ఖైరతాబాద్, వెలుగు: రాష్ట్రంలో సమగ్ర కులగణన చేపట్టి జనాభా దామాషా ప్రకారం బీసీ రిజర్వేషన్లు పెంచాలని కోరుతూ జులై 14 నుంచి 31వ తేదీ వరకు 'సమగ్ర కులగణన సాధన యాత్ర 'చేపట్టనున్నట్టు బీసీ సంక్షేమ సంఘం జాతీయ అధ్యక్షుడు జాజుల శ్రీనివాస్ గౌడ్తెలిపారు. మంగళవారం సోమాజిగూడ ప్రెస్క్లబ్లో జరిగిన విలేకరుల సమావేశంలో ఆయన మాట్లాడారు. అసెంబ్లీ ఎన్నికలకు ముందు కాంగ్రెస్ పార్టీ సమగ్ర కులగణన చేపట్టి స్థానిక సంస్థల ఎన్నికల్లో బీసీ రిజర్వేషన్లను 42 శాతానికి పెంచుతామని స్పష్టమైన హామీతో బీసీ డిక్లరేషన్ చేసిందని చెప్పారు.
కామారెడ్డి సభలో ఈ హామీ ఇచ్చిందని పేర్కొన్నారు. రాష్ట్ర ప్రభుత్వంపై ఒత్తిడి తీసుకు రావడానికి బీసీ డిక్లరేషన్ చేసిన కామారెడ్డి సభ నుంచే బీసీ సమగ్ర కులగణన సాధన యాత్ర ప్రారంభించనున్నట్టు వెల్లడించారు. 17 రోజుల పాటు కొనసాగే ఈ యాత్ర కరీంనగర్ లో ఈ నెల 31న ముగియనున్నట్టు వివరించారు. సమావేశంలో బీసీ కుల సంఘాల జేఏసీ చైర్మన్ కుందారం గణేష్ చారి, కన్వీనర్ బాలగోని బాలరాజ్ గౌడ్, బీసీ విద్యార్థి సంఘం జాతీయ అధ్యక్షుడు విక్రమ్ గౌడ్ తదితరులు పాల్గొన్నారు.
