హైదరాబాద్, వెలుగు: ఆర్టిఫిషియల్ ఇంటెలిజెన్స్(ఏఐ), మోడర్న్ టెక్నాలజీకి హైదరాబాద్ గ్లోబల్ హబ్గా వృద్ధి చెందుతున్నదని ఐటీ, పరిశ్రమల శాఖ మంత్రి శ్రీధర్ బాబు చెప్పారు. ప్రతిభ కలిగిన యువత, మంచి మౌలిక వసతులు రాష్ట్రంలో అందుబాటులో ఉన్నాయని, అందుకే కొత్త సంస్థలు సిటీలో పెట్టుబడులు పెట్టేందుకు ఆసక్తి చూపిస్తున్నాయన్నారు. ఆదివారం ఏఐ సర్వీసెస్, క్లౌడ్ కంప్యూటింగ్, డేటా డెలివరీలో ప్రముఖ సంస్థల్లో ఒకటైన డేటా ఎకానమీ సంస్థ కొత్త వర్క్ స్టేషన్ను ఆయన ప్రారంభించి మాట్లాడారు. క్వాంటమ్ కంప్యూటింగ్, డిజిటల్ ట్విన్స్, డేటా ట్రాన్స్ఫర్ రంగాల్లో సంస్థ మంచి అభివృద్ధి సాధిస్తున్నదని చెప్పారు.
సంస్థ విస్తరణకు ప్రభుత్వం నుంచి తమ వంతు సాయం చేస్తామని చెప్పారు. ద్వితీయ, తృతీయ శ్రేణి నగరాలకు సాఫ్ట్ వేర్ సంస్థలు విస్తరించాలని కోరుకుంటున్నట్టు పేర్కొన్నారు. స్టార్టప్ కంపెనీలు, ఏఐ, క్వాంటమ్ కంప్యూటింగ్ కేంద్రాలు, డేటా సెంటర్లు భారీ సంఖ్యలో ఏర్పాటవుతుండడంతో యువతకూ ఉపాధి పెరుగుతుందన్నారు. ఏఐ సిటీ అభివృద్ధిలో డేటా ఎకానమీ భాగస్వామి కావాలని ఆయన విజ్ఞప్తి చేశారు. కాగా, వచ్చే ఏడాది చివరి నాటికి హైదరాబాద్లో మరో 500 మంది కొత్త ఉద్యోగులను నియమిస్తామని డేటా ఎకానమీ ప్రతినిధులు మంత్రికి వివరించారు.
