- ఐటీడీఏ పీవో రాహుల్
భద్రాచలం, వెలుగు : డివిజన్, జోనల్స్థాయిలో క్రీడల్లో రాణించి స్టేట్ లెవల్స్ కు ఎంపికైన విద్యార్థులు మెడల్స్ సాధించేలా స్పెషల్ ట్రైనింగ్ ఇవ్వాలని గిరిజన ఆశ్రమ పాఠశాలల హెచ్ఎంలు, వార్డెన్లు, పీడీలు, పీఈటీలను ఐటీడీఏ పీవో బి.రాహుల్ ఆదేశించారు. ఐటీడీఏలో సోమవారం గిరిజన దర్బారులో పాల్గొన్న యూనిట్ ఆఫీసర్లతో పాటు హెచ్ఎంలు, వార్డెన్లు, పీడీలు, పీఈటీలతో ఆయన మాట్లాడారు. ఎంపికైన వారికి మంచి ఆహారం అందించడంతో పాటు, క్రీడల్లో మరిన్ని మెళకువలు నేర్పించాలని సూచించారు.
అనంతరం గిరిజనుల నుంచి వినతులు స్వీకరించారు. పోడు భూములకు పట్టాలు ఆన్లైన్ చేయాలని, భూ సమస్యలు తీర్చాలని, చేపల సొసైటీల కోసం, స్వయం ఉపాధికి లోన్లు కావాలని, వ్యవసాయ బావులకు కరెంట్ సౌకర్యం, బోరు, మోటారు, ట్రైకార్ రుణాల ఇవ్వాలని ఇలా రకరకాల ఆర్జీలు పీవో వద్దకు వచ్చాయి.
వీటిని పరిశీలించిన పీవో సంబంధిత యూనిట్ ఆఫీసర్లకు పంపించారు. పరిశీలించి, అర్హత ప్రకారం ప్రాధాన్యతా క్రమంలో సమస్యలు పరిష్కరిస్తామని పీవో ఆర్జీదారులకు హామీ ఇచ్చారు. ఈ కార్యక్రమంలో ఏపీవో జనరల్ డేవిడ్రాజ్, డీడీ మణెమ్మ, ఈఈ తానాజీ, ఏవో రాంబాబు తదితరులు పాల్గొన్నారు.
