గూండారాజ్కు గుణపాఠం.. అవినీతి, అరాచకాల వల్లే ఓడిన బీఆర్ఎస్ అభ్యర్థులు

మంచిర్యాల జిల్లాలోని మూడు స్థానాలో ఘోర పరాజయం
చెన్నూర్, బెల్లంపల్లిలో సెకండ్, మంచిర్యాలలో థర్డ్ ప్లేస్
ల్యాండ్, సాండ్, కోల్ దందాలతో కోట్లకు పగడలెత్తిన సుమన్
అక్రమ కేసులు, భౌతిక దాడులను సహించని చెన్నూర్ ప్రజలు
భూకబ్జాలు, లైంగిక వేధింపుల ఆరోపణలతో చిన్నయ్యకు మచ్చ
దివాకర్రావు కొంపముంచిన కొడుకు విజిత్రావు దందాలు

మంచిర్యాల, వెలుగు: మంచిర్యాల జిల్లాలోని మూడు నియోజకవర్గాల్లో అవినీతి, అక్రమాలు, అరాచకాల వల్లే బీఆర్ఎస్ అభ్యర్థులు ఘోర పరాజయం పాలయ్యారన్న చర్చ జరుగుతోంది. మంచిర్యాల, చెన్నూర్, బెల్లంపల్లి సిట్టింగ్ఎమ్మెల్యేలు నడిపెల్లి దివాకర్రావు, బాల్క సుమన్, దుర్గం చిన్నయ్యల ఓటమిపై పోస్టుమార్టం మొదలైంది. ఈ ముగ్గురూ మొన్నటివరకు తామే గెలుస్తామనే ధీమాను ప్రదర్శించారు. కానీ ఎన్నికల ఫలితాలు వారి అంచనాలను తారుమారు చేశాయి. ఓట్ల లెక్కింపులో ఫస్ట్ రౌండ్ నుంచే పతనం కనిపించింది.

ప్రజల నాడీని పసిగట్టడంలో దారుణంగా విఫలమయ్యారు. ఫలితంగా చెన్నూర్, బెల్లంపల్లిలో బీఆర్ఎస్ రెండో స్థానంలో నిలువగా, మంచిర్యాలలో ఏకంగా థర్డ్ ప్లేస్కు దిగజారడం బీఆర్ఎస్ తాజా పరిస్థితికి అద్దం పడుతోంది. చెన్నూర్లో కాంగ్రెస్అభ్యర్థి వివేక్ కు 87,529 ఓట్లు రాగా, బీఆర్ఎస్ అభ్యర్థి సుమన్ కు 50,016 ఓట్లు వచ్చాయి. వివేక్ 37,513 ఓట్లతో గెలిచారు.

బెల్లంపల్లిలో కాంగ్రెస్అభ్యర్థి వినోద్ కు 82,217 ఓట్లు, బీఆర్ఎస్ అభ్యర్థి చిన్నయ్యకు 45,339 ఓట్లు వచ్చాయి. 36,878 ఓట్లతో వినోద్ విజయం సాధించారు. మంచిర్యాలలో కాంగ్రెస్అభ్యర్థి కొక్కిరాల ప్రేమ్ సాగర్ రావు 66,116 ఓట్ల భారీ మెజారిటీతో దక్కించుకునారు. ఆయనకు 1,05,945 ఓట్లు రాగా, సమీప ప్రత్యర్థి బీజేపీ అభ్యర్థి వెరబెల్లి రఘునాథ్ రావుకు 39,829 ఓట్లు పోలయ్యాయి. బీఆర్ఎస్ అభ్యర్థి దివాకర్ రావు 37,989 ఓట్లతో మూడో స్థానానికి పరిమితమయ్యారు.

అడ్డగోలు అరాచకాలు

చెన్నూర్లో బాల్క సుమన్ ఓటమికి అవినీతి, అక్రమాలతో పాటు అహంకారం, అనుచరుల అరాచకాలే కారణమని చర్చించుకుంటున్నారు. 2014 లోక్సభ ఎన్నికల్లో తెలంగాణ సెంటిమెంట్తో పెద్దపల్లి ఎంపీగా గెలిచిన సుమన్... 2018లో చెన్నూర్ సిట్టింగ్ ఎమ్మెల్యే నల్లాల ఓదెలు సీటును లాక్కొని ఎమ్మెల్యేగా గెలిచారు. ఆ తర్వాత ఇక్కడ పాగా వేయడం కోసం నియోజకవర్గంలోని కీలక నాయకులందరినీ టార్గెట్ చేశారు.

నల్లాల ఓదెలు, పురాణం సతీశ్, మూల రాజిరెడ్డి వంటి లీడర్లను రాజకీయంగా అణగదొక్కారు. ప్రతి మండలంలో అనుచర వర్గాన్ని ఏర్పాటు చేసుకొని వారి అన్యాయాలను, అక్రమాలను ఎంకరేజ్చేశారు. 2014లో తనపై వంద కేసులు, రెండు జతల బట్టలు ఉన్నాయన్న సుమన్... ఎమ్మెల్యేగా గెలిచిన తర్వాత విచ్చలవిడిగా సంపాదించారన్న టాక్ ఉంది.

