- ఐటీ హబ్తో ఉద్యోగ అవకాశాలు పెరుగుతయ్
- మున్సిపల్, ఐటీమినిస్టర్ కేటీఆర్
నిజామాబాద్, వెలుగు : నిజామాబాద్సిటీ డెవలప్మెంట్కు కట్టబడి ఉన్నామని ఐటీ, మున్సిపల్ మినిస్టర్ కేటీఆర్ పేర్కొన్నారు. మున్సిపల్ కార్పొరేషన్ పరిధిలోని డెవలెప్మెంట్పనుల కోసం ఒక్కో డివిజన్కు రూ.కోటి చొప్పున రూ.60 కోట్లు మంజూరు చేస్తున్నట్లు చెప్పారు. బుధవారం నగరంలో వివిధ అభివృద్ధి కార్యక్రమాలను ప్రారంభించిన అనంతరం పాల్టెక్నిక్ గ్రౌడ్లో నిర్వహించిన సభలో మాట్లాడారు. ప్రతీ ఏడాది నిజామాబాద్సిటీ అభివృద్ధికి రూ.100 కోట్లు కేటాయిస్తున్నామని చెప్పారు. అండర్ గ్రౌండ్ డ్రైనేజీ కోసం రూ.232 కోట్లు, నీటి సరఫరాకు రూ.98 కోట్లు, మిషన్ భగీరథ కింద రూ.20 కోట్లు, రైల్వే అండర్పాస్కు రూ.20 కోట్లు, టీయూఎఫ్ఐడీసీ కింద రూ.100 కోట్లు ఇచ్చామన్నారు. ప్రజాకవి దాశరథి జైలు జీవితం గడిపిన ఇందూరులో కవులు, కళాకారులు, సాహితీ ప్రియులకు కొదువలేదని వారి కోసం రూ.50 కోట్లతో కళాభవన్ నిర్మిస్తున్నామని, దీన్ని మూడు నెలల్లోగా కంప్లీట్ చేస్తామని చెప్పారు.
ఐటీ హబ్తో ఉద్యోగాలు..
జిల్లా కేంద్రాలకు సైతం సాఫ్ట్వేర్ఉద్యోగాలను అందుబాటులోకి తెచ్చామని, నిజామాబాద్లో ఏర్పాటు చేసిన ఐటీ హబ్ తో ఉద్యోగ అవకాశాలు పెరుగుతాయన్నారు. ఇప్పటికే ఇక్కడ 1400 మంది నిరుద్యోగులు సెలెక్ట్ అయినట్లు చెప్పారు. న్యాక్(నేషనల్అకాడమీ ఆఫ్ కన్స్ట్రక్షన్)లో ప్లంబర్, ఎలక్ర్టీషియన్, సెంట్రింగ్ తదితర బిల్డింగ్నిర్మాణ పనుల్లో శిక్షణ తీసుకోవచ్చన్నారు. టెన్త్, ఐటీఐ, ఇంటర్, డిప్లొమా చదివిన వారికి న్యాక్ ట్రైనింగ్ మేలు చేస్తుందన్నారు. నిజామాబాద్ మున్సిపల్ఆఫీస్ని సకల సౌకర్యాలతో తీర్చిదిద్దినట్లు చెప్పారు. నగరంలో హైటెక్ హంగులతో నిర్మించిన మూడు శ్మశాన వాటికలు హైదరాబాద్లోని మహాప్రస్థానం కంటే గొప్పగా ఉన్నాయని మంత్రి కేటీఆర్ పేర్కొన్నారు.
తన సోదరి ఎమ్మెల్సీ కవితకు జిల్లా అంటే అమితమైన ప్రేమ ఉందని, జిల్లాకు కేటాయించాల్సిన ఫండ్స్ గురించి సీఎం కేసీఆర్తో మాట్లాడడానికి వెళ్లినందువల్ల ఆమె సభకు రాలేదన్నారు. మంత్రి ప్రశాంత్రెడ్డి, రాజ్యసభ సభ్యుడు సురేశ్రెడ్డి, ఆర్టీసీ చైర్మన్ బాజిరెడ్డి గోవర్ధన్, మార్క్ఫెడ్ చైర్మన్ మార గంగారెడ్డి, జడ్పీ చైర్మన్ విఠల్రావు, రాష్ట్ర మహిళా ఆర్థిక సహకార సంస్థ అధ్యక్షురాలు ఆకుల లలిత, ఎమ్మెల్యేలు జీవన్రెడ్డి, షకీల్, గణేశ్గుప్తా, మేయర్ నీతూకిరణ్, డీసీసీబీ చైర్మన్ పోచారం భాస్కర్రెడ్డి, జిల్లా లైబ్రరీ చైర్మన్ఎల్ఎంబీ రాజేశ్వర్, మాజీ ఎమ్మెల్సీలు డి.రాజేశ్వర్, వీజీగౌడ్, మాజీ మేయర్ ఆకుల సుజాత తదితరులు పాల్గొన్నారు.
