విజయవంతంగా చేర్చింది. బుధవారమే ఈ ప్రయోగం చేపట్టాల్సి ఉండగా.. శాటిలైట్స్లో కొన్ని సాంకేతిక లోపాలు తలెత్తడంతో నేటికి వాయిదా పడింది. కాగా, పీఎస్ఎల్వీ సీ–59 ప్రయోగం సక్సెస్ కావడం పట్ల ఇస్రో చైర్మన్ ఎస్. సోమనాథ్ హర్షం వ్యక్తంచేశారు. ఈ ప్రాజెక్టులో భాగస్వాములైన సైంటిస్టులకు శుభాకాంక్షలు తెలిపారు.
పీఎస్ఎల్వీ సీ–59 రాకెట్ప్రయోగించిన 18 నిమిషాల్లోనే ప్రోబా–3 శాటిలైట్స్ను విజయవంతంగా నిర్ణీత కక్ష్యలో ప్రవేశపెట్టిందని తెలిపారు. ఈ ప్రయోగాన్ని న్యూస్పేస్ ఇండియా లిమిటెడ్ (ఎన్ఎస్ఐఎల్) భాగస్వామ్యంతో చేపట్టినట్టు చెప్పారు. డిసెంబర్లో ‘స్పేటెక్స్‌’ పేరుతో పీఎస్ఎల్వీ-సీ–60 ప్రయోగం ఉంటుందన్నారు. ఈ శాటిలైట్తోనే ఆదిత్య ఎల్‌–-1 సోలార్‌ మిషన్‌ కొనసాగుతుందన్నారు. కాగా, ప్రయోగం విజయవంతంపై ఎన్ఎస్ఐఎల్ చైర్మన్, ఎండీ డీ రాధాకృష్ణన్ సంతోషం వ్యక్తంచేశారు. ఈ ప్రయోగంతో తొలిసారి పీఎస్ఎల్వీ రాకెట్ 60 వేల కి.మీ.దూరంలోని కక్ష్యలోకి చేరుకున్నదని చెప్పారు.
సూర్యుడి కరోనాపై పరిశోధనకు ప్రోబా 3
ప్రోబా –3 శాటిలైట్స్ను యూరోపియన్ స్పేస్ ఏజెన్సీ తయారు చేసింది. భారత్కు చెందిన ఎన్ఎస్ఐఎల్ భాగస్వామ్యంతో వీటిని ఇస్రో నింగిలోకి పంపనుంది. ఇందులో కరోనాగ్రాఫ్ స్పేస్క్రాఫ్ట్ (సీఎస్సీ), ఓకల్టర్ స్పేస్క్రాఫ్ట్ (ఓఎస్సీ) అనే రెండు శాటిలైట్స్ ఉన్నాయి. వీటి బరువు 545 కిలోలు, సూర్యుడి బాహ్య వాతావరణమైన కరోనాపై పరిశోధనలు చేయడమే లక్ష్యంగా వీటిని ప్రయోగించారు. సంపూర్ణ సూర్యగ్రహణంపై ఇవి అధ్యయనం చేస్తాయి. ఇవి మొదట్లో ఒకే కాన్ఫిగరేషన్లో భూకక్ష్యలో విహరిస్తాయి. అనంతరం విడిపోయి పరస్పరం సమన్వయంతో కక్ష్యలో తిరుగుతాయి.
