హైదరాబాద్, వెలుగు: హైదరాబాద్ లో కుండపోత వర్షం కురిసింది. శనివారం రాత్రి 7:30 గంటల నుంచి గంటపాటు దంచికొట్టింది. దీంతో సిటీలోని రోడ్లన్నీ జలమయమయ్యాయి. భారీగా ట్రాఫిక్ జామ్ అయింది. సిటీలో అత్యధికంగా గోల్కొండలో 9.1 సెంటీమీటర్లు, ఖైరతాబాద్లో 8.6, ఆసిఫ్నగర్లో 8, మెహిదీపట్నంలో 6.8 సెంటీమీటర్ల చొప్పున వర్షపాతం నమోదైంది. మరోవైపు రాష్ట్రవ్యాప్తంగా పలు జిల్లాల్లోనూ వర్షం కురిసింది. ఉమ్మడి నల్గొండ, రంగారెడ్డి, మహబూబ్నగర్, మెదక్, నిజామాబాద్, ఆదిలాబాద్ జి ల్లాల్లో మోస్తరు వర్షపాతం నమోదైంది. యాదాద్రి జిల్లా భువనగిరిలో అత్యధికంగా 10.3 సెంటీమీటర్లు, సంగారెడ్డిలోని దిగ్వాల్లో 9.1 సెంటీమీటర్ల చొప్పున వర్షం కురిసింది.
పలు జిల్లాలకు అలర్ట్..
నాలుగు రోజుల పాటు రాష్ట్రంలో భారీ వర్షాలు కురుస్తాయని వాతావరణ శాఖ హెచ్చరించింది. ఆదివారానికి రాష్ట్ర వ్యాప్తంగా ఎల్లో అలర్ట్జారీ చేసింది. సోమవారం ఉమ్మడి ఖమ్మం, నల్గొండ, సూర్యాపేట, వరంగల్, రంగారెడ్డి, మహబూబ్నగర్ జిల్లాల్లో వర్షాలు కురుస్తాయని తెలిపింది. మంగళవారం ఆసిఫాబాద్, మంచిర్యాల, కరీంనగర్, పెద్దపల్లి, జయశంకర్ భూపాలపల్లి, వరంగల్, హనుమకొండ, జనగామ, యాదాద్రి భువనగిరి, రంగారెడ్డి, వికారాబాద్, హైదరాబాద్, మహబూబ్ నగర్, నాగర్కర్నూల్, వనపర్తి, నారాయణపేట, జోగులాంబ గద్వాల జిల్లాల్లో వానలు పడతాయని చెప్పింది.