గత ఐదేండ్లలో ల్యాండ్, సాండ్, కోల్దందాల ద్వారా వేల కోట్లకు పడగలెత్తాడన్న ఆరోపణలు వినిపిస్తున్నాయి. దీనికితోడు చెన్నూర్లో సుమన్ అనుచరుల ఆగడాలకు అంతే లేకుండాపోయింది. సమస్యలపై నిలదీస్తే కేసులు, అక్రమాలపై ప్రశ్నిస్తే భౌతికదాడులు పెరిగాయి. ఫలితంగా చెన్నూర్ ప్రజలు ఈ ఎన్నికల్లో గూండారాజ్కు తగిన గుణపాఠం చెప్పారని పరిశీలకులు పేర్కొంటున్నారు.

చిత్తుగా ఓడిన చిన్నయ్య....

బెల్లంపల్లి ఎమ్మెల్యే దుర్గం చిన్నయ్య రెండుసార్లు గెలవడంతో నియోజకవర్గంలో తనకు ఎదురే లేదన్నట్టు వ్యవహరించారు. చిన్నయ్య తన అనుచరులతో పెద్ద ఎత్తున గర్నమెంట్, అసైన్డ్ భూములను కబ్జా పెట్టారు. చెరువులు, కుంటలను చెరబట్టడమే కాకుండా ఫారెస్ట్ భూములను సైతం వదిలిపెట్టలేదు. అడ్డమొచ్చిన అధికారులను లొంగదీసుకోవడం, లేదంటే బెదిరించడం, అపోజిషన్ లీడర్లపై అక్రమ కేసులు పెట్టి వేధించడం బెల్లంపల్లిలో పరిపాటైంది. సాయం పేరుతో తన వద్దకు వచ్చే మహిళలను చిన్నయ్య, అనుచరులు లొందీసుకుంటున్నారని, పచ్చని కాపురాల్లో చిచ్చురేపుతున్నారని, పద్ధతి మార్చుకోవాలని ఆ మధ్య మావోయిస్టులు వార్నింగ్ ఇచ్చారు.

ఆ తర్వాత అరిజిన్ డెయిరీ శేజల్ ఉదంతం వెలుగులోకి వచ్చింది. ఎమ్మెల్యే తన పలుకుబడితో అక్రమ కేసులు పెట్టించాడని, లైంగిక వేధింపులకు పాల్పడ్డాడని శేజల్ ఆరోపించింది. ఆమె గల్లీ నుంచి ఢిల్లీ దాకా పోరాడినప్పటికీ న్యాయం జరుగలేదు. ఒక ఆడపిల్ల బెల్లంపల్లికి వచ్చి చిన్నయ్యకు వ్యతిరేకంగా పోరాటం చేయడం ప్రజల్లో చర్చనీయాంశమైంది. కాంగ్రెస్ నుంచి ఎలాంటి మచ్చ లేని గడ్డం వినోద్ బరిలో నిలువడంతో బెల్లంపల్లి ప్రజలు ఆయనకు పట్టం కట్టారు. చిన్నయ్యను చిత్తుగా ఓడించారు.

కొంప ముంచిన షాడో ఎమ్మెల్యే...

మంచిర్యాల ఎమ్మెల్యే నడిపెల్లి దివాకర్రావుకు సౌమ్యుడు, వివాద రహితుడనే పేరున్నప్పటికీ... ఆయన కొడుకు విజిత్రావు షాడో ఎమ్మెల్యేగా వ్యవహరించడం వల్ల ఓటమి తప్పలేదు. విజిత్రావు నియోజకవర్గంలో అన్ని వ్యవహారాలను తన కంట్రోల్లోకి తెచ్చుకున్నారు. కొంతమంది యూత్ లీడర్లను ఎంకరేజ్ చేస్తూ చెడ్డపేరు మూటగట్టుకున్నారు. మంచిర్యాల, నస్పూర్లో భూకబ్జాలు, కాంట్రాక్టుల్లో కమీషన్లు, అపోజిషన్ లీడర్లపై అక్రమ కేసులతో దివాకర్రావు గ్రాఫ్దిగజారింది.

దీనికితోడు నాలుగుసార్లు గెలిపించినా నియోజకవర్గంలో ఆశించిన స్థాయిలో అభివృద్ధి చేయలేదన్న అపవాదును ఎదుర్కొన్నారు. మంచిర్యాల జిల్లా కేంద్రంలోని సమస్యలను పరిష్కరించకపోవడం, ప్రణాళిక లేని పనులతో ప్రజాధనాన్ని వృథా చేయడం వంటి కారణాలతో ప్రజల్లో విసుగుపుట్టింది. ‘ఎప్పటికీ ఆయననేనా?’ అన్న టాక్ రావడంతో దివాకర్రావును గద్దె దించారు.